Becolossien 2:1-23
2 Ma yi na mi yeme ngule mewosane ma wosan asu denan, asu bekristene ya Laodicée, a asu ba bese be ngenane teke yene ma.*
2 Jame ma sôñ é ne na, be bi mvolane minlem, a bo nlatane nye’an été. A zen éte ba ye tabe ndi a mame be nga wô’ô nya ñwô’ane, ba ye yeme nsolane jame Zambe ô ne étyi, ñwô ô ne Krist.
3 Bidima bi mame bise ya fek a ñyemane bi solô be nye.
4 Ma kate mia mame ma na môt éziñ a bo te zu du’u mia a atyeñe bifia.
5 É ne été na, me nji bo a mia minsôn, ve me ne a mia nsisim, a ma vak amu mi ne mvo’é a amu mi tele ne bip mfa’a ya mbunane mi bili be Krist.
6 Nde, avale mi nga kañese Tate Yésus Krist, kelané ôsu a wulu ba’aba’a a nye,
7 fo’o ve avale mi nga yé’é. Mbunane wônane mi bili be Krist wo yiane bo na mi bo ngul a tebe ne bip, ane minkañe mi élé mi beme si été. Mbunane wônane wo yiane fuluku éyoñ ése mia ve Zambe akiba.
8 Taba’ané ntyele na, môt éziñ a nyoñe mia minkôm* a zene ya fe’e ja so be môta binam, a zezé medu’ane ya metume me bone be bôt, a miñye’elane ya émo, sa ke miñye’elane mi Krist.
9 Amu mefulu me Zambe mese ma kôme yené be Krist.
10 Nde fe, mi nji jembane jôm éziñ a zene ya be nye, nyu a ne njôô* ya bijôé bise.
11 Mia fe, mi nga tyi’iban atyel a zene ya élat é ne zañe mia be nye, ntyi’an atyel ô nji boban a mo, ane wu ya minsôn, ve wu wo boban a zene ya be Krist.
12 Mi nga jambe a nye a zene ya nduane wé. Amu mi mbe nlatan a nye nde fe mi nga buni mame Zambe a nga bo a ngule jé, ane mi nga wômô a nye. Ôwé, Zambe a nga wômôlô nye miñwuan.
13 Mi mbe miñwuan amu bikobe bienan, amu mi mbe teke ntyi’an atyele mfa’a ya minsôn, Zambe a nga nyii mia a nye. A nga jamé bia bikobe biangane bise a mbamba nlem
14 a nga tyame kalate be nga tili a mo, nnye ate a mbe a wosa’ane bia. A nga bo de éyoñe be nga bômôlô nye élé mintaé* yôp.
15 A zene ya élé mintaé,* a nga dañe bijôé a bôte ba jôé, a nga liti fe bôte bese na a dañeya be a zene ya dulu ya medañ.
16 Nde, te mia kañese na môt éziñ a tyi’i mia mejô a lat a jôme ya di, nge jôme ya nyu, nge beta abôk, nge abô’ô ya meté me ngon, nge sabbat;
17 biôme bite bise bi ne nsisiñe ya mame ma zu ôsu, ve benya mame be ne be Krist.
18 Te mia kañese na bôte ba nye’e évus éjote nyul a ékaña’a beéngele be bo na mi sube ma’ane menan. Bôte bete ba “fak”* mame be nga yen; be ne mvusan a mebun asimesane dap ya minsôn été a too ke na be nji bi nya amuu ya bo nalé,
19 a be nji ke ôsu a tabe nlatan a nlô, ñwô ôte wo bo na nyul ése é bi jôme ya di. Nde fe ô ne nlatan a nyul ése a zene ya minsis a bone minsis. Nalé a bo na a ngule Zambe, nyul ése é yaé.
20 Nge mi nga wu a Krist mfa’a ya zezé mame ya si nyu, amu jé mia ke ôsu a nyiñ ane nge mi ne bôte ya si nyu mi tôñe’e minjôane mi:
21 “Te nyoñ, te tyek, te nambe?”
22 Amu mame mete me ne mame ma ye bo momo amu ba belane me a minjôane mite mmie mi ne miñye’elane ya bôt.
23 Akusa bo mame mete ma yené ve ane me ne mvaé, mame mete me tii a ékaña’a môt émien a nga top. Ma bo na a yené ve ane a ne éjote nyul, ma tibili fe nyule jé, ve me nji volô nye na a wosane minkômbane ya minsôn.
Notes
^ Nkobô Grec, “teke yen asu dame minsôn.”
^ Nge ke, “fete mia mimbôk.”
^ Nkobô Grec, “nlô.”
^ Lañe’e Atinane bifia.
^ Be ne fe jô na, “A zene ya be nye.”
^ Nge ke, “fas.” Bi nga nyoñ éfia éte kalate ba loone fulasi na rites (initiatiques) des mystères païens.
