Kalate Paul a nga tili Beéphésien 1:1-23
1 Ma Paul, nlômane Krist Yésus amu nkômbane Zambe, ma tili mimfufube mi ne Éphèse, mi ne zôsô a mia wulu ba’aba’a a Krist Yésus:
2 Beta mvam a mvo’é bia so be Zambe Ésa wongan, a be Tate Yésus Krist bi tabe’e be mia.
3 Duma é bo’o be Zambe a Ésa Tate wongane Yésus Krist, amu a nga botane bia bibotane ya nsisim, e bito ya yôp été nsamba a Krist,
4 a nga tobe bia na bi bo jôme jia a nye* ôsusua na bone ba taté na ba bialé si, na bia yiane bo étyi a teke bijô ôsu wé a nye’an été.
5 Amu, a nga mane tyi’i melu mvuse na, bia ye bo bone bé a zene ya be Yésus Krist, aval a nye’e a avale nkômbane wé ô ne,
6 ékaña’a ya duma ya beta mvame wé a nga belane nye asu dangan a zene ya édima Mone jé.
7 A zene ya be nye, bia kôtéban amu ntañ ô nga so a zene ya metyi mé, yaa, njamane bikobe biangan, aval akume ya beta mvame wé é ne.
8 A zene ya beta mvam ate, a nga bo na fek a mbamba ñwô’ane mame* bi fuluku be bia,
9 amu a nga bo bia na bi yeme nsolane jam ô ne étyi ya nkômbane wé. Jam éte da wô’an a aval émien a yene mvaé, a émien a nga telé de ane nsôñane wé ô ne,
10 asu ñwulane mam,* a éyoñ éyoñ éte ja ye kpwaane na, a kôane biôme bise nsamba be Krist, biôme bi ne yôp a biôme bi ne si, ôwé, e be Krist,
11 a bia be nye, bi ne jôme jia, bi ne fe benyoñe élik a nye, aval é nga jôbane melu mvus, da wô’an a nkômbane nyu a tôé mame mese a tyi’i na a bo mfa’a ya nkômbane wé,
12 ndembene bia bi nga taté bi ndi nleme be Krist, bia ye ve nye ékaña’a asu duma dé.
13 Ve mia fe, mi nga bi ndi nleme be nye, éyoñe mi nga wô’ô benya mejôô, mbamba foé ya nyiiane wônan. Éyoñe mi maneya buni, mi nga bi sitam a zene jé a ngaka’a ya mfufube nsisim,
14 mfufube nsisim a ne ngaka’a ja liti bia na, bia ye bi jame Zambe a nga ka’a bia, Zambe a nga bo de, ndemben a ne ya’ane tañe ja ve bôte bé fili, mbe ba ye ve nye abui duma.
15 Ajô te nde, ma fe, nté ane me nga wô’ô be kobô’ô ajô ya mbunane mi bili be Tate Yésus, a nye’ane mi nga liti mimfufube mise,
16 ma ke ôsu a ve Zambe akiba ajô denan, ma ke ôsu a tote môé menane meye’elane mam,
17 na, e Zambe Tate wongane Yésus Krist, Ésa ya duma, a ve mia nsisime ya fek, a nlitane mame na mi kôme yeme nye.
18 A nga yoé mise ya minleme mienan, ndembene mi ne yeme ndi nlem a nga kômesan asu denan, mbamba be mame ba so élik é ne asu mimfufup
19 a avale beta ngule wé a yené be bia bebuni. Beta ngul ate a yené a aval a belane nye.
20 Nnye a nga belane nye be Krist éyoñ a nga wômôlô nye miñwuan a toé nye mbo nnôme wé e bito ya yôp,
21 a dañ éjôé ése a môt ase a bili éjôé a ngul ése a bengovina bese a jôé ése môt a ne be’e, sa ke fo’o ve émo* ji, ve émo fe ja zu.
22 A nga bôé fe biôme bise mebo mé si, a telé nye njôô ya biôme bise ya ékôane bekristen,*
23 nje é ne nyule jé, é ne njalan a biôme bise ajô dé, nnye a jalé biôme bise.
Notes
^ Nalé a tinane na a Krist.
^ Nge ke, “mbamba ñyenane mam.”
^ Nge ke, “nta’ane mam.”
^ Lañe’e Atinane bifia, “Émo.”
^ Nge ke, “akônda; kirké.”
