Matthieu 8:1-34
8 Éyoñ a siseya nkôl, ane beta minsamba mi bôte mi nga tôñe nye.
2 Nde nkôkone zam ô nga so a vitibi ôsu wé a jô nye na: “A Tate, nge wo kañese, ô ne saé ma.”
3 Ane a nga same wo a nambe nye a jô’ô na: “Ma kañese, bo’o mvo’é!” Été été, zam é nga mane nye nyul.
4 Nde Yésus a nga jô nye na: “Te kate môt éziñe jame di, ve kele’e liti womiene be prêtre a ve mvean, aval é mbe njôane Metiñe me Moïse mfa’a ya na, ô liti bôte bevo’o na ô ntoo mvo’é.”
5 Éyoñ a nga nyiine Capernaüm, évete bezimbi* éziñ é nga zu be nye a ye’elane nye,
6 a jô’ô na: “A Monti, mbo ésaé wom a bôô si nda, a maneya yemele, a kon abui.”
7 Ane Yésus a nga jô nye na: “Ma ye saé nye éyoñe ma ye kui wôé.”
8 Nde évete bezimbi é nga beta jô nye na: “A Monti, me nji bo avale môt ô ne nyiine nda, ve jô’ô fo’o ve éfia jia, a mbo ésaé wom a ye bo mvo’é.
9 Amu ma fe me bili bôte be ne éjôé jame si, me bili bezimbi be ne éjôé jame si, me ne ngule ya jô wua na, ‘Kele’e li!’ A kele fe, nyu mbo’o na, ‘Za’a nné!’ A zuli fe. Me ne fe ngule ya jô ôlo wome na, ‘Bo’o jame di’ ô bo fe de.”
10 Éyoñe Yésus a nga mane wô’ô jam éte, a nga bo fe’e ne vema, ane a nga kate bôte be mbe be tôñe’e nye mvuse na: “Ma kate fo’o mia benya mejôô na, Israël ase, me ngenane teke yene môt a bili avale beta mbunane di.
11 Ve ma kate mia na, abui bôte da ye so mfa’a ya est a mfa’a ya ouest, ba ye zu tabe si tebele a Abraham, Isaac a Jacob Éjôé ya yôp;
12 ve ba ye kuli bone ya Éjôé atan, e dibi été. Nne ba ye yône wôé a latane mesôñ.”
13 Nde Yésus a nga yalan évete bezimbi na: “Bula’ane nda jôé. Jame wo te sili a mbunan ôse é boba’an.” Awolo éte ébien, mbo ésaé wé a nga bo mvo’é.
14 A nga bo na, éyoñe Yésus a nga nyiine nda Pierre, ntyi minga Simon a mbe a bôô énoñ ôkon, ayôñ é nga bete nye nyul.
15 Nde a nga nambe nye wo, tite* ve man, ane a nga tebe tetele, a taté na a belane nye.
16 Ve mame ngô’é, bôte be nga soo nye abui bôte mbia minsisime mi mbe mi jô’é be, nde Yésus a nga mane vaa mbia minsisime mite ve a mejô ya anyu dé, a mane fe saé minkôkone mise.
17 Nalé a nga tôé mejô me nkulu mejô Ésaïe ma: “A nga nyoñe mintaé miangan a akone dangan.”
18 Éyoñe Yésus a nga yene na nsamba bôte wo bômane nye, nde a nga jô beyé’é bé na be ke abôñe mañe ya yat.
19 Ane scribe éziñ a nga zu koone nye a jô nye na: “A Ñye’ele, ma ye tôñe wo vôm ase wo ye ke.”
20 Ve Yésus a nga yalane nye na: “Bemvak ba nyiñe mimbase mekok été, anone ya yôbe ki da nyiñe mumba’a été, ve Mona môt a nji bi vôme ya beté nlô wé.”
21 Mvuse ya valé, ñyé’é wé mfe a nga jô nye na: “A Tate, kañese’e na me taté ke jam ésa wom.”
22 Yésus a nga yalane nye na: “Kele’e ôsu a tôñe ma, jôké’é mimbime mi jame mimbime miap.”
23 Éyoñ a nga ke dañ éfunga été, beyé’é bé be nga tôñe nye.
24 Atemeteme na, beta ôkôs a nga vuñe mañ aval é mbe na, mintyôa mi mañe mi nga bo na mendime me mane jaé éfunga été; ve Yésus nye a mbe a kele’e ôyo.
25 Nde be nga zu vele nye ôyo be jô’ô na: “A Tate, nyii bia, bi ntoo bebé ya wu!”
26 Ve a nga jô be na: “A mia mi nji bi ngule mbunan, amu jé mia ko abime woñe di?” Nde a nga kôlô si a bame ôkôs a mañ, ane beta évôvoé a nga bo.
27 Bôte be mbe fe’e ne vema a jô na: “Avale môt avé di? To’o ôkôs a mañe bia bo nye mewôk!”
28 Éyoñ a nga ke kui abôñe mañe ya yat, ngoto ya Gadara, bôte bebaé mbia minsisime mi mbe mi jô’é be, be nga zu koone nye, be so’o afube mesoñ. Bôte bete be mbe be bo’o évô, aval é mbe na bôte be mbe be ko woñe ya lôte vôm ate.
29 Ane be nga bame nye be jô’ô na: “A Mona Zambe, bi bili ajô avé a wo? Ye wo te zu tibili bia ôsusua na éyoñe ja kpwaan?”
30 Mbame bengôé ô mbe ô ja’a bidi ôbe nté a vôme be mbe.
31 Nde mbia minsisime mi nga taté na mia ye’elane nye mi jô’ô na: “Nge wo vaa bia be bôte ba, lôme’e bia bi ke nyiine bengôé été.”
32 Nde a nga jô be na: “Kelané!” Été été, mbia minsisime mi nga kôlô be bôte bete a ke nyiine bengôé été. Ane mbame bengôé ôse ô nga ke ku mañ été a wu.
33 Beba’ale bengôé be nga tup a ke tison, ane be nga ke kañete bôte mame mese be nga yen, to’o ajô ya bôte mbia minsisime mi mbe mi jô’é be.
34 Ane bôte bese ya tisone be nga ke jeñe Yésus, éyoñe be nga yene nye, nde be nga yemete nye na a kôlô ngoto jap.
