2 Becorinthien 3:1-18
3 Ye da sili na bi beta kate mia beza bi ne? Ye bia yiane ve mia bekalate ba se’e bia, avale bôte béziñe ba yi be? Ye mia mia yiane tili avale bekalate éte asu dangan? Teké’é fo’o.
2 Miabebiene mi ne kalate wongan, a ne ntilane minleme miangan été, a bôte bese ba yeme nye a ba lañe nye.
3 Amu da kôme yené na mi ne kalate Krist, a ne ntilan a zene ya ésaé nkañete bi nga bo, ntilan, sa ke a tiñeti ve a nsisime Zambe a vee, sa ke e mekok, ve e minlem été.
4 Bi bili avale ndi nlem éte be Zambe amu Krist.
5 Sa ke na biabebiene bi ntoo avale bôt é ne ngule ya simesane na jôm éziñe ja so be bia, ve ngule jangane ja so be Zambe,
6 nnye a nga ve bia ngule ya bo bebo bisaé ya mfefé élat, sa ke bebo bisaé ya nkobe metiñ ô ne ntilan, ve bebo bisaé ya nsisim; amu nkobe metiñ ô ne ntilan, wo ve bia mekua akekui awu, ve nsisime wo ve ényiñ.
7 Nde fe, nkobe metiñe wo kee bôt awu, ô nga tiliban a bikanga meko’o yôp, ô nga kui ô bili avale duma é mbe na, bone ya Israël be nji be ngule ya fombô Moïse asu, amu duma ya asu dé, duma é mbe na da yiane man;
8 nge Metiñe me Moïse me nga veban a duma, nde amu jé nsisime wo ye ke veban a duma da dañe dili?
9 Amu nge nkobe metiñ ô nga soo mveane mekua, ô nga vebane beta duma été, ngumane ke nkobe metiñe wo soo zôsô, wo ye dañe veban e duma été!
10 E nya ajôô, to’o jôm é mbe é bili duma melu mvus, é nga vaseban duma éte amu duma da dañe dili éte.
11 Amu nge jôm é mbe na ja man é nga veban a duma, ngumane ke jôme ja ye tabe nnôm éto ja ye dañe bi abui duma!
12 Amu bi bili avale ndi nlem éte, bia kobô fo’o teke ko woñ
13 a bi nji bo ane Moïse a nga bo, nnye a nga buti éfus éyé asu, na bone be Israël be bo te fombô nye ne tôéñ akekui memane ya jôm é mbe na ja jañ.
14 Ve fe’e jap é nga mane ndumekan amu, akekui môs ôte, éyé éte é mbe é tyele éyoñe nnôm élat a nga lañeban, amu éyé éte é mbe na ja vasebane fo’o ve a zene ya be Krist.
15 E nya ajôô, azukui môse wu, éyoñ ése ba lañe mintilane mi Moïse, éyé é butu be minlem.
16 Ve éyoñe môt a kôñelane nleme na a ke be Yéhôva* éyé é kôlô.
17 Yéhôva* a ne Nsisim, a vôme nsisime Yéhôva* ô ne, vôm ate fili é ne.
18 A bia bese, nté mesu mangane me nji bo mbutan, bia funane bengobô ya duma Yéhôva,* a bi tyendéya mfa’a ya éve’ela éte ébien ataté duma di akekui duma avok,* fo’o ve aval é nga boban a zene ya Yéhôva,* Nsisim.*
Notes
^ Lañe’e Atinane bifia.
^ Lañe’e Atinane bifia.
^ Lañe’e Atinane bifia.
^ Lañe’e Atinane bifia.
^ Nkobô Grec, “ataté duma akekui duma.”
^ Lañe’e Atinane bifia.
^ Be ne fe jô na, “a zene ya nsisime Yéhôva.”
