2 Becorinthien 2:1-17
2 Amu, me maneya kômesane nleme wome na, me bo te beta so be mia ôlun été.
2 Amu nge ma ve mia ôlune nlem, za a ye ve ma meva’a nlem, nge ô vaa ve nyu me nga ve ôlune nlem?
3 Me nga tili mia kalate, ndemben éyoñe ma ye so, me ne bo te bi ôlune nlem a zene ya ba ba yiane ma ve meva’a nlem, amu me too ndi na, jôme ja soo ma mevak, ja soo fe mia bese avale meva’a da.
4 Amu me nga tili mia ézezañ abui minjuk a abui mintaé nlem a mili’i mis, sa ke na me ve mia nlem abé, ve na me liti mia abim abui nye’ane ma nye’e mia.
5 Éyoñe ji, nge môt éziñ a nga ve mia ôlune nlem, a sa ke ma a nga ve ôlune nlem, ve a nga ve mia bese ôlune nlem abim éziñ . . . Ve me nji kômbô jô jam éziñ, a bo na ajô é tu’a ndaman a lôt abim é ntoo ndaman.
6 Melep abui bôt é nga ve, ma yian asu avale môt éte;
7 éyoñe ji, mia yiane nye jamé a nlem ôse a volô nye nlem, ndemben ôlun ô za jaé* nye nlem avale da lôte nné.
8 Nde ma jô mia na, mi kôme nye liti nye’an avale da yian.
9 Amu jam éte nde fe me nga tili mia na, me yeme nge mia ye bo mewô’ô mfa’a ya mame mese.
10 Nge mia jamé môt éziñe jôm éziñ, ma fe ma jamé nye. E nya ajôô, jame me nga jamé, (nge me nga jamé môte jam éziñ) me nga jamé de asu mvo’é jenan, Krist a ne ma ngaa,
11 ndembene Satan a bo te dañe bia ngul,* amu bi nji dimine minsôñane* mié.
12 Éyoñe me nga suane Troas na me kañete mbamba foé ajô ya Krist, mbé asu ésaé nkañete ô nga yombô ma be Tate.
13 Biyebe bi nji kôlô ma nlem, amu me nji koone monyañe wome Tite. Nde ñhe me nga ya’ane bobejañ a ke Macédoine.
14 Ve bia ve Zambe akiba, nnye a wulu bia a Krist, a ne ane dulu bôte be wô’ô wulu na be vak amu ndañan; ñyemane Zambe ô ne jôme ja nyum abeñ, a a belan ésaé bia bo na, bôte ya vôm ase be wôk ényum éte.*
15 Amu mfa’a Zambe, bi ne mbamba ényume Krist, ézezañe bôte be nga nyiiban, a ézezañe ba ba ke njañan;
16 mfa’a ba ba ke njañan, a ne ényume ya awu ja kee bôt awu, mfa’a ba ba nyiiban, a ne ényume ya ényiñe ja kee bôt ényiñ. A za a ntoo ngule ya bo mame ma?
17 Bi ne bôte bete, amu bi nji bo bôte ba kuane* mejô me Zambe ane bôte bevo’o ba bo, ve bia kobô a nlem ôse ane bôte Zambe a nga lôm, ôwé, e mise me Zambe été nsamba a Krist.
Notes
^ Nge ke, “dañe bo.”
^ Nge ke, “du’u bia.”
^ Nge ke, “minkômban.”
^ Nge ke, “ényum éte é mialan.”
^ Nge ke, “bo makit a.”
