Matthieu 14:1-36
14 Melu mete, Hérode, njôô ya ngoto* a nga wô’ô foé ya mame Yésus a bo.
2 Ane a nga jô bebo bisaé bé na: “Môte nyu a ne Jean Baptiste. A wômôya miñwuan, ajô te nde a bo mesimba mese a bo ma.”
3 Hérode* a nga bi Jean a ka’a nye ngata’a a fete nye mbôk, étome Hérodiade minga monyañe wé Philippe.
4 Amu Jean a nga jô nye biyoñe biyoñe na: “Atiñ é nji kañese na, ô lu’u minga ate.”
5 Ve akusa bo a mbe a kômbô’ô wôé nye, a mbe a ko nsamba bôte woñ, amu be mbe be yene’e Jean ane nkulu mejô.
6 A nga bo na, môs abôk abialé Hérode, ngone Hérodiade é nga yeme jeme bôt été, nde Hérode a nga wô’ô jam éte nya mvaé.
7 Nde a nga bo nye ngaka’a a kane’e ngana na, a ye ve nye jôm ése a ye sili nye.
8 Ane a nga yalan avale nyia wé a nga lebe nye na: “Va’a ma nlô Jean Baptiste éyaseyas ésua été.”
9 Akusa bo éyalan éte é nga bo Hérode nleme mintaé, ve amu bôte be mbe be ja’ak* a nye be nga wôk éyoñ a nga kane ngana éte, nde a nga ve abendé na, be ve nye nlô Jean.
10 Nde a nga lôme bôte be ke tyi’i Jean nlô nda mimbôk.
11 Ane be nga soo nlô Jean Baptiste éyaseyas ésua été, a ve wô ngone minga, ngone minga ki é nga ke ve wô nyia wé.
12 Mvuse ya valé, beyé’é be Jean Baptiste be nga so, a nyoñe mbime wé a ke jame wô; ane be nga ke kate de Yésus.
13 Éyoñ a nga wô’ô jame be nga kate nye, ane a nga kôlô vôm ate a bet éfunga na a ke vôm a ne tabe étam. Ve nné ane minsamba mi bôte mi nga yeme vôm a mbe, nde mi nga kôlô bitisone biap a mebo a tôñe Yésus.
14 Éyoñe Yésus a nga sis éfunga, nde a nga yene beta nsamba bôt. Yésus a nga wô’ô be éngôngol, nde a nga saé ba bese be mbe be konô’ôk.
15 Ve éyoñe ngô’é é nga kui, beyé’é bé be nga zu koone nye a jô nye na: “Teke nlam éziñ ô ne bebé a vôme bi ne nyi, alu ki é nga vin; jô’ô minsamba mi bôte na, mi ke minlame minlam, na mibiene mi ke kuse bidi.”
16 Ve Yésus a nga yalane be na: “Be nji yiane ke nalé, miabebiene va’ané be jôme ya di.”
17 Be nga jô nye na: “Susu’a bidi bi bili va é ne fo’o ve belet* étan a kos ébaé.”
18 A nga jô be na: “Za’ane bie va.”
19 Nde a nga jô minsamba mi bôte na mi tabe si bilo’o yôp. Ane a nga nyoñe belet étan a kos ébaé, a bete mise yôp, a ye’elane* Zambe; mvuse ya valé, a nga be’e belet a ve je beyé’é, beyé’é ki be nga kabe je minsamba mi bôt.
20 Nde bese be nga di a jaé, bifuse bi nga bu’u be nga kôane bie, a jalé bikat 12.
21 Bôte be nga di be mbe jôm ane befame 5 000, teke lañe binga a bongô.
22 Été été, Yésus a nga jô beyé’é bé na be ke bet éfunga a ke yange nye abôñe mañe yat, nté émien a li’i a ya’ane* minsamba mi bôt.
23 Éyoñ a nga mane ya’ane minsamba mi bôt, nde a nga bete nkôle yôp étame na a ke ye’elane Zambe. Nne ngô’é é nga kui nye wôé.
24 Éyoñ éfunga é keya nya ôyabe* a abôñ, amu mintyôa mi mbe mi ndeñele’e éfunga, a évuñulu é mbe é so’o be ôsu.
25 A nga bo na, bebé melendé me tyé,* nde Yésus a nga zu koone be a wulu’u mañe yôp.
26 Éyoñe beyé’é bé be nga yene nye a za’ak a wulu’u mañe yôp, be mbe be ko’o woñ. Ane be nga jô na: “Jé ja zu jili!”* Ane be nga taté na ba yôtan, amu be mbe be ko’o woñ.
27 Nde Yésus a nga jô be na: “Te mia ko woñ, taba’ané ne séé, ma le.”
28 Ane Pierre a nga jô nye na: “A Tate, nge a ne fo’o wo, kañese’e na me wulu mendime yôp a zu koone wo.”
29 Ane a nga jô nye na: “Za’ak!” Nde Pierre a nga kôlô éfunga été a wulu mendime yôp a ke vôme Yésus a mbe.
30 Ve éyoñ a nga yene na évuñulu ya mañe ja vuñe mbia ngul, nde woñ ô nga bi nye. Ane a nga taté na a nyoñe mendime si, nde a nga bôé ñyôn a jô’ô na: “A Tate, nyi’i ma!”
31 Été été, Yésus a nga same wo wé a bi nye, nde a nga sili nye na: “A môt, amu jé ô bili mone mbunan? Amu jé wo te jô’é na bisô bi jaé wo nlem?”
32 Éyoñe be nyiineya éfunga été, ane évuñulu é nga tebe.
33 Ane bôte be mbe éfunga été be nga vitibi ôsu wé a jô na: “Ô ne fo’o Mona Zambe.”
34 Mvuse ya valé, be nga dañ ôsôé a ke Génésareth.
35 Éyoñe bôte ya tison éte be nga yeme za nye a ne, ane be nga lôme foé minlame mise ya mefefel, nde bôte be nga zuu nye minkôkone mise.
36 Ane bôte be nga ye’elane nye na, a jô’é be be nambe fo’o ve meze’ele ya éyé jé ya yôp, a ba bese be nga nambe me be nga mane bo mvo’é.
Notes
^ Nkobô Grec, “tétrarque.”
^ Hérode Antipas nnye ba jô nye va. Lañe’e Atinane bifia.
^ Nge ke, “too tebele.”
^ Nge ke, “fembé.”
^ Nkobô Grec, “a botan.”
^ Nge ke, “suu.”
^ Nkobô Grec, “abui bestade.” Stade wua a ne meta 185.
^ Bebé ataté mewolo melal akekui tyé ja kôme lendé mewolo mesaman.
^ Nge ke, “A ne ñyenan!”
