Kalate baa Paul a nga tili Becorinthien 11:1-33
11 Ma yi na mi jibi akute dame mone jôm. Ve, nya ajôô, mia jibi ma!
2 Amu ma bo aban ajô denan a abane da so be Zambe* amu mamiene me nga ka’a mia aluk be nnôme wua, nnye ate a ne Krist, a ma ye liti mia be nye mi too mfuban a bindun.
3 Ve ma ko woñe na a zen éziñ, avale nyo é nga duk Ève a atyeñe medu’ane dé, asimesane denan é ndaman a yale mia fé a bo na, mi kôlô zôsôa zen a mfubane bia yiane Krist.
4 Amu, nge môt éziñ a zu kañete mia Yésus mfe a dañe nyi bi nga kañete mia, nge na, mia kañese nsisim ôfe a lôte wu mi nga nyoñ, nge mbamba foé mfe a lôte nyi mi nga kañese, mia kañese jame môt ate a jô tyi’ibi.
5 Amu, ma simesane na, teke jam éziñe da liti na, beta minlômane mienane mia dañe ma.
6 Ve to’o me nji yeme nkobô, me too ndi na me bili ñyeman; nde fe bi nga liti mia de abui meval, a abui mezen.
7 Nge na, ye me nga bo nsem amu me nga sili mamiene si na mi betebane yôp, amu me nga kañete mbamba foé Zambe mevak été teke sili mia moné?
8 Me nga nyoñe mvolan ô nga so bikôane bekristene bivok, a nalé a mbe ane ma wube bie na me saane mia.
9 Ôwé, éyoñe me mbe a mia, a na jôm é mbe é jemba’ane ma, me nji bo mbe’e asu môt éziñe ya be mia, teké’é fo’o, bebuni bevo’o be nga so Macédoine, be nga volô ma jalé miñyiane miame ya minsôn. Ôwé, me nga bo jam ése me mbe ngule ya bo na, me bo te sili mia jôm éziñ, a ma ye ke ôsu a bo nalé.
10 Aval é ne été na benya mejôô ya Krist be ne be ma, ma ye ke bo te bo éngelezek ajô éte ngoto ya Achaïe.
11 Amu jé? Ye amu me nji nye’e mia? Zambe a yeme na ma nye’e mia.
12 Ve jame ma bo ma ye ke ôsu a bo de, ndembene ba ba simesane na be ne ngule ya bo ésaé bia fe bia bo, a ba bo éngeleze’e mame be nga bo, be ne bo te bi amu ya bo de.
13 Amu bôte bete be ne bivôlevôla minlôman, be ne bôte ba du’u ba bevok, ba bo bebiene na be yené ve ane minlômane mi Krist.
14 A nalé a nji bo jame ya semé, amu Satan émien a ke ôsu a bo na a yené ane éngele ya éfufup.
15 Nde jame ya kam é nji bo valé, nge bebo bisaé bé fe, ba ke ôsu a bo bebiene na be bo ane bebo bisaé ya zôsô. Ve asu’ulane dap, da ye bo avale mimboone miap mi ne.
16 Ma beta jô na: Môt a bo’o te simesane na me ne akut. Ve to’o mia simesane nalé, kañesa’ané ma ane akute môt, ndembene ma fe me ne bo mon éngelezek.
17 Jame ma jô éyoñe ji, me nji jô de ane Tate a mbe ve jô, ve ma jô de ane môt a ne akut a ne de jô, nyi a too ndi a émien a nyi a bo éngelezek.
18 Amu abui da bo éngelezek amu mame ya minsôn,* ma fe ma zu je bo.
19 Mi ne angôndô ya “fek” aval é ne na, mia kate jibi bôte be ne mekut.
20 Nya ajôô, mia jibi môt ase a bo na mi bo alo, nyu a wôlé mia biôm, nyu a nyoñe biôme bise mi bili a nyu a bete émiene yôp ézezañe jenane nge nyu a bibi mia asu.
21 Bia wôk ôsone ya jô de, amu nalé a ne liti ane bi ne nte’an.
Ve nge bôte befe be nga liti na be ne ayok, ma kobô ane môt a ne akut, ma fe me ne ayok.
22 Ye be ne behébreu? Ma fe me ne mone hébreu. Ye be ne bôte ya Israël? Ma fe me ne môte ya Israël. Ye be ne mvoñe bôt Abraham? Ma fe me ne môte ya mvoñe bôt Abraham.
23 Ye be ne bebo bisaé be Krist? Ma fe ane akute ma yalane na ma ma dañedañe mbo ésaé Krist: Me nga saé a dañe be, me nga fetebane mimbôk a dañe be, be nga bôme ma étua ya abui, awu é nga too ma bebé.
24 Biyoñe biyoñe bitan, bejuif be nga bôme ma mebôme minkasa 40 ô vaa abôme da,
25 biyoñe biyoñe bilal, be nga bibi ma mimbeñ, be nga lume ma mekok éyoñe jia, éfunga é nga nyoñe mendime si a ma biyoñe bilal, me nga lôte ngumba alu a ngumba môs e mañ été;
26 a mulu biyoñe biziñ, beangôndô été asôé, beangôndô été be so’o be beze mimfaka, beangôndô été be so’o be bôte bame mamien, beangôndô été be so’o meyoñ, beangôndô été tison, beangôndô été nkôte si, beangôndô été e mañ été, beangôndô été be so’o ézezañe bobejañe be ne minsos,
27 ayaé ésaé a njuk ésaé été, melu méziñe teke ke ôyo, zaé a évé été, biyoñe biziñe teke jôme ya di, avep été a njembane jôme ya jaé.*
28 Nge ô vaa mame mete mese me ne mfa’a ya atan, jam afe da tyelé ma nleme yôbe môs ôse* é ne: biyebe me bili mfa’a ya bikôane bekristene bise.
29 Za a ne nte’an a me teke bo nte’an? Za a koléban ôbak a me teke yaa?
30 Nge ma yiane bo éngelezek, ma ye bo éngeleze’e mame ma liti ate’e dam.
31 Zambe a Ésa Tate Yésus, Nyu a yiane duma nnôm éto a nnôm éto, a yeme na me nji laane minsos.
32 E Damas, ngovina njô bôt Arétas a nga bo na be ba’ale tisone bôte ya Damas mfa’a ya na be bi ma,
33 ve be nga daa ma vundu a sili ma si, me too ékat* été mfine ya tisone na me tube nye.
Notes
^ Nkobô Grec, “ayoñe Zambe.”
^ Nalé a tinane na, mame môta binam a yen.
^ Nkobô Grec, “a soé.”
^ Nge ke, “ékeme ya môs ane môs.”
^ Nge ke, “ékate minloñ.”
