Behébreu 8:1-13
8 Nlô ajô ya jame ma jô ô ne na: Bi bili beta prêtre ane nyuli, a a too si mbo nnôm éto njôane beta Zambe e yôp été,
2 a ne mbo ésaé* ya vôm a ne étyi a nyi ya nya ndaa éndelé, nnye ate Yéhôva* a nga kôm, sa ke môta binam.
3 Amu beta prêtre ase a tebe mfa’a ya bo mimvean a mfa’a ya ve metuna’a; ajô te, é mbe é sili’i na, nyuli ate fe a bi jôme ya ve metuna’a.
4 Nge a mbe si va, a nji ke ye bo prêtre, amu e zu koone na abui bôt é mbe é va’a mimvean avale Metiñe me Moïse me mbe me jô’ô.
5 Bôte bete ba bo ésaé é ne étyi be tôñe’e éve’ela a nsisiñe ya mame ya yôp; fo’o ve ane Moïse, éyoñ a mbe bebé ya lôñe nda éndelé, Zambe a nga ve nye atiñe na: Amu a jô na: “Va’ané ngule ya bo mame mese aval ane éve’ela jap be nga liti mia nkôle yôp.”
6 Ve éyoñe ji, Yésus a biya ésaé ja dañe bisaé bise, amu a ntoo fe ntebe zañe ya élate ja dañe mvaé, nje éte mbôka’a ô ne mbamba bengaka’a.
7 Nge élat ôsu é mbe teke ayeñ, ji baa é nji ke ye beta sili.
8 Amu a komekane bôt éyoñ a jô na: “‘Tama yenan! Melu ma zu,’ nne Yéhôva* a jô nalé, ‘éyoñe ma ye bo mfefé élat a nda Israël a nda Juda.
9 A ye ke bo ane élate me nga bo a bemvamba bap, môse me nga bi be wo, a vaa be si ya Égypte, amu be nji ba’ale élate jam, ajô te, me nji ke ôsu a nyoñe ngap a be,’ nne Yéhôva* a jô nalé.
10 “‘Amu, nyina a ne élate ma ye bo a nda Israël éyoñe melu me lôteya,’ nne Yéhôva* a jô nalé. ‘Ma ye futi metiñe mam asimesane dap a tili me minleme miap été. Ma ye bo Zambe wop, a ba ye bo bôte bam.
11 “‘A môt a ye ke beta ye’ele nyu mbok a monyañe wé, a jô’ô na: “Yema’ané Yéhôva!”* Amu bese ba ye yeme ma, ataté bone be bôt akekui beta be bôt.
12 Amu ma ye jamé bikobe biap a ma ye ke beta simesane minseme miap.’”
13 Éyoñ a nga jô na “mfefé élat,” a nga bo na, ji ôsu é bo nnôm. Éyoñe ji, jôm é lôteya éyoñ é ntoo nnôm a é ntoo bebé ya jañ.
Notes
^ Nge ke, “môt a saé asu bôt.”
^ Lañe’e Atinane bifia.
^ Lañe’e Atinane bifia.
^ Lañe’e Atinane bifia.
^ Lañe’e Atinane bifia.
^ Lañe’e Atinane bifia.