Begalate 1:1-24
1 Ma Paul, nlôman, sa ke amu nkômbane bôte nge a zene ya môt, ve a zene ya be Yésus Krist a Zambe Ésa wongan a nga wômôlô nye miñwuan,
2 nsamba a bobejañe bese be ne a ma, ma tili bikôane bekristene* ya Galatie:
3 Beta mvam a mvo’é Zambe Ésa wongan a Tate wongane Yésus Krist bi tabe’e be mia.
4 A nga ve émien asu minseme miangan, ndembene bi nyiibane mfa’a ya mbia émo* nyi aval ane nkômbane Zambe a Ésa wongan ô ne;
5 duma é bo’o be nye nnôm éto a nnôm éto. Amen.
6 Ma semé fo’o na, mi ji’aya ke lume memvuse menane be Nyu a nga loone mia beta mvame Krist, a tôñe fatane mbamba foé fe.
7 Sa ke na mbamba foé mfe a ne, ve bôte béziñe ba ndumekane mia minlô a ba kômbô toñekane mbamba foé ajô Krist.
8 Ve jame da, nge môte wua ya be mia nge éngele éziñ a so yôp a kañete mia mbamba foé a sela’ane nyu bi nga kañete mia, biyo’é a nye.
9 Avale bi tateya de jô, ma beta ba’alane na, nyu ase a kate mbamba foé a selane nyu mi nga kañese, biyo’é bi bo’o a nye.
10 Nya ajôô, ye bôte mbe me nga jeñe na me dutu, ye Zambe? Nge ke na, ye ma jeñe na me yené mvaé mise me bôt? Nge ma jeñe na me ke ôsu a yené mvaé mise me bôt, ma ye ke bo ôlo Krist.
11 Ma yi na mi yem a bobejañ, na mbamba foé me nga kañete mia a nji be a so’o be bôt;
12 amu sa ke môte nnye a nga ve ma mbamba foé ate, nge na môte nnye a nga ye’ele ma nye, ve me nga yeme nye a zene ya jame Yésus Krist a nga liti ma.
13 É ne fo’o été na, mi nga wôk avale ntabane me mbe me bili melu mvuse ñyebe bejuif, a aval avé me nga ve ngule* ya tibili ékôane Zambe a bo je mbia be mam;
14 a mfa’a ya tôñe mame ya ñyebe bejuif, me mbe me dañe’e bôte bese ya ayoñe dame be mbe ôkala wom, a me mbe ayôñe mfa’a ya kamane metume ya beésa bam.
15 Ve éyoñe Zambe, nnye ate a nga vaa ma abume be nyia wom, a nga loone ma a zene ya beta mvame wé a nga yene mvaé
16 ya liti Mone wé a zene jam, asu na me kañete bôte ya meyoñe mbamba foé mfa’a wé, môt éziñ* a nji lebe ma été été.
17 Nde fe, me nji bete Jérusalem na me ke yene ba be nga taté bo minlôman a ma, ve me nga ke Arabie éyoñe te me nga bulane Damas.
18 Mvuse mimbu milal, me nga bete Jérusalem na ma ke jome Céphas* a me nga tabe a nye melu 15.
19 Ve me nji tôbane nlôman ôfe, ane ô vaa ve Jacques monyañe Tate.
20 Wôna, mfa’a ya mame mese ma tili mia, Zambe a ne ngaa na mame ma tili mia me ne été.
21 Mvuse ya valé, me nga ke minlam a bitisone ya Syrie a Cilicie.
22 Ve bikôane bekristene ya Judée bi mbe bi wulu’u ba’aba’a a Krist bi nji be bi yeme’e ma.
23 Bi nga jaé wô’ô ve na: “Môt a mbe a taté’é bia tibili, éyoñe ji, a nga kañete ajô ya mbamba foé ya mbunan a mbe a jeñe’e na a ndaman.”
24 Ane be nga taté na ba ve Zambe duma amu ma.
Notes
^ Nge ke, “mekônda; bekirké.”
^ Lañe’e Atinane bifia, “Émo.”
^ Nkobô Grec, “me nga beté ôdo’é a ke ôsu a.”
^ Nkobô Grec, “nsôn a metyi.”
^ Nnye be mbe fe be lo’one na Pierre.
