Mame minlôman 28:1-31
28 Éyoñe bi nga kui kindi’i mvo’é, be nga kate bia na ékôte si éte é ne jôé na Malte.
2 Bôte ya valé* be nga bo bia angôndô ya mbamba nlem. Be nga bo’é nduan a nyoñe bia bese nya mvo’é, amu mveñ é mbe é noñe a avep é mbe.
3 Ve éyoñe Paul a nga be’e ébañe nja’a a bôé je nduan été, akpwe é nga so ébañe nja’a été amu ayôñe ya nduan a fa’abe nye wo.
4 Éyoñe bôte ya vôm ate be nga yen ane akpwe é fa’a nye wo, môt ase ya bebe a nga taté na a jô nyu mbo’o na: “Môte nyi a yiane bo ñwôé bôt akusa bo na a te nyiñe mañ été, Zôsô* a nji kañese na a ke ôsu a nyiñ.”
5 Ve a nga samese nyo na é ku nduan été a mbia jam éziñ a nji kui nye.
6 Ve be mbe be buni’i na a zu mane vuse nge ki na a zu wu. Ve éyoñe be yangeya ayap éyoñ a yene na jô éziñ é nji bo nye, be nga tyendé ôsimesan a jô na a ne zambe.
7 Bebé vôm ate, mesi me ntebe ôsu ya ékôte si me mbe valé, môt ate a mbe jôé na Publius. A nga nyoñe bia abeñ a ba’ale fe bia nda jé tañe melu melal.
8 Ésa Publius a mbe a konô’ô ntyui metyi a bôô si, tit* é mbe é bili nye, nde Paul a nga ke yene nye, a nga ye’elan a beté nye mo, ane a nga bo mvo’é.
9 Éyoñe nalé a bobaneya, bôte bevo’o ya ékôte si be mbe minkôkon, be nga taté na ba zu vôme Paul a mbe a be nga bo mvo’é.
10 Be nga ve bia abui biôme na be liti bia ésemé a éyoñe bi nga bet éfunga, be nga ve bia biôme bise bi mbe bi yiik.
11 Éyoñe bi lôteya ngon élal ékôte si éte, bi nga bet éfunga é bili bive’ela bi “Bone be Zeus.” Éfunga éte é mbe é so’o Alexandrie a é nga lôt éyoñe ya avep ékôte si.
12 Bi nga tebe été besitima ya Syracuse a tabe melu melale vôm ate;
13 nde bi nga kee dulu dangan ôsu, a kui Rhegium. Tyé kpwaa, évuñulu é mbe é so’o sud é nga vuñ a mvuse melu mebaé, bi nga kui Puteoli.
14 Bi nga koone bobejañe vôm ate a be nga yemete bia na bi tabe a be melu zangbwal, mvuse ya valé bi nga ke mfa’a ya Rome.
15 Éyoñe bobejañe ya Rome be nga wô’ô na bia zu, be nga wulu be so’o vôme ba loone na Nseñe makit Appius a Menda beyeñe melale na be zu yene bia. Éyoñ a nga yene be, Paul a nga ve Zambe akiba a bi ngule nyul.
16 Éyoñe bi nga su’ulane kui Rome, be nga ve Paul ôva’a ngule na a tabe nda jé étam, mone bezimbi a ba’ale nye.
17 Ve mvuse melu melal, a nga loone betebe ôsu bejuif éyoñe be nga sulan, a nga jô be na: “A bôt, a bobejañ, akusa bo na me nji bo mbia jam asu bôt a fe asu metume bemvamba bangan, me nga veban ane mone mimbô’ô mo be beromain aso Jérusalem.
18 Éyoñe be nga mane fas ajô éte, be nga kômbô suu ma amu teke jam éziñe me nga bo da yiane na be wôé ma.
19 Ve bejuif be nji kañese ntyi’an ajô ôte, nde ñhe me nga bo ntindane ya kee ajô dame be César, ve me nji bo de amu na ma kômbô soman ayoñe dam.
20 Ajô te nde ma te bañete mia na me kobô mia, amu a ne amu ndi nlem Israël nde me be’e bengôkobe ba.”
21 Be nga jô nye na: “Bekalate béziñe be nji so bia Judée ajô dôé a mojañ éziñ a nji so wôé, a zu kate bia mbia jam éziñ a fombô’ô wo.
22 Ve bia yene na é ne mvo’é na bi wôk ôsimesane wôé womien, amu bia yeme na vôm ase ba kobô ñyebe ôte abé.”
23 Ane be nga kui tyiñe mfa’a ya môse be mbe be yiane tôban, nde be nga so abui vôme Paul a mbe a too. Ataté mame tyé a kui mame ngô’é, a nga belane Metiñe me Moïse a mejô bekulu mejô, a timi’ine be me a kañete’e fe be ajô ya Éjôé Zambe, a nsôñane ya dutu be na be buni Yésus.
24 Bôte béziñe be nga taté na ba buni mam a mbe a jô’ô, ba bevo’o ki be nji buni.
25 Nde amu be nji kui tyiñe be be, be nga taté na ba kôlô vôm ate, a Paul a nga jô na:
“Mfufube nsisim a nga kôme fo’o kobô bemvamba benan a zene ya nkulu mejô Ésaïe,
26 a jô’ô na, ‘Kele’e be bôte ba a jô’ô be na: “Mia ye fo’o kee melo ve teke wôk atinane ya été, mia ye fo’o fombô ve teke yene jôm.
27 Amu nleme bôt ô ntoo ayet, be maneya fete melo map, be maneya fe fete mise map na be bo teke yen a vô’ôlô a melo map, a wôk atinan a nleme wop, a bulane be ma na me saé be.”’
28 Yemané ñhe na, nyiian ôte wo so be Zambe ô lômbaneya be bôte ya meyoñ, amu é ne fo’o été na, bôte bete ba ye vô’ôlô.”
29 *——
30 A nga tabe nda a mbe a yaka’ane mimbu mibaé, a nyoñe bôte be mbe be za’a yene nye valé a mbamba nlem,
31 a kañete’e be Éjôé Zambe, a ye’ele’e be teke ko woñe* mame ma fombô Tate Yésus Krist, jam éziñ é teke nye ndeñele.
Notes
^ Nge ke, “Bôte ba kobô nkobô ôfe.”
^ Éfia Grec Dikê, be ne belane je mfa’a ya kobô ajô zambe minga a ne zôsô, a too fe ngule ya bo akuna’a, be ne belane je mfa’a ya kobô ajô ya zôsô émien.
^ Nkobô Grec, “ayôñ.”
^ Minnôme mimvulekane bekalate miziñe mi nji bi éfus éte, da kôme fo’o yené na é nji bo ngabe ya mimfufube mintilan.
^ Nge ke, “a ayok ése.”
