Behébreu 7:1-28
7 Amu Melkisédek nyi, njô bôte ya Salem, prêtre ya Zambe a dañe mbetane yôp, a nga ke tôban Abraham na a botane nye a bula’ane ndañane ya bita a nga bo a bejô bôt,
2 a Abraham a nga ve* nye ngap awômô ya biôme bise. Di ôsusua, éyôlé jé ja tinane na, “Njôô ya zôsô,” mvuse ya valé, a ne fe njô bôte ya Salem, nalé a tinane na, “Njô bôte ya mvo’é.”
3 A too te ésa, te nyia, te éndan, teke atata’a ya melu nge memane ya ényiñ, ve a nga funane Mona Zambe, a a ne prêtre biyoñe bise.*
4 Tama yenané aval éwôlô môte nyu Abraham, ntebe ôsu* ya nda bôt, a nga ve ngap awômô ya mbamba be biôm a mbe a bili.
5 E nya ajôô, avale Metiñe me Moïse ma jô, bone be Lévi be mbe beprêtre, be mbe be bili ôva’a ngule ya nyoñe ngap awômô* ya biôme bôte ba ve, nalé a tinane na, be bobenyañe bap, to’o bobenyañe bap bete be mbe mvoñe bôt Abraham.
6 Ve môte nyi, nnye ate éndan é nji be é lañeba’an akekui be be, a nga nyoñe ngap awômô be Abraham, a botane nyu a mbe a bili bengaka’a.
7 Éyoñe ji, teke bisô na, nyu a dañe tyôtyoé a nyoñe bibotan a zene ya nyu a dañ éwôlô.
8 Mfa’a wu, bôte be ne wu mbe ñhe ba nyoñe ngap awômô, ve mfa’a ôvok, a ne môte ba bo’olô na a ne vevee.
9 Nde fe, bi ne jô na, ja’a Lévi nnye ate a nga nyoñe ngap awômô, a nga ya’ane ngap awômô a zene ya Abraham.
10 Amu a mbe a ngenane mon a yiane bialé* mvoñe bôt Abraham, mvamba wé, éyoñe Melkisédek a nga ke tôbane nye.
11 Nde, nge môt a ne bo teke ayeñ a zene ya ésaé prêtre belévite (amu é mbe jam é nga veban a zene ya Metiñe me Moïse asu bôt), mfi ôvé ô mbe ñhe na prêtre mfe a so, nnye ate be nga jô na a ne ane Melkisédek sa ke ane Aaron?
12 Amu mbôl ésaé prêtre é nga tyendé, da sili fe na Metiñe me Moïse me tyendé.
13 Amu môte mame ma ma fombô, a ne môte ya ayoñ afe, ayoñ ébu’a éziñe ya été é nji bo ésaé autel.
14 Amu da kôme yené ne ngeññ na, Tate wongan a ne môte ya ayoñe Juda, a too ke na Moïse a nji jô jam éziñ ajô ya beprêtre ba so ayoñ éte.
15 A jam éte é nga kôme yené éyoñe prêtre mfe a nga so a too ane Melkisédek,
16 nnye a nga bo ane nye, sa ke a atiñe ya avuman, ve a ngule ya ényiñ é vo’o ki ndaman.
17 Amu é ne njôane mfa’a wé éfus éziñe na: “Ô ne prêtre ya nnôm éto a nnôm éto aval ane Melkisédek.”
18 Nde ñhe, nnôma atiñ a nga tyamban amu a ne nte’an a teke ndoñ.
19 Amu Metiñe me Moïse me nji bo jôm éziñe na é bo ne seleñ, ve ndi nleme ja dañe mvaé Zambe a nga ve bia é nga bo de, nje ja bo na bi subu Zambe bebé.
20 Nde fe, amu jam éte é nji be ve bobane teke ngana
21 (amu bôte béziñe be nga bo beprêtre teke kane ngana, ve nyili ate a nga bo prêtre a ngana môt a nga kan a jô’ô na: “Yéhôva* a nga kane ngana a a vo’o ki tyendé ôsimesan,* ‘Ô ne prêtre nnôm éto a nnôm éto’”),
22 Yésus a nga bo fo’o ndeme ja liti na élate ja dañe mvaé a lôte ji é nga taté be ja ye fo’o tôéban.
23 Nde fe, abui bôt é nga bo beprêtre mvuse bôte bevok, amu awu é nga kamane be na be kee ésaé éte ôsu,
24 ve amu a ke ôsu a nyiñe nnôm éto a nnôm éto, éto prêtre jé ja ye bo te ke be môte mfe.
25 Nde a ne fe ngule ya nyii nya nyiiane ba ba ke be Zambe a zene jé, amu a ne kom ése vevee na a ye’elan ajô dap.
26 Amu avale beta prêtre éte nde é mbe é yiane bia, nyu a ne zôsô, teke bijô, teke ayeñ, a too nkandan a bebo minsem, a too fe mbetane yôp été.
27 Beta prêtre, nyu a selane ba bevok, amu a nji sili na a ve metuna’a môs ôse asu minseme mié mibien, mvuse ya valé mi mi bôt, amu a nga bo de éyoñe jia ya biyoñe bise, éyoñ a nga ve émiene metuna’a.
28 Amu Metiñe me Moïse me nga telé bôte be mbe be bo’o bikobe beta beprêtre, ve atiñe ya ngana a nga kane mvuse Metiñe me Moïse, é nga telé Mon, a bo nye teke ayeñe nnôm éto a nnôm éto.
Notes
^ Nkobô Grec, “kandé.”
^ Nge ke, “nnôm éto.”
^ Nkobô Grec, “nlô.”
^ Nkobô Grec, “ntolo.”
^ Nkobô Grec, “miñya été.”
^ Lañe’e Atinane bifia.
^ Nge ke, “a vo’o ke jôban.”
