Begalate 3:1-29
-
Mimboone ya mbunan a mimboone ya Metiñe me Moïse (1-14)
-
Zôsôa môt a ye nyiñ amu mbunan (11)
-
-
Ngaka’a Abraham é nji bo na Metiñe me Moïse me bo momo (15-18)
-
Mvoñe bôt Abraham é ne Krist (16)
-
-
Metiñe me Moïse: vôme ma so a jôme ma sôñ (19-25)
-
Bone be Zambe a zene ya mbunan (26-29)
-
Mvoñe bôt Abraham é ne bôte be ne a Krist (29)
-
3 A mekute bekristene ya Galatie! Za a nga toé mia éjôé mbia môte si, mia be nga kôme kat aval avé be nga tyelé Yésus élé?
2 Jame da ma kômbô mia sili* nde di: Ye mi nga nyoñe nsisim a zene ya mame ya Metiñe me Moïse, nge na, a ne amu mi nga buni mbamba foé mi nga wôk?
3 Za avale mekute mi ne di? Ye mia taté a nsisime* mi ke man a minsôn?*
4 Ye mi nga jibi abime minju’u di zezé? Nge a mbe fo’o jam é ne zezé.
5 Ajô te, ye nyu a ve mia nsisim a bo mesimba zañe jenan a bo de amu mia tôñe Metiñe me Moïse, nge ke amu mbunane mi nga buni mbamba foé mi nga wôk?
6 Fo’o ve aval Abraham “a nga buni Yéhôva* a lañeban ane zôsôa môt.”
7 Mia kôme yeme na, ba be bili mbunane mbe be ne bone be Abraham.
8 Éyoñe ji a zene ya mintilane mié, Zambe a nga jô melu mvuse na a ye ve bôte ya meyoñe mekabe na be ne zôsô a zene ya mbunan, nde a nga kat Abraham mbamba foé melu mvus a jô’ô na: “A zene jôé meyoñe mese ma ye bi bibotan.”
9 Nde bôte ba buni be bili bibotane nsamba a Abraham, nnye ate a nga buni.
10 Bôte bese ba tabe Metiñe me Moïse si be bili biyo’é, amu é ne ntilane na: “Biyo’é a nyu ase a ke ôsu a tabe ndi a mintilane mise mi ne mvulukan e kalate ya Metiñe me Moïse ve a teke me tôñ.”
11 Nde fe, da kôme yené na môt a ye ke bi mekabe na a ne zôsô e mise me Zambe a zene ya Metiñe me Moïse, amu “zôsôa môt a ye nyiñ amu mbunan.”
12 Mbôka’a ya Metiñe me Moïse ô nji bo mbunan, ve ma viane jô ve na, “nyu a bo mame ma a ye nyiñ a zene ya mame mete.”
13 Krist a nga kuse bia a kôté bia biyo’é ya Metiñe me Moïse, amu a nga bo biyo’é asu dangan, amu é ne ntilane na: “Biyo’é a môt ase ba tyelé élé yôp.”
14 Nalé a nga boban asu na, meyoñe me nyoñe bibotane be nga kak Abraham a zene ya be Krist Yésus, ndembene bi ne nyoñe ngaka’a ya nsisim a zene ya mbunane wongan.
15 A bobejañ, ma kobô me bela’ane bive’ela bi môta biname na: Éyoñ élat é bobaneya, to’o ja te boban a zene ya be môta binam, teke môt a ne tyame je nge kô’ôlane jôm éziñ été.
16 Bengaka’a be mbe be fombô’ô Abraham a mvoñe bôte jé. É nji jôbane na, “a asu memvoñe me bôt,” fo’o ve ane me ne abui. Ve a jô na, “a asu mvoñe bôte jôé,” nalé a liti na a ne ve jia nje é ne Krist.
17 Nde fe, ma beta jô jame di na: Metiñe me Moïse, mme mete me nga so mvuse mimbu 430, me nji tyam élate Zambe a mbe a maneya bo, fo’o ve ane ma tyame ngaka’a.
18 Amu nge élik é nga nyoñeban a zene ya Metiñe me Moïse, a nji beta bo a zene ya ngaka’a; ve Zambe a nga ve je Abraham a mbamba nkômban ase a zene ya ngaka’a.
19 Nde, amu jé Metiñe me Moïse me nga veban? Be nga kô’ôlane me mfa’a ya bo na, mintyamane metiñe mi kôme yené ne fômelé akekui éyoñe mvoñe bôte ngaka’a é nga bobane ja ye so; a metiñe mete me nga veban a zene ya beéngele a wo ya be ntebe zañ.
20 Ntebe zañ a nji bo éyoñe môte wua étam a bo élat, ve Zambe a ne ve wuwua.
21 Nde, ye Metiñe me Moïse ma wosane bengaka’a be Zambe? Teké’é fo’o! Amu nge atiñ é nga veban é ne ngule ya ve ényiñ, bi ntoo ngule ya lañebane na bi ne zôsô amu bia tôñ atiñ éte.
22 Ve Mejô me Zambe me nga futi biôme bise éjôé nseme si, ndembene ba be bili mbunane be ne bi mbamba be mame be nga ka’ale asu ba ba liti mbunane be Yésus.
23 Ve ôsusua na mbunane wo suan, bi nga be Metiñe me Moïse si, me kele’e ma ya’ale bia, bi yange’e na mbunan ô yené.
24 Nde Metiñe me Moïse me nga bo mba’ale* wongan a kee bia be Krist, ndembene bi ne bi mekabe na bi ne zôsô a zene ya mbunan.
25 Ve éyoñe ji mbunan ô suaneya, bi nji beta bo éjôé mba’ale* si.
26 Nde, mia bese mi ne bone be Zambe a zene ya mbunane mia buni Yésus Krist.
27 Amu mia bese mi nga duban e Krist été mi nga jaé Krist.
28 Teke mone juif nge mone grec, teke ôlo nge fili môt, teke fame nge minga, amu mia bese mi ne jôme jia a Yésus Krist.
29 Nde fe, nge mi ne ba be Krist, mi ne fo’o mvoñe bôt Abraham, bôte ba ye nyoñe jôme be nga ka’a be.
Notes
^ Nkobô Grec, “yem.”
^ Nge ke, “mbile ya nsisim.”
^ Nge ke, “mbile ya minsôn.”
^ Lañe’e Atinane bifia.
^ Nge ke, “ñye’ele.”
^ Nge ke, “ñye’ele.”
