Matthieu 16:1-28
16 Ane bepharisien a besadducéen be nga zu vôm a mbe. Mfa’a ya na be ve’ele nye, be nga jô nye na a liti be ndeme ja so yôp.
2 Nde a nga yalane be na: “Éyoñe ngô’é ja vin, mi wô’ô jô na, ‘Môse ya akiti wo ye bo abeñ amu yôp é ne évele.’
3 Ve mame tyé mi wô’ô jô na, ‘Môse ya dene wo ye bo abé, nde fe mveñe ja ye noñ amu yôp é ne évele, ve é too njalan a minkut.’ Mi ne ngule ya fombô yôp a yem atinane ya été, ve mi nji bo ngule ya fombô mendeme ya biyoñ a yem atinane ya été.
4 Bôte ya miaé wu, mbe be ne mbia be bôt a bôte mejian* ba yi na, me liti be ndem, ve susu’a ndem é ne litibane be be, é ne nyi Jonas.” Ane a nga kôlô valé a li’i be.
5 Beyé’é be nga tyi’ilane mañ a ke abôñe yat, ve be nga vuane nyoñe belet.
6 Yésus a nga jô be na: “Taba’ané ntyel a mvusu bepharisien a besadducéen.”
7 Ane be nga taté na, ba kobô wua a jô’ô nyu bo’o na: “Éko éziñ a jô nalé amu bi nji nyoñe belet.”
8 Éyoñe Yésus a yemeya de, ane a nga sili be na: “Amu jé mia sañetan ajô belet, a mia bôte mi nji bi ngule mbunan?
9 A za’a kui éyoñe ji, ye mi ngenane teke yeme jame ma kômbô jô? Ye mi vuaneya na, befame 5 000 be nga di belet étan, ye mi vuaneya fe abime bikat é nga bu’u?
10 Nge ke belete zangbwal befame 4 000 be nga di, a abime beta bikat* é nga bu’u?
11 Amu jé mia kate wô’ô na, me nji kobô ajô bidi? Ve mia, taba’ané ntyel a mvusu bepharisien a besadducéen.”
12 Nde be nga yeme na, a nji be a kobô’ô ajô ya mvusu ya belet, ve a mbe a kobô’ô ajô ya mame bepharisien a besadducéen ba ye’ele bôt.
13 A nga bo na, éyoñ a nga kui ngoto ya Césarée ya Philippe, ane Yésus a nga sili beyé’é bé na: “Bôte ba jô na, Mona môt a ne za?”
14 Be nga yalane na: “Bôte béziñe ba jô na, Jean Baptiste, ba bevo’o na Élie, ba bevo’o ki na Jérémie nge ke nkulu mejô mfe.”
15 A nga sili be na: “Mia ki mia jô na, me ne za?”
16 Ane Simon Pierre a nga yalane na: “Ô ne Krist, Mone vevea Zambe.”
17 Ane Yésus a nga yalane nye na: “Mevak a wo a Simon mone Jonas, amu sa ke metyi a minsône mbie bia* te bo na, ô yeme jam éte, ve Ésa wom a ne yôp nnye a te bo na, ô yeme de.
18 Ma kate fe wo na: Ô ne Pierre, ma ye lôñ ékôane bekristene jam* ako’o di yôp, a mimbé ya Soñe* mia ye ke jôé je.
19 Ma ye ve wo bidiba’a ya Éjôé ya yôp. Jam ése wo ye tiñeti si va, da ye bo jam é ntoo ntiñetane yôp, a jam ése wo ye kuli si va, da ye bo jam é ntoo nkulane yôp.”
20 Nde a nga ve beyé’é bé abendé na, be bo te kate môt éziñe na, nnye a ne Krist.
21 Ataté éyoñ éte, Yésus a nga taté na a kate beyé’é na a yiane ke Jérusalem, a na bemvendé, bejôô beprêtre a bescribe ba ye tibili nye a wôé nye, a mvuse melu melal a ye wômô.
22 Ane Pierre a nga loone nye fefel a komekane nye a jô’ô nye na: “A Tate, ô ye’e ñhe womien, avale jam éte da yiane ke kui wo.”
23 Ve Yésus a nga lume Pierre mvus a jô nye na: “A Satan lôte’e ma mvus! Ô ne jôme ja bo na, me kolé ôbak, amu wo fase ki ane Zambe, ve wo fas ane bone be bôt.”
24 Ane Yésus a nga jô beyé’é bé na: “Nge môt éziñ a kômbô tôñe ma, a nyumu’u émiene mam, a be’e élé mintaé* jé a ke ôsu a tôñe ma.
25 Amu môt ase a kômbô nyii ényiñe* jé a ye sube je, ve nyu ase a sup ényiñe jé amu ma a ye nyii je.
26 Nya ajôô a ne na, mfi ôvé môt a ne bi nge a mane bi si ése, ve a sup ényiñe jé? Nge ke na, jé môt a ne fol a ényiñe jé?
27 Amu Mona môt a ye so étôtok Ésa ba beéngele bé, éyoñe te nje a ye ya’ane môt ase aval ane mimboone mié mi ne.
28 Ma kate fo’o mia na, bôte béziñe be ne va ba ye ke wu* ôsusua na ba yene Mona môt a so’o Éjôé jé.”
Notes
^ Nge ke, “bôte be ne teke ba’ale élat.”
^ Nge ke, “bikate ba naane bidi.”
^ Nge ke, “sa ke môta biname nnye a.”
^ Nge ke, “akônda dam; kirké jam.”
^ Nge ke, “Hadès, nnye a ne vôme mimbime mise mia ke.” Lañe’e Atinane bifia.
^ Lañe’e Atinane bifia.
^ Éfia Grec, psukhê. Lañe’e Atinane bifia, “Ényiñ.”
^ Nkobô Grec, “tyek awu.”