Mbamba foé Luc a nga tili 17:1-37
17 Nde a nga jô beyé’é bé na: “Mame ya kolé ôba’a me vo’o bo te so. Ve ngo’o môt a soo me!
2 Da ye dañe bo mvo’é mfa’a wé, nge ba tiñeti nye ako’o ba ko’o de bidi tyiñ a wua nye mañ été, a lôte na a bo na mongô wua ya bongô ba a kolé ôbak.
3 Taba’ané ntyel a miabebien. Nge monyoñ a bo nsem, komeka’ane nye a nge a kôñelane nleme jamé’é nye.
4 To’o ébien a bo wo mbia jame biyoñe zangbwal môs, a zu fe yene wo biyoñe zangbwal a jô’ô na, ‘Ma sili njaman,’* wo yiane jamé nye.”
5 Ane minlômane mi nga jô Tate na: “Kô’ôlane bia mbunan.”
6 Nde Tate a nga jô na: “Nge mi nga ye bi mbunan ô too abim ane fese moutarde,* mi nga ye jô élé ji na, ‘Fumu’u va a ke bébane mañ été!’ A é nga ye wô’ô mia.
7 “Za ya be mia a bili ôlo wo bé nye mefup, nge wu wo ba’ale mintômba mié, a ye jô wô éyoñ a so afube na: ‘Za’a taté tabe va bi di’?
8 Nga a ye viane jô nye na: ‘Kômesa’ane ma jôme ya di asu mame ngô’é a jaé éyé bisaé a saane ma akekui ma ye mane di a nyu, mvuse ya valé wo fe wo ye bo ngule ya di a nyu’?
9 Ye a ye sek ôlo amu wo te bo mam a te jô wô na ô bo? Momo!
10 Avale da da éyoñe mi maneya bo bisaé bise ba te ve mia na mi bo, jô’ané na, ‘Bi ne ve zezé alo, bia te bo fo’o ve jame bia yiane bo.’”
11 Nté a mbe a kele’e Jérusalem, a nga tyii e zañe Samarie a Galilée.
12 Éyoñ a mbe a nyiine nlam éziñ, minzezam awôme mi nga yene nye, ve mi mbe mi tele nye ôyap.
13 A mi nga bete metyiñe yôp a jô na: “A Yésus, a Ñye’ele, mvama’ane bia!”
14 Éyoñ a nga yene mie, a nga jô mie na: “Kelané liti miabebiene be beprêtre.” Nté mi mbe mi kele’e wôé, mi nga yet.
15 Wua ya be be, éyoñ ô nga yene na ô ntoo mvo’é ô nga bulan a bete tyiñe yôp a ve Zambe duma.
16 Ô nga kute fe meboñ a luu asu si ô va’a Yésus akiba. Nde fe, ô mbe mone samaritain.
17 Yésus a nga jô na: “Nga bôt awôme bese ba te yet, nde ba bevok ébul be ne vé?
18 Ye môte mfe a nji bulan a zu ve Zambe duma ane ô vaa môte ya ayoñ afe nyi?”
19 Ane a nga jô nye na: “Tebe’e tetele ô ke zene jôé, mbunane wôé ô saéya wo.”
20 Amu bepharisien be nga sili nye éyoñ Éjôé Zambe ja ye so, a nga yalane be na: “Éjôé Zambe ja ye ke so avale bôte be ne yen a mis;
21 bôte ba ye ke jô na: ‘Fombô’ô va!’ Nge, ‘Li!’ Amu yenané! Éjôé Zambe é ne ézezañe jenan.”
22 Ane a nga jô beyé’é na: “Melu ma ye bo, éyoñe mia ye kômbô yene môse wua ya mimôse mi Mona môt, ve mia ye bo te yene wô.
23 A bôte ba ye jô mia na: ‘Fomba’ané li!’ Nge, ‘Fomba’ané va!’ Te mia ke, nge tôñe be.
24 Fo’o ve ane felefese ja ves ataté aku’u yôbe di akekui aku’u yôp avok, nne fe Mona môt a ye bo nalé môse wé.
25 Ve a yiane taté tôban abui minjuk, a miaé bôte wu wo ye bene nye.
26 Nde fe, fo’o ve aval é nga bobane melu me Noé, aval éte fe da ye bo melu me Mona môt:
27 be mbe be ja’ak a nyu, befame be mbe be lu’uk binga, be va’a fe binga meluk, akekui môse Noé a nga nyiin arche a ndône mendim é nga so é mane wôé be bese.
28 Avale da da, fo’o ve aval é nga bobane melu me Lot: be mbe be ja’ak, be mbe be nya’ak, be mbe be kusu’uk, be mbe be ku’an, be mbe be béék, be mbe be lôñek.
29 Ve môse Lot a nga kôlô Sodome, nduan a soufre bi nga so yôp ane mveñ a mane wôé be bese.
30 Nde fe da ye bo nalé môse Mona môt a ye yené.
31 “Môs ôte, môt a ne nseñe ya nda yôp, ve biôme bié ki bi too nda été, a bo’o teke sise na a ke to’é bie, a avale da da, môt a ne afup a bo’o teke bulane ke nyoñe biôm a te li’i mvus.
32 Simesa’ané nga Lot.
33 Môt ase a jeñe na a kaman ényiñe* jé a ye sube je; ve nyu a sube je a ye ba’ale je.
34 Ma kate mia na alu éte, bôte bebaé ba ye bômbô énoñe jia, ba ye nyoñe wua, ve ba ye li’i nyu mbok.
35 Binga bebaé ba ye ko’o mefese vôme wua, ba ye nyoñe wua ve ba ye li’i nyu mbok.”
36 *——
37 Ane be nga sili nye na: “A Tate, nne mame mete ma ye bobane vé?” Ane a nga jô be na: “Vôme mbim* ô ne, nne fe bendôé ba ye sulane valé.”
Notes
^ Nkobô Grec, “Ma kôñelane nlem.”
^ Fese moutarde ja funane sesame.
^ Éfia Grec, psukhê. Lañe’e Atinane bifia, “Ényiñ.”
^ Minnôme mimvulekane bekalate miziñe mi nji bi éfus éte, da kôme fo’o yené na é nji bo ngabe ya mimfufube mintilan.
^ Nkobô Grec, “mbime môt, nge ke mbime tit.”
