Beéphésien 2:1-22
2 Nde fe, Zambe a nga bo na mi nyiñ, a too ke na mi mbe ñwuan amu bikobe bienan a minseme mienan
2 mi mbe mi bo’o melu mvus, éyoñe mi mbe mi tôñe’e fatan ényiñe* ya émo* ji, a tôñe masa ya mfebe, nsisime wo bo ésaé be bone ya melo.
3 Ôwé, nsamba a be, bia bese bi mbe bi wulu’u melu mvus, aval ane minkômbane ya minsône miangan, bi bo’o minkômbane ya minsône miangan a nkômbane ya asimesane dangan, bi mbe bone ya ayaa aso abialé, aval ane bôte bevok.
4 Ve Zambe, nnye ate a ne akume mfa’a ya nkoon éngôngol, a amu beta nye’an a nga nye’e bia,
5 a nga bo na bi nyiñe nsamba a tabe nlatan a Krist, to’o éyoñe bi mbe ñwuan amu bikobe biangan, mi nga nyiiban amu beta mvam.
6 Nde fe, a nga wômôlô bia nsamba, a toé bia nsamba e bito ya yôp, fufulu a Krist Yésus,
7 ndemben émo* ja zu a liti beta akume ya beta mvame wé, a mbamba nleme wé* asu dangan, bia bia wulu ba’aba’a a Krist Yésus.
8 A zene ya beta mvam ate mi nga nyiiban amu mbunan, a jam éte é nji boban amu mimboone mienane miabebien, ve a ne dase Zambe.
9 Momo, a nji bo amu mimboone mienan, ndembene môt éziñ a ne bo te bi amu ya bo éngelezek.
10 Amu bi ne ésaé ya mo mé,* a amu bi ne beyé’é be Krist Yésus, bi nga tébane na, bi bo mbamba be mame Zambe a nga mane jô ôsusua na bia yiane bo.
11 Ajô te simesa’ané na melu mvus, mia mi ne bôte ya meyoñe mfa’a ya mebialé, bôte be ne “ntyi’an atyel,” be mbe be lo’one mia na “te ntyi’an atyel,” ñwô ôte wo bobane minsôn a mo me môta binam.
12 Melu mete mi mbe te Krist, mi too ôyap a si ya Israël, beyeñe ya bilate ya ngaka’a; mi mbe te ndi nlem a te Zambe émo été.
13 Ve éyoñe ji fufulu a Krist Yésus, mia mi mbe ôyap ôsusua, mi ntoo bebé a zene ya metyi me Krist.
14 Amu a ne mvo’é jangan, nyi a nga bo na minsamba mi bôte mibaé mi bo nsamba wua, a nyi a nga bôé mfin ô mbe ézezañe jap.
15 A zene ya minsône mié, a nga mane tyame jôme ja bo na metyama’ane me kui, nge ke Metiñe me Moïse, mme mete me mbe me bili abui metiñe mfa’a ya bo na, minsamba mi bôte mibaé mia wulu ba’aba’a a nye, mi bo mfefé môte wua mfa’a ya bo mvo’é,
16 mfa’a ya na, minsamba mi bôte mibaé mi late ngbwa a Zambe a bo jôme jia a nyule jia a zene ya élé mintaé,* amu a nga wôé jôme ja bo na metyama’ane me kui a zene ya émien.
17 A nga so a kañete mbamba foé ya mvo’é be mia mi mbe ôyap a Zambe, a mvo’é be ba be mbe bebé a nye,
18 amu a ne a zene jé nje bia, minsamba mi bôte mibaé, bi ne ngule ya subu Ésa wongane bebé a zene ya nsisime wua.
19 Nde mi nji beta bo beyeñ a mintabe, ve mi ntoo bôte ya ayoñe da a mimfufup, a mi ntoo bibu’a ya nda bôte Zambe,
20 a mi nga lôñebane mbôka’a ya minlôman a bekulu mejô, nté Krist Yésus émien a ne mbôka’a ako’o ya jua.
21 Fufulu a nye, nda ése ja latebane nsamba a ja yaé na é bo temple a ne étyi asu Yéhôva.*
22 Fufulu a nye, mia fe mi nga lôñebane nsamba na mi bo vôme Zambe a too a zene ya nsisim.
Notes
^ Nge ke, “abo dulu.”
^ Lañe’e Atinane bifia, “Émo.”
^ Lañe’e Atinane bifia, “Émo.”
^ Nge ke, “anyebe dé.”
^ Nge ke, “nnye a nga té bia.”
^ Lañe’e Atinane bifia.
^ Lañe’e Atinane bifia.
