2 Becorinthien 5:1-21
5 Amu bia yeme na nge nda jangane ya si, nda éndelé nyi, ja yiane tyamban,* bi bili nda Zambe a nga lôñ asu dangan, nda é nji lôñeban a mo me bôt, é ne nnôm éto e yôp été.
2 Amu nda* ya si nyu été, bia tat a bi ne ôjeja’a ya nyiine nda ya yôp* été be nga lôñ asu dangan,
3 ndemben éyoñe bia nyiin été wôé, bia ye bo te bo nsoé.
4 Nya ajôô, bia bi ne nda éndelé éte bia tat a minleme mi tyele bia yôp nya abuii, amu bi nji kômbô kôlô nda nyi, ve bia kômbô nyiine nda fe, ndemben ényiñ é ne mine jôm é ne éwuwua.
5 Éyoñe ji, nyu a nga kômesane bia asu jam éte ébien a ne Zambe, nnye a nga ve bia nsisim ane ébane ya jôme ja yiane so.*
6 Nde bi bili ngule nleme kom ése a bia yeme na, nté ôse bi ngenane bi bili étaba’a jangane nyule nyina été, bi ne ôyap a Tate,
7 amu bia wulu a mbunan, sa ke a mame bia yen.
8 Ve bi bili ndi nlem, a bia kômbô tabe vôma wua a Tate, a lôte na bi tabe nyule jangan été.
9 Nde to’o bi ne nda jia a nye, to’o bi nji bo a nye, bia ve ngule jangan ése na bi yené mvo’é be nye.
10 Amu bia bese bia ye tebe* ôsu éto ntyi’ane mejô Krist, ndembene môt ase a ne bi ma’ane mé, avale mam a nga bo me ne, nté bi ne nyule nyina, to’o ma me ne mvaé, to’o ma me ne abé.*
11 Nde, amu bia yeme woñe Tate, bia ke ôsu a dutu bôt, ve Zambe a kôme yeme bia. Ve me too ndi nleme na, mone môte ya minleme mienan a kôme yeme bia.
12 Bi nji beta se’e biabebiene be mia, ve bia ve mia amu ya bo éngelezek ajô dangan, ndembene mi ne bo ngule ya yalane ba ba bo éngelezek ajô ya mame ma yené, ve sa ke ajô ya mame me ne nlem été.
13 Amu nge bi nga bo mekut, a mbe amu Zambe; a nge bi ne fek, a ne asu denan.
14 Amu nye’ane Krist wo tindi bia a ngul, amu jame di nde bi nga ba’ale na, môte wua a nga wu asu bôte bese; nde ñhe, bese be nga wu.
15 A Yésus a nga wu asu bese, ndembene ba ba nyiñ, ba yiane ke fe beta nyiñ asu bebien, ve asu nyu a nga wu asu dap a wômô miñwuan.
16 Nde ataté éyoñe ji, bia yene ki fe môt éziñ ane môta binam a yen. To’o na ôsusua bi nga nyoñe Krist nalé, éyoñe ji, nya ajôô, bia nyoñe ki fe nye nalé.
17 Nde, nge môt éziñ a wulu ba’aba’a a Krist, a ntoo mfefé ététéa; minnôme mi mame mi lôteya; tame yen! Mimfefé mi mame mi ntoo.
18 Mame mese ma so be Zambe, nnye a late ngbwa a bia a zene ya Krist, a a nga ve bia ésaé nkañete ja late ngbwa,
19 é ne na Zambe, a zene ya be Krist a nga late bôte ya si nyu ngbwa a émien, teke ve be mekua amu bikobe biap, nde a nga ve bia foé ya nlatane ngbwa.
20 Nde bi ne befol ayoñ éjiane Krist, ane nge Zambe a lôme mbañete a zene jangan. Aval ane bijiane bi Krist, bia ye’elane bôte na: “Za’a latané ngbwa a Zambe.”
21 Nyu a nji yeme nsem, a nga bo na a bo nsem* asu dangan, ndemben a zene jé bi ne bo zôsô mise me Zambe.
Notes
^ Nge ke, “jañ.”
^ Nge ke, “étaba’a.”
^ Nge ke, “étaba’a jangane ya yôp.”
^ Nge ke, “moné a ne nnaan; ndi ya jame da zu.”
^ Nge ke, “yené.”
^ Nge ke, “mbia be mam.”
^ Nge ke, “metuna’a ya nsem.”
