2 Jean 1:1-13
1 Ma, nnôme môt,* ma tili minga bôte ba semé a bone bé, mbe ma nye’e abui, sa ke ma étame ma nye’e mia, bôte bese be kañeseya benya mejôô fe ba nye’e mia,
2 amu benya mejôô be ne bia nlem été, a benya mejôô ba ye tabe été nnôm éto.
3 Zambe, nyu a ne Ésa ya yôp été, ba Mone wé Yésus Krist, ba ye ve bia beta mvam a mvam a mvo’é. Ba ye ve bia benya mejôô, ba ye fe nye’e bia.
4 Me ne mevak abui amu be nga kate ma na, bone bôé béziñe ba ke ôsu a tôñe benya mejôô, fo’o ve aval Ésa wongan a nga jô bia na bi bo.
5 Nde, a minga bôte ba semé, ma tili wo na bi nye’esan. (Me nji tili wo mfefé atiñ, atiñe ma tili wo é ne nnôm, ô nga wô’ô de aso atata’a.)
6 Nye’ane wo tinane na, bi ke ôsu a tôñe metiñe mé. Avale mi nga wôk aso atata’a, atiñe dé di: Mia yiane ke ôsu a nye’esan.
7 Amu bedu’u bôte be ntoo abui si nyu, môt a bene kañese na Yésus a nga nyoñe nyule minsôn éyoñ a nga zu si, nnye a ne ndu’u bôt a nsiñe Krist.
8 Taba’ané ntyele na mi sube bibotane ya ésaé ése bi nga bo be mia, ve va’ané ngule ya bi bibotane bite bise.
9 Môt ase a dañe minné, teke ke ôsu a tôñe miñye’elane mi Krist a nji bo mbo ésaé Zambe. Ve nyu a ke ôsu a tôñe miñye’elane mite, nnye ñhe a ne mbo ésaé Ésa a Mon.
10 Nge môt éziñ a zu be mia, teke ve mia ñye’elan ôte, te mia kañese nye menda menane nge batane nye.
11 Amu môt a batane nye, nnye fe a be’e mekua ya minseme mi môt ate.
12 Ma too fo’o me bili abui mame ya kate mia, ve me nji kômbô tili me afep, ve me too ndi na, ma ye zu yene mia, éyoñ éte bia ye laane bi lôane mesu asu na meva’a menane me jaé ne lut.
13 Bone be monyoñ, nyu a ne ntoban, ba batane wo.
Notes
^ Nge ke, “mvendé.”
