Luc 20:1-47
20 A nga bo na, môs éziñe nté a mbe a ye’ele’e bôte Temple a kañete mbamba foé, bejôô beprêtre a bescribe a bemvendé ya ayoñe be nga so,
2 a jô nye na: “Kate’e bia, wo soo ngule ya bo mame ma vé? Nge ke na, za a ve wo ngule ya bo mame ma mese?”
3 A nga yalane be na: “Ma fe ma zu sili mia nsili, a mia ye yalane ma:
4 Nduane Jean ô nga so vé, ye yôp, ye be bôt?”*
5 Ane be nga taté na ba kobô be be, be jô’ô na: “Nge bi jô na, ‘Ô nga so yôp,’ a ye sili bia na, ‘Amu jé mi nji buni nye?’
6 Ve nge bi jô na, ‘Ô nga so be bôt,’ bôte bese ba ye lume bia mekok, amu ba yeme na Jean a mbe nkulu mejô.”
7 Nde be nga yalane na be nji yeme vôme wo so.
8 Yésus a nga yalane be na: “Ma fe, ma kate ke mia vôme ma soo ngule ma bo je mame ma.”
9 Ane a nga taté na, a kobô bôt a bela’an éve’ane ji: “Môt éziñ a nga bé afube mindik, a li’i* bebé mefube na be ba’ale de, ane a nga ke dulu vôm a ne ôyabe tañ ayap éyoñ.
10 Éyoñ éyoñe ya kolé bibuma é nga kui, nde a nga lôm ôlo wé na ô ke nyoñ abime bibuma éziñe ya afube mindi’i be be. Ve bebé mefup, éyoñe be maneya yite wô, be nga titane wô teke jôme mo.
11 Ve a nga beta lôm ôlo ôfe. Wuli ôte fe be nga bôme wô a samele wô, a jô wô na ô bulane teke jôme mo.
12 Ve a nga beta lôme wu lale; wuli ôte fe be nga balé wô meveñ a titane wô.
13 Ane miene afube mindik a nga jô émiene na, ‘Jé me bo? Ma zu lôme mone wom, nyu ma dañe nye’e. Ma buni na ba ye semé nye.’
14 Éyoñe bebé mefube be nga yene nye a za’ak, be nga taté na ba kobô be be, be jô’ô na, ‘Môte ba ye ve éli’i le a zu, ñwôané nye na éli’i ji é bo énjangan.’
15 Ane be nga wua nye afube mindik atan a wôé nye. Nde jé nje môt a ne afube mindik a ye bo be?
16 A ye so a wôé bebé mefube bete, a ve bôte befe afube mindik.”
Éyoñe be nga wô’ô de, be nga jô na: “Nalé a vo’o ke boban!”
17 Ve a nga fombô be mis été a sili na: “Nde jam é ne ntilane di da tinan aya: ‘Ako’o belôñe menda be nga ben, nde é nga su’ulane bo nlô ako’o ya jua?’*
18 Môt ase a ye ku akok éte yôp a ye bu’i, a nyu ase akok éte da ye ku yôp, da ye nyose nye.”
19 Ane bescribe a bejôô beprêtre be nga jeñe na ba bi nye awolo éte ébien, ve be nga ko bôte woñ, amu be nga yemelane na mbe a mbe a jô’ô be éve’an a nga nyoñ.
20 A éyoñe be maneya fombô nye ne tôéñ, be nga lôme bôt asoé na be bo ve ane be ne zôsô, mfa’a ya bôndé fe’e ya bi nye a zene ya mam a ye jô na be kee nye éjôé a be ngovina.*
21 A be nga jô nye na: “A Ñye’ele, bia yeme na wo kobô a wo ye’ele avale da yian, a ô nji bo ôbangam, ve wo ye’ele bôte mejô me Zambe e zôsô été:
22 Ye atiñe da kañese* na bi ya’ane César toya ye momo?”
23 Ve a nga yemelane fe’e medu’ane jap, a jô be na:
24 “Lita’ané ma denier* wua. Asu za é ne nkañane va a jam é ne ntilane va da fombô za?” Be nga yalane na: “César.”
25 A nga jô be na: “Nde, bula’ané César biôme bi César, ve Zambe biôme bi Zambe.”
26 Be nji be ngule ya bi nye bifia bôt été, ve be mbe fe’e ne vema a éyalane jé, be nga ku bivôl.
27 Ve besadducéen béziñ, mbe bete ba jô na ñwomane miñwuan ô nji bo, be nga zu yene nye a sili nye na:
28 “A Ñye’ele, Moïse a nga tili bia na, ‘Nge môt éziñ a wu a li’i minga wé teke biaé mon, monyañe wé a yiane lu’u minga a te lik, bone ba minga ate ba ye biaé, ba ye nyoñeban ane bone be môt a nga wu.’
29 A nga bo na, bobenyañe zangbwal be mbe va. Nyu ôsu a nga lu’u minga ve wu a teke li’i mon.
30 Nyu baa fe,
31 a nyu lale a nga lu’u nye. Bese zangbwal be nga bo avale da, be nga wu a be nji li’i bon.
32 Minga fe a nga su’ulane wu.
33 Nde éyoñe ya ñwômane miñwuan, minga ate a ye bo minga za? Amu bese zangbwale be nga lu’u nye.”
34 Yésus a nga yalane be na: “Bone ya émo* ji ba luk, a ba vebane meluk,
35 ve bôte be nga bi mvome ya nyiñ émo* ja zu a ñwomane miñwuane ba ye ke luk, nge vebane meluk.
36 Teke vaa nge beté, be vo’o beta wu, amu be ne ane beéngele, a be ne bone be Zambe amu be nga wômô miñwuan.*
37 Ve mfa’a ya ñwômane miñwuan, to’o Moïse a nga kobô de nkañete mon élé a be’e biyo, éyoñ a loone Yéhôva* na, ‘Zambe Abraham a Zambe Isaac a Zambe Jacob.’
38 A nji bo Zambe miñwuan, a ne Zambe bevevee, amu e mise mé, bese be vee.”
39 Nde bescribe béziñe be nga yalane na: “A Ñye’ele, wo te kobô mvo’é.”
40 Amu be nji beta bi ngule ya sili nye to’o ve nsili wua.
41 Nye fe a nga sili be na: “Amu jé ba jô na Krist a ne mone David?
42 Amu David émien a jô kalate Besam na, ‘Yéhôva* a nga jô Tate wome na: “Tabe’e si mbo nnôme wom
43 akekui ma ye bo besiñe bôé ane étele mebo jôé.”’
44 Nde fe David a loone nye na Tate; nde aval avé a ne bo mone wé?”
45 Nté bôte bese be mbe be vô’ôlô’ô nye, ane a nga jô beyé’é bé na:
46 “Taba’ané ntyel a bescribe, mbe ba nye’e ba ke ba wulu be be’e meyabe biyé, a ba nye’e na be batane be minseñe mi makit, ba nye’e be tabe’e bito ya ôsu* besynagogue a éyoñe ba di, ba nye’e be tabe’e beta bito ba ba’ale asu beta beyeñ.
47 Ba wôlé fe minkuse biôme* be bili, ba ye’elane fe ayap amu ba yi na bôte be yene be. Ba ye nyoñe mekua me ne ngul abui.”*
Notes
^ Nge ke, “môta binam?”
^ Nkobô Grec, “yôé.”
^ Belôñe menda be mbe be beté’é akok éte mfine yôbe na, é late mimfine mibaé.
^ Nkobô Grec, “éjôé ngovina.”
^ Nge ke, “é ne mvaé.”
^ Nsañe moné beromain ô mbe ô kuik 3.85 g.
^ Lañe’e Atinane bifia, “Émo.”
^ Lañe’e Atinane bifia, “Émo.”
^ Nge ke, “amu be ne bone ya ñwômane miñwuan.”
^ Lañe’e Atinane bifia.
^ Lañe’e Atinane bifia.
^ Nge ke, “bito bia dañ abeñ.”
^ Nkobô Grec, “menda.”
^ Nge ke, “Fonose jap ja ye bo ngul abui.”
