Matthieu 9:1-38
9 Yésus a nga bet éfunga été, a bulane tisone jé.
2 Ane be nga soo nye môt a too ñyemelan a bôô énoñ ôkon. Éyoñe Yésus a nga yen abime mbunane be mbe be bili, nde a nga jô môt a mbe ñyemelane na: “Bô’é nleme si a mon, me maneya jamé wo minseme miôé.”
3 Ve bescribe béziñe be mbe be kobô’ô menyiñe be jô’ô na: “Môte nyu a kobô Zambe abé.”
4 Amu Yésus a mbe a yeme’e asimesane dap, nde a nga sili be na: “Amu jé mia fase mbia be mame minleme mienan été?
5 Jé ja dañe tyi’ibi ya jô, ye na: ‘Me maneya jamé wo minseme miôé,’ nge ke na, ‘Tebe’e tetele a wulu’?
6 Ve ma yi na mi yeme na, Mona môt a bili ngule ya jamé minsem e si va.” Nde a nga jô môt a mbe ñyemelane na: “Tebe’e tetele, nyoñek énoñe nkôkone jôé ô bulane nda jôé.”
7 Ane a nga tebe tetele a ke nda jé.
8 Éyoñe minsamba mi bôte mi nga yene jam éte, woñ ô nga bi mie, ane mi nga ve Zambe duma, amu a nga ve bone be bôte ngule ya bo avale mam éte.
9 Nté a mbe a kôlô’ô vôm ate, nde Yésus a nga yene môt a too jôé na Matthieu, a too wofise ba nyoñe toya, ane a nga jô nye na: “Za’a bo ñyé’é wom.” Été été a nga tebe tetele a tôñe nye.
10 Mvuse ya valé, Yésus a mbe a ja’a nda été, nde abui benyoñe toya a bebo minsem é nga zu tabe si a taté na da di bidi a Yésus a beyé’é bé.
11 Ve éyoñe bepharisien be nga yene de, nde be nga sili beyé’é be Yésus na: “Amu jé ñye’ele wônan a di bidi a benyoñe toya a bebo minsem?”
12 Éyoñe Yésus a nga wô’ô nsili be nga sili, nde a nga jô na: “Dokita a nji bo mfi asu bôte be ne mvo’é minsôn, ve asu minkôkon.
13 Kelané ñhe yé’é atinane ya mejô ma: ‘Mvame nje* ma yi, sa ke metuna’a.’ Amu me nga so na me zu loon, sa ke bôte be ne zôsô, ve bebo minsem.”
14 Nde beyé’é be Jean be nga so a sili nye na: “Amu jé bia a bepharisien bia tyi bidi amu Zambe, ve beyé’é bôé ke, be ne teke tyi bidi amu Zambe?”
15 Ane Yésus a nga jô be na: “Bemvôé be fame ja lu’u minga, be nji bi amu ya tabe éyôé nté ôse fame ja lu’u minga é ngenan a be, sa nalé? Ve môse wo zu éyoñe fame ja lu’u minga ja ye li’i be, éyoñ éte ba ye tyi bidi.
16 Môt éziñ a vo’o nyoñ éfus éyé é ngenane mvo’é na, a beté abaka éyé é ntoo ntuk; amu éyé é ngenane mvo’é, ja ye limiti ji é ntoo ntuk, a bo na abé é dañe nen.
17 Nge ke na, bôte béziñe be vo’o ki futi mfefé woone mende’e me ékôp me ntoo minnôm. Nge be bo de, nalé a ne bo na mende’e me ékôp me tui, woon a viane mane kubu si, mende’e me ékôp fe me mane ndaman. Ve ba futi mfefé woone mimfefé mende’e me ékôp, na bebaane be bo teke ndaman.”
18 Nté a mbe a kate’e be mame mete, nde ntebe ôsu éziñ a nga subu nye bebé a vitibi ôsu wé a jô’ô na: “Éko éziñe ngo jam é wuya wu, ve za’a beté nye mo nyule na a beta nyiñ.”
19 Nde Yésus a nga kôlô si a beyé’é bé, ane be nga tôñe nye.
20 Nté be mbe zen, minga éziñ a mbe nkôkon, metyi me nga kui nye nyule tañe mimbu 12, a nga ke kotane mvuse Yésus a nambe nye meze’ele ya éyé jé ya yôp,
21 amu a mbe a jô’ô émiene na: “Ngo’o nge ma nambe ve meze’ele ya éyé jé ya yôp, ma ye bo mvo’é.”
22 Yésus a nga kôñelan a yene nye, nde a nga jô nye na: “A ngo jam, bô’é nleme si, mbunane wôé ô saéya wo.” Été été, minga ate a nga bo mvo’é.
23 Éyoñe Yésus a nga nyiine nda ntebe ôsu ate, a nga koone bôte be loñe’e mindiñ a nsamba bôt ô bo’o zô’é.
24 Nde Yésus a nga jô na: “Tame kuané atan, amu mona minga a nji wu, a ke ôyo.” Ane bôte be nga fukane vioé a kpwe’ele nye.
25 Nné ane nsamba bôt ô nga kui nseñ, Yésus a nga ke fefele mona minga a bi nye wo, ane mona minga a nga kôlô si.
26 Ane foé ya jame Yésus a nga bo, é nga mane mialane ngoto éte ése.
27 Éyoñe Yésus a nga kôlô vôm ate, ane mindindime mibaé mi nga tône nye mvus, mi jô’ô na: “A Yésus Mone David, mvama’ane bia.”*
28 Éyoñ a nyiineya nda été, mindindime mi nga subu nye bebé, ane Yésus a nga sili be na: “Ye mia buni na me ne bo jam éte?” Be nga yalane nye na: “Ôwé a Tate.”
29 Ane a nga nambe be mis a jô be na: “É boba’ane be mia, abime mbunane wônan ô ne.”
30 Ane mise map me nga taté na ma yen. Nde Yésus a nga ve be abendé na: “Te mia ve’ele bo na môt éziñ a yeme de.”
31 Ve nné ane be nga kui nseñ, be nga kañete ajô dé ngoto éte ése.
32 Éyoñe be nga kôlô vôm ate, bôte be nga soo nye môt a too mvumvuk, a mbia nsisim a mbe a jô’é nye;
33 éyoñ a vaaya mbia nsisim ate, ane môt a mbe mvumvuk a nga taté na a kobô. Bôte be mbe fe’e ne vema, ane be nga jô na: “Bi ngenane teke yen avale jame di Israël ase.”
34 Ve bepharisien be mbe be jô’ô na: “Njôô mbia minsisime nnye a ve nye ngule ya vaa mbia minsisim.”
35 Ane Yésus a nga ke bitisone bise a minlame mise, a kele’e a ye’ele besynagogue été a kañete mbamba foé ya Éjôé, a saé aval akon ése a aval éyem ése.
36 Éyoñ a nga yene minsamba mi bôt, nde a nga wô’ô mie éngôngol amu menyule map me mbe nsôtan,* me yené’é fe abé* aval ane mintômba mi ne teke mba’ale.
37 Ane a nga kate beyé’é bé na: “Bidi ya koé bi ne fo’o abui, ve bebo bisaé be ne tyôtyoé.
38 Ye’elané ñhe Masa ya nkôane bidi na, a lôme bebo bisaé be zu koé bidi afube dé.”
Notes
^ Nge ke, “nkoon éngôngole ñwô.”
^ Nge ke, “ko bia éngôngol.”
^ Nge ke, “be nga mane wôse be biôm.”
^ Nge ke, “be mbe ne mialamialan.”
