Matthieu 2:1-23
2 Éyoñe Yésus a bialéya Bethléhem ya Judée, melu me njô bôte Hérode,* bôte ba belan ateté na be kate mame ma ye bobane melu ma zu* be nga suan e Jérusalem, be so’o mfa’a jôbe da tôô
2 be jô’ô na: “Njôô bejuif a nga bialé va a ne vé? Amu, éyoñe bi mbe mfa’a jôbe da tôô, bi nga yen ôteté wé, nde bia te zu vitibi nye ôsu.”
3 Éyoñe Njô bôte Hérode a nga wô’ô jam éte, a nga ko mbia woñ, ba be bôte bese ya Jérusalem.
4 Nde a nga bo ékôan a bejôô beprêtre a bescribe,* ane a nga sili be vôme Krist* a mbe a yiane bialé.
5 Nde be nga yalane nye na: “A mbe a yiane bialé Bethléhem ya Judée, amu bekulu mejô be nga tili na:
6 ‘A wo, Bethléhem nlame ya Juda, ô nji fo’o bo tisone ja dañe tyôtyoé e mise bengovina ya Juda, njô bôt a ye so be wo, nnye a ye tebele ayoñe bôte dam, Israël.’”
7 Nde Hérode a nga loone beyeme mame ba fombô ateté, asoé na a kôme yem éyoñ ébien ôteté ôte ô nga yené.
8 Ane a nga lôme be Bethléhem a jô be na: “Kelané wôé, mi kôme jeñ étume mon éte, nge mi yene je, za’a katané ma, ndembene ma fe ma ye ke na me ke vitibi nye ôsu.”
9 Éyoñe be nga li’i njô bôt, nde be nga ke zene jap. E teme na, ôteté be nga taté yen, éyoñe be mbe mfa’a jôbe da tôô, ô ntele be ôsu; be nga tôñ ôteté ôte akekui ô nga ke tebe vôm étume mon éte é mbe.
10 Éyoñe be nga yen ôteté ôte, be nga wô’ô mvaé abui minleme miap été.
11 Ane be nga nyiine nda été, nde be nga yen étume mone ba nyia wé Marie, be nga vitibi nye ôsu a ve nye duma. Ane be nga to’é gôlôt a oliban a myrrhe* bi bili mbamba menyum, a ve nye bie.
12 Ve, amu Zambe a nga zu ve be abendé biyeyeme na, be bo teke bulane be Hérode, nde be nga tyii zene fe a bulane jale dap.
13 Éyoñe be bulaneya si jap, ane Joseph a nga yeme biyeyem, éngele Yéhôva* a jô’ô nye na: “Kôlô’ô si, ô nyoñ étume mon a nyia wé, mi tup a ke Égypte, a taba’ané wôé akekui ma ye jô mia na mi bulan, amu Hérode a zu jeñ étume mon éte na a wôé je.”
14 Ane Joseph a nga vee alu alu, a nyoñ étume mone ba nyia wé a kee be Égypte.
15 A nga tabe wôé akekui éyoñe Hérode a nga wu. Nalé a nga tôé jame Yéhôva* a nga jô a zene ya nkulu mejô wé, éyoñ a nga jô na: “Me nga loone mone wome na a kôlô Égypte.”
16 Éyoñe Hérode a nga yene na, beyeme mame ba fombô ateté, be nga biasé nye a tube nye, a nga wô’ô mbia ôlun. Ane a nga lôme na, be ke wôé bobefame bese be bili mimbu mibaé, a ba bese be ngenane teke kui ôkala ôte. Ba be ne Bethléhem a minlame mise mi ne nye mefefel. A nga tobe mimbu mite a zene ya abime melu beyeme mame ba fombô ateté be nga kate nye.
17 Nalé a nga tôé jame nkulu mejô Jérémie a nga jô na:
18 “Bôte be nga wô’ô tyiñ é so’o Rama, miñyôn a abui du. A ne Rachel nnye a yône bone bé, a bene kañese na be volô nye nlem amu bone bé be nji beta bo.”
19 Éyoñe Hérode a wuya, Joseph a nga yeme biyeyem a too Égypte, éngele Yéhôva*
20 a jô’ô nye na: “Kôlô’ô si, ô nyoñe mone mongô a nyia wé, mi bulane si ya Israël, amu bôte be mbe be kômbô’ô wôé mone mongô* be maneya wu.”
21 Ane Joseph a nga kôlô si, a nyoñe mone mongô a nyia wé a bulane si ya Israël.
22 Ve éyoñ a nga wô’ô na Archélaüs mone Hérode, nnye a nga jôé Judée éjian ésa wé, a nga ko woñe ya beta ke wôé. Nde fe a nga yeme biyeyem, Zambe a jô’ô nye na a bo te ke wôé, ane a nga ke ngoto ya Galilée.
23 Mvuse ya valé a nga ke tabe tisone ba loone na, Nazareth, nalé a nga tôé ajô bekulu mejô be nga jô na: “A ye loobane na, môte ya Nazareth.”*
Notes
^ Lañe’e Atinane bifia.
^ Nge ke, “beastrologue.”
^ Bescribe ba jô be va be mbe fe be ye’ele’e bôte metiñ.
^ Nge ke, “Messie; Nyu Zambe a nga top.”
^ A ne mesup. Mesube ba jô me va, me mbe meyemete me élé, éyoñe be mbe be diki’i me, me mbe me bili mbamba menyum.
^ Lañe’e Atinane bifia.
^ Lañe’e Atinane bifia.
^ Lañe’e Atinane bifia.
^ Nkobô Grec, “jeñ ényiñe mone mongô.”
^ Be nga yiane nyoñe bifia bite éfia ya nkobô Hébreu é ne na “éfa’ale.”
