Nlitan 3:1-22
3 “Asu éngele ya ékôane bekristene ya Sardes, tili’i na: Nyina a ne mame nyu a bili minsisime zangbwal mi Zambe a ateté zangbwal a jô: ‘Ma yeme mimboone miôé, na ô bili éyôlé* na ô ne vevee, ve ô ne mbim.
2 Mombô’ô, yemete’e biôme bi ngenane be wo bi ntoo bebé ya wu, amu me nji yene mimboone mi mame miôé mi too njalane* mise me Zambe wom.
3 Ajô te, kele’e ôsu a simesan aval ô nga nyoñ a aval ô nga wôk, a kele’e ôsu a ba’ale me a kôñelane nlem. Teke vaa nge beté, nge ô bo teke vee, ma ye so ane ñwuwup, a wo ye ke yem a zen éziñ awolo ma ye so be wo.
4 “‘Ve ô bili mon abime bôt* e Sardes, nnye ate a nji ndamane biyé bié, a ba ye wulu a ma be be’e bifumulu biyé, amu be ne bôte ba yiane jam éte.
5 Nyu a dañ a ye fo’o jaé biyé bi ne bifumulu, a a zen éziñ, ma ye ke tyame* jôé dé kalate ya ényiñ, ve ma ye yemelane jôé dé ôsu Ésa wom a beéngele bé.
6 Nyu a be’e melo a wô’ô jame nsisime wo jô bikôane bekristen.’
7 “Asu éngele ya ékôane bekristene ya Philadelphie, tili’i na: Nyuna a ne mejô a jô, nyu a ne étyi, nyu a kobô benya mejôô, nyu a bili édiba’a David, nyu a yoé a teke môt a ye dip, a nyu a dip a teke môt a ne yoé:
8 ‘Ma yeme mimboone miôé, tame yen! Me teléya ôsu wôé mbé ô yoo, ñwô ôte môt éziñ a se ngule ya dip. A ma yeme na ô bili ôyôme ngul, a wo ke ôsu a ba’ale mejô mam a ô litiya na ô ne môte be ne tabe nye ndi.
9 Tame yen! Bôte be ne synagogue Satan, ba ba jô na be ne bejuif, a too ke na be nji bo bejuif, ve ba laane minsos, ma ye bo na be zu buti mesu map si mebo môé ôsu,* a ba ye yeme na me nga nye’e wo.
10 Amu ô nga ba’ale mejô ma fombô mbane ya jibi wom,* ma fe ma ye tabe be wo awolo ya meve’ele, nde te da zu be bôte ya si ése meku’u menyin, mfa’a ya ve’ele ba be too si.
11 Ma zu avôl avôl. Kele’e ôsu a tu’a bi jôm ô bili, ndembene môt éziñ a ne bo te nyoñe couronne jôé.
12 “‘Nyu a dañ, ma ye bo nye akône ya temple Zambe wom, a nde fe, a ye ke beta kui temple ate atane môs éziñ, a ma ye tili éyôlé Zambe wom a éyôlé tisone Zambe wome be nye, Mfefé Jérusalem, ñwô ôte wo so yôp e be Zambe wom, a mfefé éyôlé wom.
13 Nyu a be’e melo a wô’ô jame nsisime wo jô bikôane bekristen.’
14 “Asu éngele ya ékôane bekristene ya Laodicée, tili’i na: Nyuna a ne mam Amen a jô, nyu a ne zôsô a nya ngaa, atata’a ya ntéane biôme Zambe:
15 ‘Ma yeme mimboone miôé, na ô nji bo avep nge ke ayôñ. Ma yi na ô bo avep nge ke ayôñ.
16 Ajô te, amu ô ne ntôton a ô nji bo ayôñe nge avep, ma ye yô wo anyu dam.
17 Amu wo jô na, “Me ne mfañ a me bili abui akum a jôm éziñ é nji jembane ma,” ve ô nji yeme na ô ne bua a éngôngol a nzôzoé a ndidim a soé,
18 ajô te, ma lebe wo na ô kuse gôlôt be ma, nyu be maneya tune nduan été, a wo ye bo nkukum, ô kuse fe bifumulu biyé wo ye jaé, nde ñhe ôsone ya soé jôé wo ye bo te kuliban atan, ô kuse fe biañe ya tolé mise môé, ndemben ô ne yen.
19 “‘Ba bese ma nye’e, ma lebe be a foñesô be. Ajô te nde, bo’ok ayôñ a kôñelane nlem.
20 Tame yen, me tele mbé yôp a ma kute mbé. Nge môt éziñ a wô’ô tyiñe jam, a yoé mbé, ma ye nyiine nda jé a di bidi ya mame ngô’é a nye a tabe a nye.
21 Mfa’a ya nyu a dañ, ma ye ve nye mvome ya tabe si a ma éto njôane jam, fo’o ve avale me nga dañ a tabe si a Ésa wom éto njôane jé.
22 Nyu a be’e melo a wô’ô jame nsisime wo jô bikôane bekristen.’”
Notes
^ Nkobô Grec, “bone biyôlé.”
^ Nge ke, “nya mboone.”
^ Nkobô Grec, “biyôlé.”
^ Nge ke, “vaa.”
^ Nge ke, “liti ésemé.”
^ Be ne fe jô na, “tôñ éve’ela ya mbane ya jibi wom.”
