Nlitan 6:1-17
-
Mone ntômba a yoé bifeta’a bisamane bi ôsu (1-17)
6 A me nga yen éyoñe Mone ntômba a nga yoé éfeta’a jia ya bifeta’a zangbwal, a me nga wô’ô vevee ététéa wua ya bevevee bitétéa binyin é jô’ô tyiñ é too ane zo’oyañe na: “Za’ak!”
2 A me nga yen, a tame yen! Éfumulu ékabela, a nyu a mbe a too je yôp a mbe a bili mfan; a be nga ve nye couronne, a a nga ke ôsu ane nyu a dañ a mane medañe mé.
3 Éyoñ a nga yoé éfeta’a baa, me nga wô’ô vevee ététéa baa é jô’ô na: “Za’ak!”
4 Ékabela évok é nga kui atan, é too évele ne zôññ, a nyu a mbe a too je yôp, be nga ve nye ngule ya vaa mvo’é si, ndembene ba ye wôéane be be, a be nga ve nye beta nkpwaté mekôn.
5 Éyoñ a nga yoé éfeta’a lale, me nga wô’ô vevee ététéa lale a jô’ô na: “Za’ak!” A me nga yen, a tame yen! Évindi ékabela, a nyu a mbe a too je yôp a mbe a bili kop wo wé.
6 Me nga wô’ô jôm é too ane tyiñ ézezañe bevevee bitétéa binyin é jô’ô na: “Kili* blé jia asu denier* wua, a kili orge élal asu denier wua, a te bo mbon olive a woone mbia jam.”
7 Éyoñ a nga yoé éfeta’a nyini, me nga wô’ô tyiñe vevee ététéa nyini é jô’ô na: “Za’ak!”
8 A me nga yen, a tame yen! Ékabela é too nyul aval étam,* a nyu a mbe a too je yôp a mbe éyôlé na Awu. A Soñ* é mbe é tôñe’e nye bebé. A ngul é nga vebane be be meku’u mesi menyine na, be wôé a ayabe nkpwaté mekôn, a mfumbale ya zaé, a akone da wôé, a betite ya afan.
9 Éyoñ a nga yoé éfeta’a tane, me nga yen autel si, binyiñe* bi bôte be nga wu amu mejô me Zambe a amu nkañete be nga bo.
10 Be nga jô tyiñe yôbe na: “Akekui éyoñ évé, a Tate ya betate, nyu a ne étyi a benya mejôô, wo ye yange na ô tyi’i mejô a kune metyi mangane be ba be too si?”
11 A be nga ve môt ase ya be be éfumulu éyé, a be nga jô be na be wo’one mone nté, akekui tañ ése ya alo avok a bobenyañe bap be mbe bebé ya wu ane be ja ye jaé.
12 A me nga yen éyoñe Mone ntômba a nga yoé éfeta’a samane, a beta mfô’ôsane si a nga bo; nlô jôbô a nga bo évindi ane évindi éyé nkuta é ne nkôman a ésil,* a ngon ése é nga bo ane metyi,
13 a ateté ya yôp é nga ku tyia, aval ane éyoñe beta mfebe a suk élé figuier, éyoñ éte bibuma bi figuier bi ngenane bityes bia ku.
14 A yôp é nga kôlô aval ane mvulukane kalate ba vuluku, a nkôl ôse a ékôte si ése bi nga kôlô vôme bi mbe.
15 Nde bejô bôte ya si a bôte be éjôé, bivete bezimbi, minkukum, mingungul a alo ése a bôte bese be ne fili be nga ke sobô mimbase mekok été a meko’o me ne minkôl été.
16 A be nga ke ôsu a jô minkôl a meko’o na: “Kuané bia yôp a solané bia mise me Nyu a too éto njôan a ayaa Mone ntômba,
17 amu beta môse ya ayaa dap a kpwaaneya, a za a ne ngule ya nyiñ?”
Notes
^ Nge ke, “Lita.”
^ Nsañe moné beromain be mbe be bela’ane wô ô too tañe moné ba ya’ane môt a te saé ngumba môs. Lañe’e Atinane bifia.
^ Nge ke, “élulup.”
^ Nge ke, “Hadès, nnye a ne vôme mimbime mise mia ke.” Lañe’e Atinane bifia.
^ Éko éziñ a yiane bo metyi map me nga sôéban autel yôp. Éfia Grec, psukhê. Lañe’e Atinane bifia, “Ényiñ.”
^ Éko éziñe mimvote mi ntômba.
