Kalate lale Jean a nga tili 1:1-14
1 Ma, nnôme môt,* ma tili Gaïus, mojañe ma nye’e, ma nye’e wo a nleme wom ôse.
2 A mojañe ma nye’e, ma ye’elane Zambe na mame mese ya ényiñe* jôé me ke ôsu a wulu mvo’é, fo’o ve avale ma wulu mvo’é éyoñe ji.
3 Amu me nga wô’ô mevak abui éyoñe bobejañe be nga so, a zu kate ma na wo kabetane benya mejôô, fo’o ve avale wo ke ôsu a tôñe benya mejôô.
4 Jam afe é nji ve ma meva’a nlem* ane éyoñe ma wô’ô na, bone bame ba ke ôsu a wulu benya mejôô été.
5 A mojañe ma nye’e, wo liti na wo yeme ba’ale élat éyoñe wo yeme nyoñe bobenyoñ, to’o be ne beyeñ.
6 Be nga kañete ékôane bekristen* ése na wo nye’e bobenyoñ. Éyoñe ba bulan, wo suu be avale da yiane mise me Zambe.
7 Amu be nga li’i menda map amu jôé dé, be nji yange jôm éziñe be bôte ya meyoñ.
8 Ajô te nde, bi ne ntindane ya bo avale bôt éte anyep, asu na bia be be bi bo beébe bebo bisaé ya benya mejôô.
9 Me nga tili ékôane bekristene jam éziñ, ve Diotréphès a bene kañese mame mese ma so be bia, amu a nye’e a ngesebe ékôane bekristen été.
10 Jôme te nje, nge ma zu wôé, ma ye kulane mbia mimboone mié, amu a ndamane bia éyôlé. A nji su’u valé, a bene nyoñe bobejañ a ésemé. Ve bobejañe ke ba kômbô be nyoñ a ésemé, a jeñe mezene ya kamane be na be bo de. A kômbô fe titane bobejañe bete ékôane bekristen.
11 A mojañe ma nye’e, te wo vu mbia mboon, ve ô vu mbamba mboon. Môt a bo mbamba be mam a so be Zambe. Ve nyu a bo mbia be mam a ngenane teke yeme Zambe.
12 Bobejañe bete bese ba kañete na Démétrius a ne mbamba ntaban, to’o benya mejôô ba bo’olô de. Biabebiene fe bia bo’olô de, a wo kôme yeme na bia bele.
13 Ma too fo’o me bili abui mame ya kate wo, ve me nji kômbô tili me afep.
14 Ve me too ndi na ma ye zu yene wo ana’ana, éyoñ éte bia ye laane bi lôane mesu.
Mvo’é é tabe’e be wo.
Bobejañe ya va ba batane wo. Wo fe bata’ane ma bobejañe ya wôé, ô lo’one môt ase a éyôlé jé.
Notes
^ Nge ke, “mvendé.”
^ Éfia Grec, psukhê. Lañe’e Atinane bifia, “Ényiñ.”
^ Be ne fe jô na, “beamu ya ve akiba.”
^ Nge ke, “akônda; kirké.”
