Mame minlôman 12:1-25
12 Bebé éyoñ éte, njô bôte Hérode a nga taté na a tibili bôte béziñe ya ékôane bekristen.
2 A nga wôé Jacques monyañe Jean a nkpwaté mekôn.
3 Éyoñ a nga yene na bejuif ba nye’e jam éte, nde fe a nga bo na be bi Pierre. (Jam éte é nga bobane melu ya Abô’ô ya belet é ne te mvusu.)
4 A nga bi nye a futi nye nda mimbôk, a telé minsamba bezimbi minyin, nsamba ôse ô bili bôte benyine be fola’ane na be ba’ale nye, amu a mbe a kômbô’ô kuli nye nseñe bôt été éyoñe Paska a lôteya.
5 Nde be nga ba’ale Pierre nda mimbôk, ve bebuni ya ékôane bekristene be mbe be ye’elane Zambe mban ajô dé.
6 Éyoñe Hérode a mbe a ntoo bebé ya kobô ajô dé, alu te Pierre a mbe a kele’e ôyo a tii a ngôkop ébaé ézezañe bezimbi bebaé, a beba’ale mimbô’ô be tele mbé be ba’ale nda mimbôk.
7 Ve e teme na, éngele Yéhôva* a ntele valé, a éfufup é nga faé nda mimbôk, vôme Pierre a mbe a fete. Ane éngele a nga nambe nye avel abum a vele nye a jô’ô nye na: “Tebe’e tetele avôl!” Ane bengôkôbe be mbe be tii nye mo be nga ku tyia.
8 Éngele a nga jô nye na: “Jaék biyé a besilefase minkole bôé mebo.” Nde a nga bo nalé. Mvuse ya valé a nga jô nye na: “Jaék éyé jôé ya yôp a tôñe ma.”
9 A nga kui atan a tôñe nye, ve a nji be a yeme’e na jame da te boban a zene ya éngele é mbe fo’o été, amu a mbe a buni’i na a te bi ñyenan.
10 Be nga lôte nsamba bezimbi ôsu a wu baa wo ba’ale nda mimbôk, ane be nga kui beta mbé étyé ya akak a suane tison, ane a nga yombô étam. Éyoñe be kuiya nseñ, be nga wulu mone nté njoñe njoñ, ane éngele a nga li’i nye étam.
11 Ane Pierre a nga yemelane jame da te boban a jô na: “Éyoñe ji ma kôme yeme na Yéhôva* a te lôm éngele wé na a zu nyii ma, mo me Hérode a fe jôm ése bejuif be mbe be yi na é kui be ma.”
12 Éyoñ a nga yemelane de, a nga ke nda be Marie nyia Jean, nnye be mbe be loone na Marc, vôme mon abime bebuni a mbe ntôkane na a ye’elan.
13 Éyoñ a nga kute mbé ya akak, ngone minga é mbe mbo ésaé é too jôé na Rhode é nga ke yalane nye.
14 Éyoñ a nga yeme tyiñe Pierre a mbe mevak aval é mbe na, a nji yoé nye mbé, ve a nga ke mbile nda été a kate bôte na Pierre a tele mbé si ya akak.
15 Be nga jô nye na: “Ô ntoo akut.” Ve a nga ke ôsu a yemete na Pierre a ne valé. Be nga taté na ba jô na: “A ne éngele.”
16 Ve Pierre a mbe a tele valé a kute’e mbé. Éyoñe be nga yoé mbé, be nga yene nye a bo fe’e ne vema.
17 Ve a nga febe wo wé na, be tabe bivôl a kate be avale Yéhôva* a te vaa nye nda mimbôk, a nga jô fe be na: “Kele’e katané Jacques a bobejañe mame ma.” Ane a nga kui nseñ a ke vôme mfe.
18 Nde éyoñe môs ô nga bo, beta zô’é a nga bo ézezañe bezimbi mfa’a ya yeme jame da te bo Pierre.
19 Nde Hérode a nga jeñe nye vôm ase ve teke yene nye, a nga ke sili beba’ale mimbô’ô minsili a bo fe na be ve be nya ngulu fonos; ane Hérode a nga siliki a kôlô’ô Judée na a ke Césarée, nde a nga ke tabe wôé mone nté.
20 A mbe a wô’ô bôte ya Sidon a ba ya Tyr ôlun,* nde bôte bete be nga tyik a nlem ôse na ba ke nye yen. Éyoñe be maneya kui tyiñ a Blastus, môt a mbe a wulu’u mame ya nda njô bôt,* be nga jeñe na be late ngbwa a nye amu si njô bôt ate nje é mbe é va’a si jap bidi.
21 Môse bôte be mbe na ba sulan, Hérode a nga mane jaé mengômesane me njô bôt a ke tabe si vôme ba tyi’i mejô a taté na a bo nkañete ya mengana bôt.
22 Nde bôte be nga mane sulane valé be nga taté na ba yôtane na: “Tyiñe Zambe, sa ke tyiñe môt!”
23 Été été éngele Yéhôva* a nga bibi nye, amu a nji ve Zambe duma, ane minsoñe mi nga di nye, mvuse ya valé a nga wu.
24 Ve mejô me Yéhôva* me nga mialan a abui bôt é nga buni.
25 Mfa’a Barnabas a Saul, éyoñe be nga kôme mane bo ésaé ya mimvolane Jérusalem, be nga bulan a nyoñe Jean, nnye fe be mbe be lo’one na Marc.
Notes
^ Lañe’e Atinane bifia.
^ Lañe’e Atinane bifia.
^ Lañe’e Atinane bifia.
^ Nge ke, “A mbe a kômbô’ô wosane bôte ya Sidon a ba ya Tyr.”
^ Nkobô Grec, “ntebele mame ya nda njô bôt.”
^ Lañe’e Atinane bifia.
^ Lañe’e Atinane bifia.
