Luc 24:1-53
24 Ve môs ôsu ya sondô, be nga kune ke soñ, be bili biôme bi ne mbamba menyume be nga mane kômesan.
2 Ve be nga koone na be vaaya akok anyu soñ,
3 a éyoñe be nga nyiin, be nji ke koone mbime Tate Yésus.
4 Nté be mbe be veme amu jame di, ateme na befame bebaé, be be’e biyé bia faé be tele be fefel.
5 Binga be nga taté na ba nyeñeban a luu mesu map si, nde befame be nga sili be na: “Amu jé mia jeñe môt a vee vôme mimbime mi ne?
6 A nji bo va, a wômôya, te mia vuan aval a nga kate mia éyoñ a mbe a ngenan e Galilée
7 a jô’ô na Mona môt a yiane vebane mo bebo minsem a wu élé mintaé, a môse lale a ye wômô.”
8 Ane be nga simesane mejô mé,
9 ane be nga kôlô soñ a ke kate minlôman Awôm a wua a bôte bevo’o bese mame mete mese.
10 Be mbe na, Marie Madeleine, Jeanne a Marie nyia Jacques, binga bevo’o be mbe a be, be fe be mbe be kañete’e minlômane mame mete.
11 Ve be nji buni binga bete, a be nga simesane na a ne nlañe ba te té.
12 Ve Pierre a nga tebe tetele a ke mbile soñ, a lumbu a yene fo’o ve biyé bi ndombo, nde a nga bulan a kele’e a sili émiene jam é nga boban.
13 Ve môs ôte ôbien, bôte bebaé ya be be, be mbe be kele’e nlame ba loone na Émmaüs, ô too bebé kilimita 11* a Jérusalem.
14 Be mbe fe be kele’e ba laan ajô ya mame mese me nga boban.
15 Nté be mbe be kobô’ô a sañetan ajô ya mame mete, Yésus émien a nga nyiine nsamba wop a taté na a wulu a be,
16 ve be mbe te ngule ya yeme nye.
17 A nga jô be na: “Mame mevé mia zu mia sañetane zañe jenan e zene zen?” Ane be nga tebe be too éyôé éyôé.
18 Nyu a mbe jôé na Cléopas a nga sili nye na: “Ye ô ne nneñ a too étame Jérusalem na ô bo teke yeme mame me ndeme mane bobane va melu ma?”
19 A nga sili be na: “Mame mevé?” Be nga yalane nye na: “Mame ma fombô Yésus ya Nazareth. Émien a nga liti na a ne nkulu mejô, a mam a nga bo a mejô a nga jô mise me Zambe a mise me bôte bese;
20 a avale bejôô beprêtre bangan, a beliti zene be nga bo na be tyi’i na a yian awu a be nga tyelé nye élé.
21 Ve bi mbe bi too ndi na môt ate nnye a mbe nyu a mbe na a zu kôté ayoñ Israël, nde fe, môse mi ntoo milal ane mame mete me nga boban.
22 Binga béziñe ya be bia be nga bo fe na bi tabe fe’e ne vema, amu be nga kune ke soñ
23 a éyoñe be nji koone mbim, be nga so a kate fe bia na be nga yene beéngele be nga kate be na a vee.
24 Ane bôte béziñe bia be be bi mbe nsamba be nga ke soñ a koone fo’o ve avale binga be nga jô, ve be nji yene nye.”
25 Nde a nga jô be na: “A mia bôte mi ne te fek, a mia mi be’e minleme mi ne te buni tyi’ibi mame mese bekulu mejô be nga jô!
26 Ye é nji be é sili’i na Krist a tôbane mame mete a na a nyiin étôto’o jé été?”
27 A ataté be Moïse a bekulu mejô bese, a nga timine be mame mese me mbe me fombô’ô nye Mintilan été.
28 Be nga su’ulane kui bebé nlame be mbe be kelek, ane a nga bo ane nge a ke ôyap.
29 Ve be nga yemete nye na a tabe a be, be jô’ô na: “Tabe’e a bia amu alu é ntoo, a môs ô nga ke memane.” Nde a nga ke nda été a tabe a be.
30 A nté a mbe a ja’ak,* a nga nyoñe belet a ye’elan, a be’e je, a taté na a kabe be je.
31 Ane be nga yeme nye, ve a nga jañe be mis.
32 A be mbe be jô’ô môt ase a jô’ô nyu mbo’o na: “Nga minleme miangane mi mbe mi yôñô’ô été wôé éyoñ a mbe a kobô’ô bia njoñe njoñ, a kôme’e timine* bia Mintilan?”
33 Awolo éte ébien be nga tebe a bulane Jérusalem, ane be nga koone minlôman Awôm a wua, a bôte be mbe nsamba a be,
34 be nga jô na: “Nya ajôô a ne na Tate a wômôya fo’o, a nga yené be Simon!”
35 Ane be nga kañete be mame me nga zu ma bobane zene zen, a aval a nga bo na be yeme nye éyoñ a nga be’e belet.
36 Nté be mbe be kobô’ô mame mete, ane émien a nga suane zañe jap a jô be na: “Mvo’é é bo’o be mia.”
37 Ve amu be mbe be ko woñ a nyeñeban, be nga buni na ba yene nsisim.
38 Nde a nga jô be na: “Amu jé mia ko woñ, a amu jé bisô bia so mia minlem été?
39 Fomba’ané mo mam a mebo mam, mamiene le, namba’ané ma a yenané, amu nsisim ô nji bi minsôn a bives avale mi lôô me bili.”
40 A éyoñ a nga jô de, a nga liti be mo mé a mebo mé.
41 Ve nté be mbe be ngenane teke buni amu beta mevak a amu be mbe fe’e ne vema, a nga jô be na: “Ye jôme ya di é ne va?”
42 Ane be nga ve nye mbuban étune kos,
43 ane a nga nyoñe je a di je bese be lôô.
44 A nga jô be na: “Nyuna a ne mejô mame me nga kate mia, éyoñe me mbe me ngenan a mia, na mejô mese me ne ntilane mfa’a wom e Metiñe me Moïse a mejô bekulu mejô a Besam ma yiane tôéban.”
45 Ane a nga volô be* na be kôme wôk atinane ya Mintilan,
46 a nga jô fe be na, “Jame di nde é ne ntilane na: Krist a ye tôbane minjuk, a wômô miñwuane môse lale,
47 a e jôé dé, nkôñelane minlem asu njamane mam abé wo ye kañetebane meyoñe mese ataté Jérusalem.
48 Mia yiane bo bengaa ya mame mete.
49 A Tama yenan! Ma lôme mia jam Ésa wom a nga kak, ve mia, taba’ané tison akekui mia ye bi ngule ja so yôp.”
50 Ane a nga kee be Béthanie a same mo yôp, a botane be.
51 A ngenan a bota’ane be, ane a nga kandane be a ke yôp été.
52 A be nga vitibi ôsu wé a bulane Jérusalem a beta mevak.
53 Be nga bo be kele’e Temple be va’a Zambe duma.
Notes
^ Nkobô Grec, “bestade 60.” Stade wua a ne meta 185.
^ Nge ke, “too tebele.”
^ Nkobô Grec, “yoé.”
^ Nkobô Grec, “yoé be asimesan.”
