Kalate Paul a nga tili Beromain 7:1-25
7 A bobejañ, ye é ne bo na mi nji yeme na (amu ma kobô a bôte ba yeme Metiñe me Moïse), Metiñe me Moïse ma jôé môte nté ôse a ngenan a vee?
2 Éve’an é ne na, minga a ne nlu’an a ne atiñe nnôme wé si, nté ôse nnôme wé a ngenan a vee; ve nge nnôm a wu, a ntoo fili mfa’a ya atiñe nnôme wé.
3 Nde ñhe, nté ôse nnôme wé a ngenan a vee, a ye loobane na minga mejiane nge a bo minga môte mfe. Ve nge nnôme wé a wu, a nji beta bo atiñe nnôme wé si, nde a nji bo minga mejiane nge a bo minga môte mfe.
4 Nde a bobejañ, mia fe mi ntoo bôte be nga wu mfa’a ya Metiñe me Moïse, a zene ya nyule Krist na mi bo bôte be môte mfe, nyu a nga wômô miñwuane mfa’a ya na mi wume bibuma asu Zambe.
5 Éyoñe bi mbe bi nyiñi’i avale minkômbane ya minsône mi ne, Metiñe me Moïse me nga liti de ne ngeññ na, mbia minkômbane miangane ya minsône mi nga bo na, menyule* mangane me bo nsem a na, nsem ôte wo kee bia awu.
6 Ve éyoñe ji, bi kôlôya Metiñe me Moïse si, amu bi ntoo bewu mfa’a ya jôm é mbe é bili bia mimbôk, asu na bi bo alo mfa’a ya mfefé zen a zene ya nsisim, sa ke mfa’a ya nnôma zen a zene ya nkobe metiñ ô mbe ntilan.
7 Nde bi jô aya? Ye Metiñe me Moïse me ne nsem? Teké’é fo’o! Nya ajôô, me nji ye yeme nsem, nge Metiñe me Moïse me nji be. Éve’an é ne na, me nji ye yeme minyamete nge Metiñe me Moïse me nji ye jô na: “Ô nji yiane nyamete.”
8 Ve nsem ô nga belan atiñe di mfa’a ya bo na avale minyamete dam ése é yené. Nge teke atiñ éte, nsem ô ne teke ngul.
9 Ôwé, ôsusua, me mbe me nyiñi’i teke Metiñe me Moïse. Ve éyoñe Metiñe me Moïse me nga suan, nsem ô nga beta taté na wo nyiñ, ve ma me nga wu.
10 Atiñ é mbe é yiane kee ma ényiñ, me nga su’ulane yene na da kee ma awu.
11 Amu nsem ô nga yene fan atiñ é nga ve wô, a du’u ma, a wôé ma a zene ya atiñ.
12 Nde, Metiñe me Moïse mebiene me ne étyi, a atiñ é ne étyi, zôsô a mvaé.
13 Nsem ô nga bo de, ñwô ôte ô nga kee ma awu a zene ya jôm é ne mvaé, nje éte ja kôme liti jôme nsem ô ne. A zen éte, atiñe da liti abim avé nsem ô ne abé.
14 Amu bia yeme na, Metiñe me Moïse ma so be Zambe, ve ma, me ne môte ya minsôn, me nga kuabane nsem.
15 Amu me nji kôme wô’ô jame ma bo. Nya ajôô, me nji bo jame ma kômbô, ve ma bo jame ma vini.
16 Ve nge ma bo jame me nji kômbô bo, ma bo’olô na Metiñe me Moïse me ne nya mvaé.
17 Ve éyoñe ji, sa ke ma ma bo de, ve nsem ô ne be ma.
18 Amu ma yeme na be ma, nalé ate a tinane na minsône miam été, mbamba jam éziñ a nji bo. Amu me bili nkômbane ya bo jam é ne mvaé, ve teke ngule ya bo de.
19 Amu, mbamba jame ma kômbô bo me nji bo nye, ve mbia jame me nji kômbô bo nnye ñhe ma viane bo.
20 Nde, nge ma bo jame me nji kômbô bo, sa ke ma ma bo de ve nsem ô kômeya éto be ma.
21 Ma yene fo’o atiñe di mfa’a wome na: Éyoñe ma kômbô bo jam é ne zôsô, di é ne abé nde ñhe é ne be ma.
22 Nya ajôô, môte me ne nleme wom été, a nye’e metiñe me Zambe,
23 ve me lôô e nyule jam* été atiñ afe, nde éte da wosan atiñe da wulu asimesane dam, a da kee ma ane mone mimbôk, mfa’a ya atiñe ya nsem, nde é ne ma nyul* été.
24 Za aval éngôngole môte me ne di! Za a ye nyii ma nyule ja kee ma awu nyi?
25 Ma ve Zambe akiba a zene ya be Yésus Krist Tate wongan! Nde ñhe, a zene ya asimesane dam, me ne ôlo ya atiñe Zambe, ve a zene ya miñsône miam, me ne ôlo ya atiñe ya nsem.
Notes
^ Nkobô Grec, “bibu’a ya menyul.”
^ Nkobô Grec, “bibu’a ya nyul.”
^ Nkobô Grec, “bibu’a ya nyul.”
