Mame minlôman 1:1-26
1 A Théophile, kalate* ôsu, me nga tili mame mese Yésus a nga taté na a bo, a ma a nga taté na a ye’ele,
2 akekui môs a nga bete yôp éyoñ a nga mane ve minlômane mié a nga tobe melep a zene ya mfufube nsisim.
3 Éyoñ a nga mane wu mintaé, a nga liti beyé’é bé abui mame da yemete na a vee, a nga yené be be tañe melu 40, a a mbe a kobô’ô be ajô ya Éjôé Zambe.
4 Nté a mbe ékôan a be, a nga jô be na: “Te mia kôlô e Jérusalem, ve kelané ôsu a yange jame me nga kate mia na Ésa wom a nga ka’ale mia;
5 amu é ne été na Jean a nga du bôte mendim été, ve mia, dene bone melu, mia ye duban a mfufube nsisim.”
6 Nde éyoñe be nga tôban, be nga sili nye na: “A Tate, ye éyoñe ji nje wo ye beta telé éjôé ya Israël?”
7 A nga jô be na: “É nji vebane be mia na mi yeme biyoñe nge melu Ésa wom émien a nga telé.*
8 Ve mia ye nyoñe ngul éyoñe mfufube nsisim a ye so be mia, a mia ye bo bengaa bam e Jérusalem, e Judée ase a Samarie a mfa’a si ja dañ ôyap.”
9 Éyoñ a nga mane jô mame ma, nté be mbe be fombô’ô nye, a nga betebane yôp a minkute mi mane buti nye e mise map été.
10 Nté be mbe be fombô’ô yôp, be lôô ane a ke, e teme na bôte bebaé be be’e bifumulu biyé be tele be fefel,
11 a be nga jô na: “A bôte ya Galilée, amu jé mi tele valé mi lôbô’ô yôp? E Yésus mia te yen a kele’e yôbe le, a ye fe so avale da da ane mia te yene nye a kele’e yôp.”
12 Nde be nga téé nkôle ba loone na Nkôle Beolivier na ba bulane Jérusalem, nnye ate a nji be ôyap a valé, jôm ane kilimita jia.*
13 Éyoñe be nga kui, be nga bete nda yôp, étune nda be mbe be tabe’e. E wôé a mbe na, Pierre a Jean a Jacques a André, Philippe a Thomas, Barthélémy a Matthieu, Jacques mone Alphée a Simon nyu a bo mam a nleme wé ôse a Juda mone Jacques.
14 Bese a nleme wua, be mbe be ye’elane mban, nsamba a binga béziñ a Marie nyia Yésus a bobenyañe be Yésus.
15 E melu mete, Pierre a nga tebe tetele ézezañe bobejañ (tañe* bôt é mbe ntôkan été wôé é mbe bebé bôte 120) ane a nga jô na:
16 “A bôt, a bobejañ, é mbe é yiane na éfuse ji é tôéban, nje éte mfufube nsisim a nga kobô a zene ya be David ajô Judas, nnye ate a nga bo môt a nga liti bôte be nga ke bi Yésus zen.
17 Amu Judas a mbe nsamba wongan, a a nga nyoñe ngap a ésaé ji.
18 (Nde môt ate émien a nga kuse si a ma’ane ya ékotekot. Éyoñ a nga ku si, nlô ô nga taté jimbi nye tyia, a mvuse ya valé nyule jé é nga bôlé,* a miñya mise mi nga mane kui nseñ.
19 Bôte bese ya Jérusalem be nga yeme jam éte, jôme te nje be nga yôlé abôta si éte nkobô wop na, Akeldama, nalé a tinane na, “Abôta si ya metyi.”)
20 Amu é ne ntilane kalate Besam na, ‘E vôm a mbe a too, a bo’o fo’o ve élik élik, a môte mfe a bo’o te tabe été, a asu ésaé dé, môte mfe a nyoñe’e de.’
21 Nde ñhe da yiane na, bôte bese be nga wulu a bia nté ôse Tate Yésus a mbe a bo’o bisaé bié* ézezañe jangan,
22 ataté éyoñe Jean a nga du nye, azekui môs a nga li’i bia na a ke yôp, môte wua ya bôte bete a yiane bo ngaa ya ñwômane miñwuane wé a bia.”
23 Nde be nga telé be bôte bebaé, Joseph a ne jôé na Barsabas, nnye fe ba loone na Justus, a ñyé’é mfe a ne jôé na Matthias.
24 Nde be nga ye’elan a jô na: “A Yéhôva,* wo wo yeme minleme mise, liti’i bia za ya bôte bana bebaé wo te tobe
25 na a nyoñ ésaé ji a éto nlômane ji, nje éte Judas a nga lik a ke vôme wé.”
26 Nde be nga wua mimbañ asu bebaane, a mimbañe mi nga ku be Matthias, ane be nga kô’ôlane* nye nsamba minlôman 11.
Notes
^ Nkobô Grec, “nkañete.”
^ Nkobô Grec, “telé éjôé jé si.”
^ Nge ke, “abime mone juif a mbe ngule ya wulu môse Sabbat.”
^ Nge ke, “nsamba.”
^ Nge ke, “abume dé é nga tui ézezañ.”
^ Nkobô Grec, “a bete’e a sisi’i.”
^ Lañe’e Atinane bifia.
^ Nge ke, “nyoñ.” Nalé a tinane na be mbe be yene’e nye ane minlôman 11 mivok.
