Nlitan 22:1-21
22 A a nga liti ma ôsôé mendime ya ényiñ, ô ngemba’an ane éyet, ô so’o éto njôane Zambe a ji Mone ntômba,
2 ô lene’e ézezañe beta njoñe ya tison. Bilé ya ényiñe bi mbe bi tele mimfa’a mibaé ya ôsôé, bi wume’e bibuma biyoñ 12, bi va’a bibuma ngon ése, a mekaé ya bilé bite me mbe asu na meyoñe me saéban.
3 A biyo’é biziñe bia ye ke beta bo, ve éto njôane Zambe a ji Mone ntômba bia ye bo tison, a alo dé da ye bo nye ésaé é ne étyi;
4 a ba ye yen asu dé a éyôlé jé ja ye bo mvome mesu jap.
5 A alu da ye ke fe bo, a ba ye ke beta yi éfufube ya lambe nge ji ya nlô jôbô, amu Yéhôva* Zambe a ye ve éfufube jé be be, a ba ye jôé ane bejô nnôm éto a nnôm éto.
6 A nga jô ma na: “Mejô ma me ne ma be ne tabe me ndi* a me ne benya mejôô; ôwé, Yéhôva,* Zambe a nga kobô a zene ya bekulu mejô, a nga lôm éngele wé na a liti alo dé mame ma yiane boban ana’ana.
7 Tame yen! Ma zu avôl avôl. Meva’a be nyu a tôñe mejô bekulu mejô me ne mvulekane kalate wu.”
8 Nde ñhe, a ne ma Jean, me nga wôk a yene mame mete. Éyoñe me nga wô’ô me a yene me, me nga ku mebo me éngele a mbe a liti’i ma me na me kañe nye.
9 Ve a nga jô ma na: “Tabe’e ntyel! Te bo jam éte! Ma fe me ne ôlo ane wo, ane bobenyoñe bekulu mejô a ba bese ba tôñe mejô me ne mvulekane kalate wu. Kañe’e Zambe.”
10 A nga beta jô ma na: “Te bo na nkulan ajô ya mvulekane kalate wu ô tabe nsolan, amu éyoñ é nga teléban é ntoo bebé.
11 Nyu a ne ékotekot a kele’e ôsu a ékotekote jé, a nyu a ne mvit a kele’e ôsu a mvite jé; ve nyu a ne zôsô a kele’e ôsu a ba’ale zôsô wé, a nyu a ne mfufup a kele’e ôsu a ba’ale éto mfufube jé.
12 “‘Tame yen! Ma zu avôl avôl, a me bili ma’ane ma ve na me ya’ane môt ase aval ane mimboone mié mi ne.
13 Me ne Alpha a Oméga,* môt ôsu a môt a su’ulan, metata’a a memane.
14 Mevak a ba ba sôbe meyabe biyé map, ndembene be ne bo ngule ya kui vôme bilé ya ényiñe bi ne, a be ne ngule ya nyiine tisone be lôte’e mimbé.
15 Nseñ a ne bemvu,* ba ba bo mame ya ngbwel, ba ba bo mvite mame ya bisôk,* bewôé bôt, bekañe bengulemelan a ba bese ba nye’e minsos a ba be bili fulu ya laane minsos.’
16 “‘Ma Yésus, me nga lôm éngele wome mfa’a ya kañete bikôane bekristene mame mete. Me ne nkañ a mvoñe bôte David, me ne fe ôteté wo faé mame tyé.’”
17 A nsisime ba minga a ne nlu’ane ba ke ôsu a jô na, “Za’ak!” A nyu a wôk a jô’ô na, “Za’ak!” A nyu a wôk évé a za’ak; nyu a kômbô a nyoñe’e mendime ya ényiñe zezé.
18 “Ma jô môt ase a wô’ô mejô me ne nkulan ajô ya mvulekane kalate wu na: Nge môt éziñ a kô’ôlane jam éziñ e mame ma, Zambe a ye kô’ôlane minju’u mi ne ntilane mvulekane kalate wu be nye;
19 a nge môt a vaa jam éziñ e minkulane mejô ya mvulekane kalate wu, Zambe a ye vaa ngabe jé ya bilé ya ényiñ a tison é ne étyi, mame me ne ntilane mvulekane kalate wu.
20 “Nyu a bo’olô mame ma a jô na, ‘Ôwé, ma zu avôl avôl.’”
“Amen! Za’ak, a Tate Yésus.”
21 Ngo’o nge beta mvame Tate Yésus a tabe a mimfufup.
Notes
^ Lañe’e Atinane bifia.
^ Nge ke, “été.”
^ Lañe’e Atinane bifia.
^ Nge ke, “A ba Z.” Alpha ba Oméga be ne ékanga ôsu a ékanga ja su’ulane nkobe bikanga ya nkobô Grec.
^ Nalé a tinane na, bôte mimboone mi ne angôndô mise me Zambe.
^ Lañe’e Atinane bifia, “Mvite mame ya bisôk.”
