Nlitan 8:1-13
8 Éyoñe Mone ntômba a nga yoé éfeta’a zangbwale, ane yôp é nga bo ne mieññ tañ étun awolo.
2 Ane me nga yene beéngele zangbwal be tele ôsu be Zambe, a be nga ve be metoñe zangbwal.
3 Éngele mfe, a bili ésua ba belane je mfa’a ya di’i encens* é too nkôman a gôlôt, a nga suan a tebe fefel autel, a be nga ve nye abui encens na, a ve nye a meye’elane mimfufube mise autel a ne nkôman a gôlôt a mbe a tele ôsu éto njôan.
4 Ôtita ya encens éngele a nga di’i ô nga bet a meye’elane mimfufup a kui ôsu be Zambe.
5 E teme na, éngele a nga nyoñ ésua ba belane je mfa’a ya di’i encens, a jalé je a metye’e me nduan a nga nyoñ autel a wua je si. A bezo’oyañ a metyiñ a befeleves a mfô’ôsane si, be nga bo.
6 Ane beéngele zangbwal be nga nyoñe metoñe zangbwal a kômesane na ba zu loñe me.
7 Éngele ôsu a nga loñe toñe jé. A meta’a, a nduan é too mfulan a metyi bi nga bo, ane be nga wua bie si; a éyoñe ba kabe si ése mengabe melal, ngabe jia nje é nga dik, a éyoñe ba kabe bilé bise mengabe melal, ngabe jia ya été nje é nga dik, bilo’o bise bi mbe nyule bilo’o bi nga mane dik.
8 Éngele baa a nga loñe toñe jé. A jôm éziñ é too ane beta nkôl a yôñe nduan a nga wuabane mañ été. A éyoñe ba kabe mañe tañe mengabe melal, ngabe jia ya été é nga bo metyi;
9 a éyoñe ba kabe bevevee bitétéa* bi ne mañ été tañe mengabe melal, ngabe jia ya été é nga wu, a éyoñe ba kabe besitima mengabe melal, ngabe jia ya été é nga mane bôlé.
10 Éngele lale a nga loñe toñe jé. A beta ôteté a yôñe’e ane lambe a nga ku a so’o e yôp été, éyoñe ba kap asôé ése mengabe melal, ngabe jia ya été nje ñhe ôteté ôte ô nga ku yôp, a ô nga ku fe e mendime ma kui nsôlô.*
11 Éyôlé ôteté ôte é ne na Ayôl.* A éyoñe ba kabe mendime mengabe melal, ngabe jia ya été é nga kôñelan a bo ayôl, a abui bôt é nga wu amu mendime mete, amu mendim mete me nga mane bo ayôl.
12 Éngele nyini a nga loñe toñe jé. A éyoñe ba kabe nlô jôbô mengabe melal, ngabe jia ya été é nga biban, a éyoñe ba kabe ngone mengabe melal, ngabe jia ya été é nga biban, a éyoñe ba kap ateté mengabe melal, ngabe jia ya été é nga biban, ndemben éyoñe ba kabe biôme bite bise mengabe melal, ngabe jia ya été ja bo dibi, a môs ô ne bo te fe éfufup asu ngabe jia ya été a alu avale da.
13 A me nga yen, a me nga wô’ô ndôé é yele’e ézezañe yôp é yôta’ane na: “Éngôngol, éngôngol, éngôngole jam a bôte be too si, amu éduñe ja zu, metoñe beéngele belale ma ye loñ ana’ana!”
Notes
^ Nge ke, “éyaña’a.”
^ Nge ke, “bitétéa bi bili ényiñ.”
^ Nge ke, “menjeñ.”
^ A ne éfia Grec ja kobô ajô kane élok é ne ayôl é bili fe nsul.
