Kalate ôsu Jean a nga tili 2:1-29
2 A ayôme bone dam, ma tili mia mame ma asu na mi bo teke bo nsem éziñ. Ve nge môt a bo nsem, bi bili mvolô* wongane be Zambe, a ne zôsô, nnye a ne Yésus Krist.
2 A ne metuna’a ya late ngbwa* me nga veban asu na Zambe a jamé minseme miangan, sa ke émiangan étam, ve minseme mi bôte bese ya si.
3 Nge bia ke ôsu a tôñe metiñe me Zambe, nalé a ye liti bia na bi nga yeme fo’o nye.
4 Môt a jô na: “Me nga yeme Zambe,” ve a teke tôñe metiñe mé a ne nlaa minsos, a benya mejôô be nji bo be nye.
5 Ve môt ase a tôñe metiñe mé nnye a liti na, nye’ane Zambe wo bo ésaé ngumba ngumba be nye. Jame te nde ñhe da bo’olô na bia be Zambe bi ne nlatan.
6 Môt a jô na ba nye be ne jôme jia a ne ntindane ya ke ôsu a nyiñ ane Yésus a nga nyiñ.*
7 A bôte ma nye’e, me nji tili mia mfefé atiñ, atiñe ma tili mia é ne nnôm, mi nga wô’ô de aso atata’a. Nnôm atiñ ôte ô ne mejô mi nga wôk.
8 Ma tili fe mia mfefé atiñ; atiñ éte da fombô Yésus, da fombô fe mia amu na dibi da ke da jañ, ve éfufup é tatéya na ja faé.
9 Môt a jô na a ntoo éfufup été a too ke na a vini monyañe wé, a ngenane dibi si.
10 Môt a nye’e monyañe wé a ne éfufup été, teke jam éziñ é ne bo na a ku Zambe.*
11 Ve môt a vini monyañe wé a ne dibi si, a ke fe ôsu a wulu dibi été, a nji yeme vôm a ke, amu na dibi da bo na mise mé me kate yen.
12 A bone be bongô, ma tili mia amu na Zambe a jaméya mia minseme mienan amu jôé Yésus.
13 A beésa, ma tili mia amu mi nga yé’é yeme nyu a nyiñ aso atata’a. A bendôman, ma tili mia amu mi dañeya mbia môt. A bongô, ma tili mia amu mi nga yé’é yem Ésa.
14 A beésa, ma tili mia amu mi nga yé’é yeme nyu a nyiñ aso atata’a. A bendôman, ma tili mia amu mi ne ngul, mia ba’ale mejô me Zambe, mi dañeya fe mbia môt.
15 Te mia nye’e fatan ényiñe bôte ya si nyu ba nyiñe nge mame ba bo. Amu nge môt éziñ a nye’e mame mete, yeme na, nye’ane Zambe ô nji bo be nye;
16 amu nkômbane ya minsôn, nkômbane ya mis, e bo énguñ amu akum ô bili, be nji so be Tate, ve ba so be bôte ya si nyu.
17 Nde fe bôte bete a minkômbane miap ba ye lôt, ve môt a bo nkômbane Zambe a ye nyiñe nnôm éto.
18 A ayôme bongô, bi ntoo awolo da su’ulan, avale mi nga wô’ô na nsiñe Krist a zu, ve ma kate mia na, abui besiñe be Krist é ntoo valé, jame da liti bia na bi ntoo awolo da su’ulane nde ñhe le.
19 Be nga kôlô zañe jangan, ve be nji be ane bia;* nge be nga ye bo ane bia, be nga ye ke ôsu a tabe a bia. Ve be nga kôlô zañe jangan amu be nji be ngame jangan.
20 Nyu a ne étyi a nga ve mia ngul, ajô te, mia bese mi bili ñyeman.
21 Ma tili mia sa ke amu na mia dimine benya mejôô, ve amu mia yeme me a amu benya mejôô be vo’o biaé minsos.
22 Za a ne nlaa minsos? Ye sa ke môt a sôô na Yésus a nji bo Krist? Nyili ate a ne nsiñe Krist, nyu a sôô Ésa ba Mon.
23 Môt ase a ne mbo ésaé Mon a ne fe mbo ésaé Ésa. Ve môt a meme na a buni Mon a meme fe na a buni Ésa.
24 Ve mia, mia yiane ba’ale mame mi nga wôk atata’a. Nge mia ba’ale mame mi nga wôk atata’a, mia ye ke ôsu a ba’ale élat é ne zañe mia be Mon a élat é ne zañe mia be Ésa.
25 Nde fe, jame di nde émien a nga ka’ale bia: Ényiñe ya nnôm éto.
26 Ma tili mia mame ma amu bôte béziñe ba bôndé mefe’e ya du’u mia.
27 Ve mia, Zambe a nga tobe mia a ve mia ngule jé, ajô te nde, môte mfe a nji yiane beta ye’ele mia; ngule Zambe a nga ve mia nje ja ye’ele mia mame mese, ngul éte é ne été, é nji bo minsos. Kelané ôsu a ba’ale élate jenan a nye, avale ngule Zambe é nga ye’ele mia.
28 Ajô te, a ayôme bongô, kelané ôsu a ba’ale élate jenan a nye, asu na éyoñ a ye yené be mia, mi bo ngule ya kobô teke ko woñ, mia ye ke tube nye amu mia wôk ôson éyoñ a ye bo valé.*
29 Nge mia yeme na a ne zôsô, mia yeme fe na môt ase a bo mame me ne zôsô a so be nye.
Notes
^ Nge ke, “loya.”
^ Nge ke, “metuna’a ya buti minsem.” Lañe’e Atinane bifia, “Môse ya beta late ngbwa.”
^ Nkobô Grec, “wulu fo’o ve ane a nga wulu.”
^ Be ne fe jô na, “a vo’o tindi môt éziñe na a ku Zambe.”
^ Nge ke, “bôte bangan.”
^ Éfia Grec, “parousia.” Lañe’e Atinane bifia.
