Kalate Paul a nga tili Beromain 3:1-31
3 Mfi ôvé ô ne na ô bo mone juif nge na ô bo ntyi’an atyel?
2 Mame mete me ne mfi abui mezen. Jam ôsu é ne na, bôte bete mbe be nga ve mimfufube mintilane mia so be Zambe.
3 Nde ñhe bi ne jô aya? Nge bejuif béziñe ba jembane mbunan, ye njembane mbunane wop wo bo na Zambe a bo te bo zôsô?
4 Momo! Nya ajôô a ne na, Zambe a kobô benya mejôô to’o môta binam ase a ne nlaa minsos, fo’o ve aval é ne ntilane na: “Mejô môé ma ye liti na ô ne môt a wulu zôsô été a éyoñe ba ye tyi’i wo mejô wo ye kabe.”
5 Ve nge ékotekote jangane ja ngôné zôsô Zambe, jé bia ye ñhe jô? Zambe a nji bo ékotekot éyoñ a liti ayaa dé nga? (Ma kobô ane môta binam.)
6 Teke bebé! Nge é ne ñhe nalé, nne Zambe a ye tyi’i bôte ya si nyu mejô aya?
7 Ve nge a zene ya minsose miam, zôsô Zambe a kôme yené ne fômelé a duma dé, amu jé ba tyi’i ma ajô a loone ma na me ne mbo nsem?
8 Nde amu jé bi nji jô avale bôte béziñe ba bu’u bia ajô na bia jô na, “Mbo’ané mbia be mam, ndô’ôtô mbamba be mame be ne so”? Fonose bôte bete ba yiane je é ne zôsô.
9 Nde ñhe, ye bia ye simesane na bia dañe bôte bevok? Teké’é fo’o! Amu yôp, bia te jô na bejuif ane begrec bese be ne éjôé nseme si;
10 fo’o ve aval é ne ntilane na: “Teke ve môte wua a ne zôsô, to’o ve wuwua;
11 teke môte wuwua a fase jam a yiane bo; teke môte wuwua a jeñe Zambe.
12 Bôte bese be kôlôya mbamba zen, bese be ntoo teke nya jame, teke wua a liti na a ne mbamba nlem, teke fo’o ve wuwua.”
13 “Bingoñe biap, bi ne soñ é yoo; ba bo medu’an a ayeme dap, biyaé biap bi ne nsule nyo.”
14 “A menyu map me ne njalan a biyo’é a bifia bia liti na ba wô’ô môte mbo’o mbia ôlun.”
15 “Mebo map, me ne avôle ya ke sôé metyi.”
16 “Kom ése ba bo na éndaman é kui be bôt a na be tôban abui minjuk,
17 a be nji yeme zene ya mvo’é.”
18 “Be nji ko Zambe woñ.”
19 Ve bia yeme na, mame mese me ne ntilane Metiñe me Moïse me ne ntilan asu bôte be ne Metiñe me Moïse si, mfa’a ya na anyu ése é tabe évôl a na bôte ya si ése be nyoñe mekua mise me Zambe.
20 Nde teke môt* a ye bi mekabe na a ne zôsô mise mé a zene ya mimboone ya Metiñe me Moïse, amu Metiñe me Moïse mme ñhe ma bo na bi yeme na bi ne bebo minsem.
21 Ve éyoñe ji, zosô Zambe a nga yené ôsusua Metiñe me Moïse, avale Metiñe me Moïse a mejô bekulu mejô ba liti,
22 ôwé, zôsô Zambe a zene ya mbunane be Yésus Krist a ne asu bôte bese be bili mbunan. Amu teke nsela’ane éziñ a ne zañe bejuif a begrec.
23 Amu bese be nga bo nsem a teke wua a kui duma Zambe bebé.
24 Yésus Krist a nga kôté be éyoñ a nga ya’ane ntañ asu nsem, a zen éte be mbili mekabe na be ne zôsô mise me Zambe. A Zambe a nga ve be mvean ô ne zezé ôte amu beta mbamba nleme wé.
25 Zambe a nga ve nye ane metuna’a ya late ngbwa,* a zene ya mbunane ya metyi mé. Jam éte é nga bobane na a liti zôsô wé, amu Zambe a nga bi nleme wé* na a jamé minseme mi nga bobane melu ya mvus.
26 Jam éte é nga boban asu na a liti zôsô wé éyoñe ji a na a bo zôsô to’o éyoñ a ve môt a bili mbunane be Yésus mekabe na a ne zôsô.
27 Ajô te éngeleze’e jangan é ne vôme mbé? É ne momo a zene ya atiñ avé? Ye di ya mimboon? Teké’é fo’o, ve a zene ya atiñe ya mbunan.
28 Amu bia yeme na môt a bi mekabe na a ne zôsô amu mbunan, sa ke amu mam a bo amu a tôñe metiñ.
29 Nge ke na, ye Zambe a ne ve Zambe bejuif? Nga a ne fe Zambe bôte be nji bo bejuif? Ôwé, a ne fe Zambe bôte be nji bo bejuif.
30 Amu Zambe a ne ve wuwua a ye ve bôte be ne ntyi’an atyele mekabe na be ne zôsô amu mbunan, a ye fe jô bôte be nji bo ntyi’an atyele na be ne zôsô a zene ya mbunane wop.
31 Ye bia zu ñhe tyame Metiñe me Moïse a zene ya mbunane wongan? Teké’é fo’o! Ve bia yemete yemete Metiñe me Moïse.
Notes
^ Nkobô Grec, “nsôn.”
^ Nge ke, “metuna’a ya buti minsem.” Lañe’e Atinane bifia, “Metuna’a ya late ngbwa.”
^ Nge ke, “jibi.”
