2 Becorinthien 1:1-24
1 Ma Paul, nlômane Krist Yésus amu nkômbane Zambe, a Timothée, monyañe wongan, ma tili ékôane* Zambe é ne Corinthe a mimfufube mise mi ne Achaïe ase:
2 Ngo’o nge beta mvam a mvo’é bia so be Zambe Ésa wongan a be Tate Yésus Krist bia tabe be mia.
3 Duma é bo’o be Zambe a Ésa Tate wongane Yésus Krist, Ésa wongan a wô’ô bia éngôngol abui a Zambe ya mvolane minlem ôse,
4 nnye a volô bia minleme* minju’u* mise bia tôbane mie, ndembene bi ne bo ngule ya volô bôte bevo’o ba tôbane minju’u* minleme mevale meval a mvolane minleme bia nyoñe be Zambe.
5 Amu fo’o ve avale bia tôban abui minjuk asu Krist, avale te nde fe bi bili mvolane minlem abui a zene ya be Krist.
6 Éyoñe ji, nge bia tôbane minjuk,* a ne asu mvolane minleme wônan a nyiiane wônan, a nge bi bili mvolane minlem, a ne asu mvolane minleme wônan, ñwô wo volô mia na mi jibi avale minju’u bia fe bia tôbane de.
7 A bi bili benya beamu ya tabe mia ndi amu bia yeme na, fo’o ve avale mia tôban avale minju’u bia tôbane de, avale te nde fe mia ye nyoñ avale mvolane minleme bia nyoñ.
8 Amu a bobejañ, bia ye ke solé mia minju’u bi nga tôbane mie ngoto ya Asie. Bi nga tôban abui minjuk, mi nga lôte bia ngul aval é mbe na bi nga ko woñ asu binyiñe biangan.
9 E nya ajôô, bi mbe bi simesa’ane na susu’a jam é li’iya bia é ne ve awu. Asu na bi bo te tabe ndi a biabebien ve a Zambe, nnye a wômôlô miñwuan.
10 Éyoñ awu é mbe é ntoo bia bebé a nga nyii bia a a ye beta nyii bia, a ndi nleme bi bili be nye ja ye ke ôsu a nyii bia.
11 Mia fe mi ne volô bia nge mia bo meye’elane me nja’an asu dangan, ndemben abui é ne ve Zambe akiba a zene jangan, amu mvolane bia bi ô ntoo éyalane ya meye’elane me abui bôt.*
12 Amu jame da ve bia mengo’o dole nde di, mone môte ya nleme wongan a bo’olô biabebiene na bi nga bi mbamba ntabane si nyu, e dañedañe mfa’a wônan e zôsô été a nlem ôse sa ke a fe’e môta binam, ve a beta mvame Zambe.
13 Amu bi nji tili mia jôm éfe éziñ ane ô vaa ve mame mi ne lañ* a wôk, a me too ndi na mia ye wô’ô mame mete akekui memane,*
14 fo’o ve avale mia fe mia te wôk abim éziñ, bi bili beamu ya bo mengo’o dol amu mia, avale te da da mia fe mia ye bi beamu ya bo mengo’o dol asu dangane môse Tate wongane Yésus.
15 Nde a ndi nlem éte, me bili nsôñane ya taté so be mia ndembene mi ne beta bi fane ya vak;*
16 amu me mbe me kômbô’ô mia zu jom éyoñe ma ke Macédoine a zu tebe éyoñe ma ye so Macédoine, a mvuse ya valé mi ke litane ma akui nté éziñ éyoñe ma ye ke Judée.
17 Yaa, éyoñe me nga bi ôsimesan ôte, ye me nga nyoñe mam éngbwemese? Nge na, ye me nga yene mam ane môta binam aval é ne na me jô na, “Ôwé, ôwé,” mvuse ke me nga jô na, “Momo, teké’é”?
18 Fo’o ve avale Zambe a ne benya mejôô, mejô mangane fe ma yiane bo benya mejôô. Bia ye ke jô na, “Ôwé,” mvuse ke bi nga jô na, “Teké’é.”
19 Amu Mona Zambe Yésus Krist, nnye ate bi nga kañete mia, nalé ate a tinane na ma, Silvain* a Timothée, a nji bo “ôwé” a su’ulane ke bo “teké’é,” ve “ôwé” a nga bo fo’o ve “ôwé” mfa’a wé.
20 To’o bengaka’a be Zambe be ne tañ aya, be ntoo “ôwé” a zene jé. Nde fe, a ne a zene jé nje ba jô Zambe na, “Amen,” nalé a soo Zambe duma a zene jangan.
21 Ve nyu a futi sitame na, mia a bia bi ne ba be Krist, a nyu a tobe bia a ne Zambe.
22 A veya fe bia sitam a, a nga ve fe bia ébane ya jôme ja yiane so,* nje éte é ne nsisime minleme miangan été.
23 Éyoñe ji ma kane ngana be mamiene* me nyoñe’e Zambe ane ngaa na, nge me nji so Corinthe, a ne asu na me kamane mia.
24 Sa ke na bia jôé mbunane wônan, ve bia saé nsamba a mia asu meva’a menan, amu nge mi tele a ne amu mbunane wônan.
Notes
^ Nge ke, “akônda; kirké.”
^ Nge ke, “nnye a ve bia ngule nyul.”
^ Nge ke, “étibila’a.”
^ Nge ke, “étibila’a.”
^ Nge ke, “étibila’a.”
^ Nge ke “abui mesu da ye’elan.”
^ Be ne fe jô na, “jame mi nga kôme yem.”
^ Nge ke, “tu’a wô’ô mame mete.”
^ Be ne fe jô na, “ndembene mi ne bi bibotane biyoñe bibaé.”
^ Nnye fe be mbe be lo’one na Silas.
^ Nge ke, “moné a ne nnaan; ndi ya jame da zu.”
^ Éfia Grec, psukhê. Lañe’e Atinane bifia, “Ényiñ.”
