Behébreu 12:1-29
12 Ajô te nde, amu bi bili aval abui bizu’u bengaa da bômane bia di, ñwu’ané fe aval adit ése fé a nseme wo ji’a ndiñetane bia, a mmata’ané mbil ô ne bia ôsu a mbane ya jibi ôse,
2 nté bia beme mise be Nyu Zambe a nga tobe mfa’a ya volô bia na, bi bi mbunan ô ne ngumba, Yésus. Amu meva’a me mbe me yange’e nye, a nga jibi élé mintaé* akusa bo ôson, a a nga tabe si mbo nnôme ya éto njôane Zambe.
3 E nya ajôô, mi tuka’a fombô nyu a nga jibi avale mbia minkobô éte é so’o be bebo minsem, a zen éte be mbe be bo’o bebien abé, ndembene mi ne bo te bili atek a sili mo si.*
4 Éyoñe mia juan a nsem ôte, mi ngenane teke kui na mi dôngan akekui metyi menane ma sôéban.
5 A mi maneya vuane mejô a jô mia ane bone na: “A mone wom, te biasé melebe ma so be Yéhôva,* nde fe te sili mo si éyoñ a komekane wo;
6 amu Yéhôva* a lebe ba bese a nye’e, nde fe, a bôme* nyu ase a nyoñ ane mone wé.”
7 Mia yiane jibi melep* amu Zambe a sôane mia a zen éte. Zambe a nyoñe mia ane bone bé. Amu, ésa mbé a ne teke lebe mone wé?
8 Ve nge mi nji nyoñe melebe mete aval ane bia bese bi nga nyoñe me, mi nji bo bone bé, mi ne bone ya mejian.
9 Nde fe, beésa bangane be ne bôte biname be nga jaé lebe bia, a bi mbe bi semene be. Nga bia yiane dañe tabe nkômesane ya sili biabebiene si e be Ésa ya ényiñe jangane ya nsisim a nyiñ?
10 Amu be mbe be lebe’e bia asu étun éyoñ, a lat a jame be mbe be yene’e mvaé, ve nye a bo de asu mfi wongan, ndembene bi ne bo mfuban ane nye.
11 E nya ajôô, teke melebe méziñe ma yené ane jame ya mevak éyoñe ma veban, ve a ne jame da bo mintaé;* wôna mvuse ya valé ma wume bibuma ya mvo’é, mbie bi ne zôsô be ba be nga kañese yañeleban a zen éte.
12 Ajô te, mi wônô’ô mo me nga jombô si, a meboñe me ntoo nte’an,
13 a mi ke ôsu a sôane mezen asu mebo menan, ndemben ébu’a ya nyul é ne éyem é ne bo te tyelan, ve é ne yet.
14 Tôñesa’ané mvo’é a bôte bese, a mfuban, ñwô ôte nge ô jemban, teke môt a ye yene Tate.
15 Taba’ané ntyele na, môt éziñ a bo teke sube beta mvame Zambe, ndembene nkañ éziñ ô ne nsul ô ne bo te faa a soo jo’ojo’o, a bo na abui bôt é bo mvit a zen éte;
16 taba’ané fe ntyele na zañe jenan, mi bo te bi môt a bo mvite mame ya bisôk,* nge nyu a biasé mame me ne étyi ane Ésaü, nnye a nga kuan éto ntôle jé amu éseñe bidi jia.
17 Amu mia yeme na mvuse ya valé, éyoñ a nga beta yi na a nyoñe bibotan, be nga titane nye; amu akusa bo a nga ye’elan ésa* a mili’i mis, jam éte é nji volô jôm.
18 Amu mi nji ke subu jôme ba nambe bebé, a jôme ja yôñe nduan, nge nkut ô ne évindi, nge dibi é ne ne viu, nge ôkôs,
19 nge nloñane toñ, nge tyiñ é kobô’ô, nje éte éyoñe be nga wôk, bôte be nga ye’elane na be bo teke beta wô’ô tyiñ éte.
20 Amu be nji be ve tôñ atiñ é mbe é jô’ô na: “To’o ve nge tite ja nambe nkôl, ba yiane je lume mekok.”
21 Nde fe, jam éte é mbe éko woñ aval é ne na, Moïse a nga jô na: “Ma ko woñ a ma nyeñeban.”
22 Ve mi nga subu nkôle Sion bebé a tisone vevea Zambe, Jérusalem ya yôp, a bizu’u* beéngele,
23 bese mfula’ane a ékôane bekristene ya ntôle mon ô nga betebane yôp, a Zambe, Nyu a tyi’i bôte bese mejô. A ényiñe ya nsisim é ne asu bezôsô be ntoo teke ayeñ,
24 a Yésus, ntebe zañe ya mfefé élat, a mmiamane metyi wo kobô mvo’é a lôte metyi me Abel.
25 Taba’ané ntyele ya bene vô’ôlô* nyu a kobô. Amu nge ba be nga bene vô’ôlô nyu a mbe a va’a bôte ya si mebendé ma so be Zambe, be nji fam, abim avé bia ye bo te fame nge bia lume nyu a kobô a so’o yôbe mvus!
26 Éyoñ éte tyiñe jé é nga fô’ô si, ve a nga ka’ale na: “Éyoñ éfe ma ye beta bo, sa ve na si nje étam é fô’ôsan, ve yôbe fe.”
27 Bifia “éyoñ éfe” bia liti na Zambe a ye vaa biôm a nga fô’ô, biôme bite bi nji bo bi a nga té, ndembene biôm a nga té bi nji fô’ôsane bi ne ke ôsu a tabe.
28 Ajô te, mbôle bia yiane nyoñ éjôé é vo’o fô’ôsan, nkelané ôsu a nyoñe beta mvam, na Zambe a kañese ésaé é ne étyi bia bo nye bi ko woñ, bi nyeñeba’an.
29 Amu Zambe wongan a ne nduane ja di’i.
Notes
^ Lañe’e Atinane bifia.
^ Nge ke, “ku som e minleme mienan été.”
^ Lañe’e Atinane bifia.
^ Lañe’e Atinane bifia.
^ Nge ke, “foñôsô.”
^ Nge ke, “ñyañelan.”
^ Nge ke, “ôlun.”
^ Lañe’e Atinane bifia, “Mvite mame ya bisôk.”
^ Nalé a tinane na, ésa a tyendé ôsimesan.
^ Nge ke, “betoyini mewôm.”
^ Nge ke, “jeñ atyebe; bo ve ane mi nji yen.”
