Marc 3:1-35
3 Éyoñe Yésus a nga beta nyiine synagogue, môt a ne wo ñyemelan* a mbe valé.
2 Be mbe be kôme’e nye fombô na be yene nge a ye saé môt ate môse Sabbat na be ve nye bijô.
3 Ane Yésus a nga jô môt a mbe a bili wo ô too ñyemelane na: “Tebe’e tetele, ô zu tebe zañe nda.”
4 Mvuse ya valé, nde a nga sili be na: “Ye atiñe da kañese na môse Sabbat, môt a bo mbamba jame nge ke mbia jam, a nyii môte* nge ke na a wôé môt?” Ve môt éziñ a nji yalane nye.
5 Éyoñe Yésus a maneya fombô bese a wô’ô ôlun, nde nlem ô nga bo nye mintaé, amu a nga yen ayete minleme dap, ane a nga jô môt ate na: “Same’e wo wôé.” Nde a nga same wo wé, ane wo wé ô nga bo mvo’é.
6 Ane bepharisien be nga kui nseñ, a été été, be nga taté na ba bo éso’o na ba bôndé fek a bôte ya ngame Hérode na be bi nye a wôé nye.
7 Ve Yésus a nga ke abôñe mañ a beyé’é bé, a beta nsamba bôt a so’o Galilée a Judée a mbe a tôñe’e nye.
8 Bôte be mbe fe be so’o to’o Jérusalem a Idumée a mfa’a ôvo’o ya Jourdain a mefefele ya Tyr a Sidon, bôte bete be nga so amu be nga wô’ô mam a mbe a bo’ok.
9 Ane a nga sili beyé’é bé nge mon éfunga a ne nkômesan asu dé na nsamba bôt ô bo teke zu yemete nye.
10 Amu a nga saé abui bôt, ba bese be mbe be bili ngul akone be nga bômane nye na be ke nambe nye.
11 To’o mbia minsisim, vôm ase mi nga yene nye, mi nga ku si ôsu wé mi yôtane mi jô’ô na: “Ô ne Mona Zambe.”
12 Ve abui biyoñ, Yésus a nga jô mie a ayok ése na mi bo te kate môte za a ne.
13 Ane a nga bete nkôl a loone ba a nga top, ane be nga ke koone nye.
14 A nga tobe* bôt 12 a loone be na minlôman, mbe be mbe na ba yiane wulu a nye a na a ye lôme be na be ke kañete.
15 A nga ve fe be ngule ya vaa mbia minsisim.
16 Bôt 12 Yésus a nga tobe* be mbe môé na, Simon, nnye fe be mbe be loone na, Pierre,
17 Jacques mone Zébébée ba Jean monyañe Jacques (nnye fe be nga yôlé na Boanergès, nnye a tinane na, “Bone be zo’oyañ”),
18 André, Philippe, Barthélémy, Matthieu, Thomas, Jacques mon Alphée, Thaddée, Simon môt a bo mam a nlem ôse,*
19 a Juda Iscariote, nnye a nga su’ulane koñe nye.
Nde Yésus a nga ke nda,
20 ane nsamba bôt ô nga beta zu koone nye aval é mbe na be nji be ngule ya di.
21 Ve éyoñe bivuvumane bié bi nga wô’ô jam éte, ane bi nga kui nseñe na bia ke bi nye, amu bi mbe bi jô’ô na: “A nga yiane bo akut.”
22 Nde fe bescribe be mbe be so’o Jérusalem be nga jô na: “Béelzéboub* a jôé nye, nde fe a vaa mbia minsisim a ngule njôô mbia minsisim.”
23 Éyoñ a looneya be, a nga yalane be a belane bive’an: “Nne Satan a ne vaa Satan aya?
24 Nge éjôé ja kandane mengam été wôé, éjôé éte ja vo’o ke tabe ayap;
25 a nge nda bôt é ne mengame mengam, nda bôt éte ja ye tyamban.
26 Nde fe, nge Satan a tebe na a wosan émien, a ntoo mengame mengam, a vo’o ke tabe ayap, ve a ye bo memane asu dé.
27 É ne été na, teke môt éziñ a ne nyiine nda ngungule môt a mane wube nye akum, nge a teke taté ka’a ngungule môt ôte, éyoñe te nje a ne nyoñ akum é ne nda jé.
28 Ma kate fo’o mia na, ba ye jamé bone be bôt aval abé ése ba bo; to’o ba bo avale minsem avé a to’o ba kobô kane mbia nkobô ôvé ba ye jamé be.
29 Ve njaman éziñ ô nji bo asu môt ase a kobô mfufube nsisim ébiasé, ve bijô ya nsem ôte bi ne nnôm éto.”
30 A nga jô nalé amu be mbe be jô’ô na: “A bili mbia nsisim.”
31 Ane nyia wé ba be bobenyañe bé be nga so be ntele nseñ, ane be nga lôme môte nda été na, a ke loone nye.
32 Nsamba bôt ô mbe ô bôma’ane nye, nde môte wua ya nsamba bôt a nga jô nye na: “Nyua a bobenyoñe be tele nseñ, ba jeñe wo.”
33 Ve a nga yalane be na: “Za a ne nyia wom, beza ke be ne bobenyañe bam?”
34 Nde a nga fombô bôte bese be mbe be bômane nye a jô na: “Ke nyia wome nyi, bobenyañe bame ke ba.
35 Nyu ase a bo nkômbane Zambe, nnye a ne monyañe wom, kale jam a nyia wom.”
Notes
^ Nkobô Grec, “nkôte wo.”
^ Éfia Grec, psukhê. Lañe’e Atinane bifia, “Ényiñ.”
^ Nge ke, “telé.”
^ Nge ke, “telé.”
^ Bebible béziñe ba jô vôme nyi na, “môte ya Kana,” ve a ne ane éfia Grec be nga kôñelane va ja tinane na, “môt a bo mam a nlem ôse.”
^ Satan, nnye ba loone nalé.
