Behébreu 1:1-14
1 Abui biyoñ a abui mezen, Zambe a mbe a kobô’ô bemvamba bangane melu mvus a zene ya bekulu mejô.
2 Éyoñe ji, memane ya melu ma, a nga kobô bia a zene ya be Mone wé, nnye ate a nga telé nyoñe éli’i ya biôme bise, a a zene jé a nga té émo.*
3 A ne éfunane ya duma Zambe a éve’ela ya avale môt a ne, a ba’ale biôme bise a ngule ya mejô mé. A éyoñ a maneya tune minseme miangan, a nga tabe si mbo nnôme Nyu a dañe mbetane yôp.*
4 Nde a nga dañe beéngele aval é ne na, a nga bi éyôlé ja dañe mvaé a dañ énjap.
5 Éve’an é ne na, éngele mbé mfe Zambe a nga jô nye na: “Ô ne mone wom; den, me ntoo ésa wôé”? A na: “Ma ye bo ésa wé, a a ye bo mone wom”?
6 Ve éyoñ a nga beta soo Atyi’i mone dé na é zu nyiñe be bôte ya si va, a nga jô na: “Beéngele be Zambe bese be buti’i mesu map si ôsu wé.”*
7 Nde fe a jô mfa’a ya beéngele na: “A bo beéngele bé minsisim, a bebo bisaé bé nkaba’a nduan.”
8 Ve mfa’a ya Mon, a jô na: “Zambe a ne éto njôane jôé nnôm éto a nnôm éto, a ntume ya éjôé jôé ô ne ntume ya zôsô.*
9 Ô nga nye’e zôsô, a ô nga vini mbiasane metiñ. Jôme te nje Zambe, Zambe wôé a nga wo’o wo mbone ya mevak a dañe bôte bôé bevok.”
10 A: “Atata’a, A Tate, ô nga bôé mimbôka’a ya si, a yôp é ne ésaé ya mo môé.
11 Bia ye jañ, ve wo wo ye tabe; a fo’o ve ane éyé, bese ba ye ja ntuk,
12 a wo ye vuluku be aval ane alô’ô, a aval ane éyé ba ye tyendé, ve wo ô ne avale da, a mimbu miôé mia ye ke mane môs éziñ.”
13 Zambe a nji ke jô éngele mfe na: “Tabe’e si mbo nnôme wom, akekui ma telé besiñe bôé ane ételé mebo jôé”?
14 Ye bese be nji bo minsisim asu ésaé é ne étyi?* Ye be nji lômbane mfa’a ya ke saane ba bese ba yiane nyiiban?
Notes
^ Lañe’e Atinane bifia, “Émo.”
^ Nge ke, “Nyu a dañ éwôlô.”
^ Nge ke, “be liti’i nye ésemé.”
^ Nge ke, “ô ne zôsô.”
^ Nge ke, “ésaé ya volô bôt.”
