Kalate Paul a nga tili Beromain 16:1-27
16 Ma liti mia Phœbé, kale jangan, nnye ate a ne nkañete mbamba foé ya ékôane bekristene* ya Cenchrées,
2 nde mi ne nyoñe nye e Tate été, aval ane da yiane mimfufup, a mi ve nye mvolan ôse wo sili nye, amu nye fe a nga kaman abui bobejañ, to’o mamien.
3 Mi bata’ane ma Prisca ba Aquilas, bia be be bi nga saé nsamba asu Krist Yésus,
4 mbe bete be nga ye wu asu dam,* sa ke ve asu dam étam, ve asu bikôane bekristene bise ya meyoñ; bia ve be akiba.
5 Mi bata’ane fe ékôane bekristene ja sulane nda jap. Mi bata’ane ma Épénète, nyu ma nye’e, nye fe a ne môte wua ya bôte be nga taté bo bekristen Asie.
6 Mi bata’ane ma Marie, nnye a nga saé abui asu denan.
7 Mi bata’ane ma Andronicus ba Junias, bivuvumane biam, bia bebe bi mbe mimbôk, minlômane mia kôme be yem, a be tôñeya Krist ayap éyoñ a lôte ma.
8 Mi bata’ane ma Ampliatus, nyu ma nye’e be Tate.
9 Mi bata’ane ma Urbain, môte bia be nye bia saé e Krist été, a Stakys nyu ma nye’e.
10 Mi bata’ane ma Apélès, nnye Krist a yene mvaé. Mi bata’ane ma Aristobule a bôte ya nda jé.
11 Mi bata’ane ma Hérodiôn, nnye ate a ne évuvumane jam. Mi bata’ane ma bôte ya nda Narcisse be ne be Tate.
12 Mi bata’ane ma Tryphène baTryphose, binga ba saé abui asu Tate. Mi bata’ane ma Persis, nyu bia nye’e amu a nga saé abui asu Tate.
13 Mi bata’ane Rufus, nnye ate a nga toban Tate été ba nyia wé, nnye fe a ne nyia wom.
14 Mi bata’ane ma Asyncrite, Phlégôn, Hermès, Patrobas, Hermas, a bobejañe be ne a be.
15 Mi bata’ane ma Philologue a Julie, Nérée ba kale jé, a fe Olympas, a mimfufube mise mi ne a be.
16 Môt ase a wuba’ane* nyu mbok a ôsesa. Bikôane bekristene bise bia batane mia.
17 Nde a bobejañ, ma lebe mia na mi ke ôsu a véé mise mfa’a ya ba ba soo nkanda’ane mengam, a ba ba bo mame ma kolé bôte bevok ôbak, mme mete ma selan a ñye’elane mi nga bi, sa’alané be.
18 Amu avale bôt éte é ne alo, sa ke di Tate Krist, ve di ya minkômbane miap ya minsôn,* ba belane mbamba bifia a mbamba minkobô na be wone minleme mi bôte be ne teke tabe ntyel.
19 Bôte bese be yemeya mewô’ô menan, jôme te nje ma vak mfa’a wônan. Ve jame da, ma yi na mi bo fek mfa’a ya mame me ne mvaé, ve bôte be ne te bijô mfa’a ya mbia be mam.
20 Mfa’a wé, Zambe a ve mvo’é a ye ko’o Satan mebo menane si ana’ana. Ngo’o nge beta mvame Tate wongane Yésus a tabe be mia.
21 Timothée nyu bia nye bia saé a batane mia, a Lucius, Jason a Sosipater, bivuvumane biam.
22 Ma Tertius, nyu a nga tili mame ma, ma batane mia e Tate été.
23 Gaïus, nyu a ba’ale ma nda jé, a ékôane bekristen ése ba batane mia. Éraste, mba’ale nkobe ya tison a batane mia ba monyañe wé Quartus.
24 *——
25 Zambe a ne wônô mia a zene ya mbamba foé ma kañete, a zene ya foé Yésus Krist ma kañete, foé éte é nga kuliban a zene ya nsolane jam ô ne étyi, den a ntoo ayap éyoñ.
26 Ve foé éte é nga litibane be bia éyoñe ji, a bi nga yeme je a zene ya minkulane mejô mi Zambe wongane ya nnôm éto, a nga jô na foé éte é katebane be bôte ya meyoñ, mfa’a ya na be bo mewôk a zene ya mbunan;
27 Zambe nnye étam a ne fek, a nyoñe’e duma amu Yésus Krist, nnôm éto a nnôm éto. Amen.
Notes
^ Nge ke, “akônda; kirké.”
^ Éfia Grec, psukhê. Lañe’e Atinane bifia, “Ényiñ.”
^ Nkobô Grec, “Môt ase a bata’ane nyu mbo’o mebatane ya étyi a anyu.”
^ Nge ke, “mebune map.”
^ Minnôme mimvulekane bekalate miziñe mi nji bi éfus éte, da kôme fo’o yené na é nji bo ngabe ya mimfufube mintilan.
