2 Pierre 2:1-22
2 Ve, bekulu mejô ya minsose ba ye tebe ézezañe bôt, a bivuse beye’ele bia ye fe bo zañe jenan. Bôte bete ba ye nyiñili miñye’elane mia soo metyama’ane asoé, a ba ye bele lume môt a nga kuse be mvus, a nalé a ye soo njañane wop été été.
2 Nde fe, abui da ye tôñe mvite mame jap teke wô’ô nyé nge ôson,* a amu bôte bete, ba ye kobô zene ya benya mejôô abé.
3 Nde fe, a ôzañ akume wop, ba ye jeñe mezene ya du’u mia a atyeñe bifia. Ve ntyi’ane mejô wop ô bobaneya den a ntoo ayap éyoñ, wo ye ke langan a njañane wop ô nji ke ôyo.
4 E nya ajôô, Zambe a nji jamé beéngele be nga bo nsem, ve a nga wua be Tartare* a futi be bengôkop,* a wua be édo’o dibi, e vôme ba yange ntyi’ane mejô.
5 A nji jamé nnôme si nyu, ve a nga ba’ale Noé, nkate foé ya zôsô, a nga nyii fe bôte zangbwal bevok éyoñ a nga soo ndône mendim e si nyu asu bôte ba biasé Zambe.
6 A nga bo na bitisone ya Sodome a Gomorrhe bi bo ve asup asup, a nga ve bie mekua, a liti’i ki bôte ba biasé Zambe éve’ela ya mame ma yange be.
7 A a nga nyii zôsôa môte Lot, nnye ate nlem ô mbe ô taé abui amu mvite mame teke wô’ô nyé nge ôson* bôte be nji be be tôñe’e metiñe be mbe be bo’o teke wô’ô nyé nge ôson,
8 amu môs ane môs, nleme zôsôa môt* ate ô mbe ô taék, éyoñ a mbe a yene’e a wô’ô mimboone mi bôte be mbe be tyame’e metiñ éyoñ a mbe a too ézezañe jap.
9 Nde ñhe, Yéhôva* a yem aval a vaa bôte ba ko nye woñe meve’ele été, ve a ba’ale bikotekote bi bôt asu awu* e môse ntyi’ane mejô,
10 e dañedañe ba ba jeñe na be ndamane minsône mi bôte bevok, a ba ba biasé éjôé.
Évô, a melo, bôte bete be ne te ko woñe ya kobô bitôto’o bi bôt abé,
11 ve jame da beéngele, akusa bo be ne biwôlô a ngul, be ne teke be ve mekua a mbia nkobô, amu ba semé* Yéhôva.*
12 Ve bôte bete be ne ane betite ya afan, mbe ba bo mame teke fas, a be nga bialé* na be bili a wôéban, ba kobô jame be nji yem ébiasé. Mbia mboone wop a ye dutu be awu,
13 ba ye tôbane ma’ane ya mbia abo dulu wop.
Ba nye’e be nyiñi ényiñe ya mimvôman, ja’a bizôñ amôs. Bôte bete be ne mebate ya éyé a bifele bi ne mbamba asu, mame mete ma liti miñye’elane medu’ane miap nté ba di a nyu a mia.
14 Be bili mise me too njalan a mejian a be se ngule ya kandan a nsem, a ba wone bôte* be nji yeme mbunan été. Be bili minleme mi ne njalan a minyamete. Be ne bone ya biyo’é.
15 Be nga jô’é zen é ne zôsô a tôñe mbia zen. Be nga tôñe zene Balaam, mone Béor, nnye a nga nye’e ma’ane ya mbia mboon,
16 ve nnye a nga bi minkomekan amu ntyamane metiñe wé. Tite ja be’e mimbe’e é ne teke kobô é nga kobô nye ane tyiñe môta binam, mfa’a ya kamane nkulu mejô na a bo akute jam.
17 Bôte bete be ne ane menjeñe me ne te mendim, be ne ane ndutuu ôkôse wo tindi, dibi é ne ne viu nje ja yange be.
18 Ba bo beta minkañete ya mengana bôte mi ne teke ndoñ. Be bela’ane minkômbane miap ya minsôn a mboone mam ô ne mvite teke wô’ô nyé nge ôson,* ba wone bôte be ndeme tube ba ba nyiñ ékop été.
19 Ba ka’ale be fili a too ki na bebiene be ne alo ya jôme ja ndaman; amu môt a ne éjôé nyu mbo’o si a ne ôlo wé.*
20 E nya ajôô, nge éyoñe bôte be fameya mvite mame ya émo ji a zene ya nya ñyemane mame ya Tate a Nkôté Yésus Krist, ba beta kañese na mame mete me jôé be, été bôte bete é ne nya abéé a lôte ji be mbe be taté’é tebe.
21 É mbe é dañe mva’é asu dap na, be bo te yeme nya zene ya zôsô a lôte na be yeme je, be su’ulane lum atiñ é ne étyi be nga nyoñe mvus.
22 Jam é nga kui be é ne di nkana ô ne zôsô ô nga jô na: “Mvu é bulaneya ndôlô’ô jé, a nyia ngôé be nga mane wo’o a bulaneya ke dumban ébata été.”
Notes
^ Éfia Grec, asélgéïa. Lañe’e Atinane bifia.
^ Lañe’e Atinane bifia.
^ Be ne fe jô na, “bibé.”
^ Éfia Grec, asélgéïa. Lañe’e Atinane bifia.
^ Éfia Grec, psukhê. Lañe’e Atinane bifia, “Ényiñ.”
^ Lañe’e Atinane bifia.
^ Nkobô Grec, “ntyi’iban.”
^ “amu ba semé.” Nge ke, “ôsu.”
^ Lañe’e Atinane bifia.
^ Nge ke, “be ne mbialan.”
^ Éfia Grec, psukhê. Lañe’e Atinane bifia, “Ényiñ.”
^ Éfia Grec, asélgéïa. Lañe’e Atinane bifia.
^ Nge ke, “môte jôm éziñe ja jôé nye a ne ôlo ya jôm éte.”
