2 Bethessalonicien 2:1-17
2 Ve a bobejañ, mfa’a ya ntabane Tate Yésus Krist a ye bo a ntoo valé* a éyoñe bia ye bo nsamba a nye, bia ye’elane mia na
2 te mia bo avôle ya jañele fek, nge ke nyeñeban nge môt a zu mia kate mame méziñe me yené’é ve ane ma so be Zambe,* nge mejô me anyu, nge kalate éziñe bi yené’é ve ane bia so be bia, be jô’ô na môse Yéhôva* ô ntoo.
3 Môt a bo’o te yale mia fé a zen éziñ, amu bôte ba yiane taté wosane benya mejôô, a môt a wosan atiñ, a yiane taté yené, nnye a ne mone ya njañan.
4 A ne ñwosan a a bete émiene yôbe be môt ase a loobane na “zambe” nge ke jôme bôte be ne kañ. Jôme te nje a ke tabe temple Zambe été a jô bôt été na, émien a ntoo zambe.
5 Éyoñe bia be mia bi mbe bi ngenane nsamba, nga me nga kate mia mame mete?
6 Éyoñe ji, miabebiene mia yeme jam é ngenan é kama’ane nye na a yené ôsusua na éyoñe ja kpwaan.
7 É ne été na, den, bôte be nga wosane benya mejôô, ve ba bo de asoé; ba ye ke ôsu a bo de asoé akekui nyu a bili ngule ya kamane be na be yené a ye kôlô.
8 Éyoñe te nje môt a biasé atiñ a ye yené, nnye Tate Yésus a ye tyam a ngule ya mejô ma so nye anyu, a ye fe mane tyame mendeme mese me ne liti na môt ate a mbe a ntoo valé.*
9 Môt a biasé metiñ a ye bo a ntoo valé* a mimboone mi mame mi Satan, a zene ya mesimba a mendeme ya minsos a bitua bi mam*
10 a avale medu’an ése, asu ba ba ke njañan. Ma’ane map le, amu be nji kañese a nye’e benya mejôô be ne ve be ényiñ.
11 Jôme te nje Zambe a nga jô’é na mbia be asimesane be du’u be, a na be buni minsos,
12 asu na bese be bi mekua amu be nji buni benya mejôô, ve be nga yen ékotekote mvaé.
13 Ve a bobejañe Yéhôva* a nye’e, bi ne ntindane ya ve Zambe akiba kom ése, amu aso atata’a, Zambe a nga tobe mia na mi nyiñ éyoñ a nga fubu mia a nsisime wé, a mbunane mia buni benya mejôô.
14 A nga tobe mia na mi nyiiban a zene ya mbamba foé bia kañete mfa’a ya na mi bi duma ya be Tate wongane Yésus Krist.
15 Nde ñhe a bobejañ, teba’ané ne bip a kôme tôñe miñye’elane bi nga ve mia, to’o bi nga kate mia de anyu, to’o ke bi nga tili mia kalate.
16 Nde fe na, Tate Yésus Krist émien, ba Zambe Ésa wongan, mbe bete ba nye’e bia, be volô’ô bia minleme nnôm éto a ve bia ndi nlem a zene ya beta mvame wop,
17 be volô’ô fe mia minlem a bo na mi yeme ne zeñ* mfa’a ya mbamba mboon ase a mbamba nkobô ase.
Notes
^ Éfia Grec, “parousia.” Lañe’e Atinane bifia.
^ Nge ke, “a ngule ya nsisim.” Lañe’e Atinane bifia, “Nsisim.”
^ Lañe’e Atinane bifia.
^ Éfia Grec, “parousia.” Lañe’e Atinane bifia.
^ Éfia Grec, “parousia.” Lañe’e Atinane bifia.
^ Nge ke, “mame ma bo na bôte be kam.”
^ Lañe’e Atinane bifia.
^ Nge ke, “ve mia ngule nyul.”
