Matthieu 23:1-39
23 Nde Yésus a nga kate minsamba mi bôt a beyé’é bé na:
2 “Bescribe a bepharisien be tabeya éto Moïse.
3 Nde mame mese ba jô na mi bo, bo’ané me, ve te mia bo mam ane be, amu bebiene be ne teke bo mame ba jô bôte na be bo.
4 Ba mane kak* adite mimbe’e a beté de bitule bi bôt, ve bebiene be nji kômbô fô’ô de a ônyui wop.
5 Mame mese ba bo, ba bo me amu miñyené. Éve’an é ne na, ba nene nkobe metiñe be be’e aval ane jôme ja ba’ale be,* ba bo fe na, miñwôndé mengômesane miap mi bo ayap.
6 Éyoñe ba di, ba nye’e ba tabe bito ba ba’ale asu beta beyeñ, ba nye’e fe ba tabe bito ya ôsu besynagogue.
7 Ba nye’e na, bôte be batane be minseñe mi éwônga, a ba nye’e be looba’ane na Rabbi.*
8 Ve mia, te mia kañese loobane na Rabbi, amu môte wua nnye a ne Ñye’ele wônan, mia bese ki mi ne bobenyañ.
9 Nde fe na, te mia loone môt éziñe ya si nyu na éso, amu wua étame nnye a ne mia Ésa, Nyu a ne yôp été.
10 Nge kañese loobane na ntebe ôsu, amu môte wua étame nnye a ne Ntebe ôsu wônan, Krist.
11 Ve môt a dañe zañe jenan a yiane bo mbo ésaé wônan.
12 Môt ase a bete émiene yôp, nnye ba ye sili si, ve môt ase a sili émiene si nnye ba ye bete yôp.
13 “Ngo’o mia, a bescribe a bepharisien, mia bôte medu’an! Amu mia dibe bôte zene ja ke Éjôé ya yôp; miabebiene mi ne teke tôñe zen éte, nalé fe, mia kamane bôte ba kômbô nyiin été na be nyiin.
14 *——
15 “Ngo’o mia, a bescribe a bepharisien, mia bôte medu’an! Amu na, mia bômane mañ a si na mi volô môte* wua na a buni Zambe. Ve éyoñ a nga buni Zambe, mia bo na a bo môt a yiane Géhenne* biyoñe bibaé a dañe miabebien.
16 “Ngo’o mia, a mindindime mia liti bôte zen, mia mia jô na, ‘Môt ase a kane ngana a tote’e Temple, a nji bo ntindane ya bo jam a te jô na a ye bo. Ve môt a kane ngana a tote’e gôlôt ya temple, nnye a ne ntindane ya bo jam a te jô na a ye bo.’
17 A mekut a mindindim! Jé ja dañe mfi, ye gôlôt, ye Temple a bo na gôlôt ate a bo étyi?
18 Mia jô fe na, ‘Nge môt éziñ a kane ngana a tote’e autel, a nji bo ntindane ya bo jam a te jô na a ye bo; ve nge môt éziñ a kane ngana a tote’e mvean ô bôô autel yôp, nnye a ne ntindane ya bo aval a te jô na a ye bo.’
19 A mindindim! Jé ja dañe mfi, ye mvean, ye autel a bo na mvean ôte ô bo étyi?
20 Ajô te, éyoñe môt a kane ngana a tote’e autel, ke ngana éte ja fombô autel émien a biôme bise bi bôô autel yôp.
21 A éyoñe môt a kane ngana a tote’e Temple, ngana éte ja fombô Temple a Nyu a too été.
22 Môte fe a kane ngana a tote’e yôp, ngana éte ja fombô éto njôane Zambe a Môt a too je yôp.
23 “Ngo’o mia a bescribe a bepharisien, mia bôte medu’an! Amu mia ve ngap awômô ya menthe, aneth a cumin,* ve mia biasé mame ya Metiñe me Moïse ma dañe mfi; mme me ne na, e bo zôsô, e ko bôt éngôngol, a e ba’ale élat. Mia bo mvo’é amu mia bo mame mete, ve mi nji yiane vuane ma mevo’o mese.
24 A mindindime mia liti bôte zen, mia, mia léé mone nlo, ve mi mine’e chameau!
25 “Ngo’o mia a bescribe a bepharisien, mia bôte medu’an! Amu mia sôp élaé a ésua mfa’a ya atan, ve été wôé, bi ne njalan a ôzañ akum a minkômbane mia kate jôé mie.
26 A bepharisien mi ne mindindim, ke mia yiane taté sôp élaé a ésua été wôé, éyoñe te nje bia ye fe bo mfuban atan!
27 “Ngo’o mia a bescribe a bepharisien, mia bôte medu’an! Amu mi ne ane mesoñe ba te mane dube bifumulu meyañ, atane ma yené abeñ, ve été wôé, me ne njalan a bivese mimbim, a avale nyé mboone mam ése.
28 Avale te fe atan, mia yené ve ane bôte be ne zôsô, ve été wôé, mi ne njalan a medu’an a mbia be mam.
29 “Ngo’o mia a bescribe a bepharisien, mia bôte medu’an! Amu mia lôñe mesoñe bekulu mejô a kôme mevuse bezôsô be bôte na me yené abeñ.
30 Mia jô fe na, ‘Nge bi nga nyiñe melu bemvamba bangan, ve bi nji be’e bijô ya bôte be nga wôé bekulu mejô be nga be’e.’
31 Nde miabebiene mia meme na mi ne bone be bôte be nga wôé bekulu mejô.
32 Sonda’ané ésaé bemvamba benane be nga taté.
33 “A benyo a mvoñe mekpwe, nne mia ye tube ntyi’ane mejô ya Géhenne* aya?
34 Amu nalé ma lôme mia bekulu mejô, mimfefe’e mi bôt a beye’ele. Mia ye wôé bôte béziñe ya été a tyelé be élé yôp, bevo’o ki mia ye bôme* be besynagogue a tibili be bitisone bitison,
35 mfa’a ya be’e ayeme ya bezôsô be bôte bese be nga wu, ataté zôsô môt Abel, akekui Zacharie mone Barakia, nnye mi nga wôé zañe temple a autel.
36 Ma kate fo’o mia na, mame mete mese ma ye kui be bôte ya miaé wu.
37 “A Jérusalem, Jérusalem, tisone ja wôé bekulu mejô a lume minlômane mi Zambe mekok, biyoñe tañ aya me nga kômbô tôkane bone bôé aval ane nyia kup a tôkane bone bé mefabe si! Ve mi nga ben.
38 Tama yenan! Zambe a li’iya mia a nda jenan.*
39 Amu ma kate mia na, ataté éyoñe ji mia ye ke fe beta yene ma a zen éziñ akekui éyoñe mia ye jô na, ‘Ébotan é bo’o be nyu a so a jôé Yéhôva!’”*
Notes
^ Nge ke, “kômesan.”
^ Nge ke, “bo bephilactère bap ndam.”
^ Nge ke, “Ñye’ele.”
^ Minnôme mimvulekane bekalate miziñe mi nji bi éfus éte, da kôme fo’o yené na é nji bo ngabe ya mimfufube mintilan.
^ Nkobô Grec, “prosélyte.”
^ Lañe’e Atinane bifia.
^ Menthe, aneth a cumin be ne bityita’a.
^ Lañe’e Atinane bifia.
^ Lañe’e Atinane bifia, “Nkasa.”
^ Be ne fe jô na, “Nda jenan é li’iya bili’i bilik.”
^ Lañe’e Atinane bifia.
