Mbamba foé Luc a nga tili 21:1-38
21 Éyoñ a nga bete mis, a nga yene minkukume mi bo’o mimveane minkop* été.
2 Ane a nga yene nzôzoé nkuse minga ô futi’i bone minsañe mi moné mibaé mi nji be dia,*
3 a a nga jô na: “Ma jô fo’o mia na, nzôzoé nkuse minga wu, wo te ve abui a dañ abime bôte bevo’o bese ba te ve.
4 Amu ba bese ba, ba te futi abim é nga bu’u be, ve nye, azoé dé été,* a te futi abime moné ése a mbe a bili na a nyiñ a de.”
5 Mvuse ya valé, éyoñe bôte béziñe be mbe be kobô’ô ajô ya Temple, aval a mbe abeñe nkoman a mbamba mekok a biôme be nga ve Zambe,
6 a nga jô na: “Biôme mi lôô dene bi, melu ma zu, ako’o da ye bo te li’i é bete di vo’o yôp, a bo te tyameban.”
7 Ane be nga sili nye nsili, be jô’ô na: “A Ñye’ele, mame ma ma ye fo’o boban éyoñ évé, a ndeme fé ja ye liti bia na mame ma me ntoo bebé ya boban?”
8 Ane a nga jô na: “Taba’ané ntyele na, môt éziñ a du’u mia, amu abui bôte da ye so, é bela’ane jôé dam, é jô’ô na, ‘Ma me ne nye,’ a ‘Éyoñ é ntoo bebé.’ Te mia tôñe be.
9 Nde fe, éyoñe mia ye wôk ajô bita a jo’ojo’o,* te mia ko woñ. Amu mame ma ma yiane taté boban, ve asu’ulane da ye ke so été été.”
10 Ane a nga jô be na: “Ayoñe da ye wosan ayoñ avok, a éjôé ja ye wosan éjôé évok.
11 Beta mimfô’ôsane mi si mia ye bo bevôme bevôm, nde fe, bemfumbale ya zaé a bibubua bi akone bia ye bo bevôme bevôm; a mame me ne éko woñe ma ye boban, a beta mendeme me so’o yôp.
12 “Ve ôsusua na mame mese ma ma boban, bôte ba ye bi mia a tibili mia, ba ye kee mia besynagogue a menda mimbôk, a ba ye kee mia ôsu be bejô bôt a be bengovina amu ma.
13 Nalé a ye ve mia fane ya kañete.
14 Nde fe, nyoñané ntyi’ane minleme mienan été na, mi bo teke kômesan avale mia ye kamane miabebien,
15 amu ma ye ve mia bifia a fek, ndembene besiñe benane bese fufulu ba ye bo te ngule ya yalane mia nge sôane mia.
16 Nde fe, to’o bebiaé benan, bobenyañe benan, bivuvumane bienan a bemvôé benane ba ye bo na be bi* mia. A bôte béziñe ya be mia ba ye wôéban,
17 a bôte bese ba ye vini mia amu jôé dam.
18 Ve to’o koñ ésile ya minlô mienane ja ye ke jañ.
19 Mia ye nyii miabebien* amu mbane ya jibi wônan.
20 “Ve éyoñe mia ye yene Jérusalem a too mbôma’ane a minkane bezimbi, yemané na ntyamane wé ô ntoo bebé.
21 Ajô te bôte be ne Judée be taté na ba tup a ke minkôl, ba be ne tison été be tup, a ba be ne minlame mvus, be bo te beta zu nyiin été,
22 amu melu mete me ne ma ya nkunane bôt, ndembene mame mese me ne ntilane me ne tôéban.
23 Ngo’o binga ba ye bo mebum, a ba ba ye nyia bone melu mete! Amu beta njuk a ye kui si, beta ayaa a ye fe bo be bôte ba.
24 A ba ye ku* meyo minkpwaté mekôn a ke minkôme meyoñe mese, a meyoñe ma* ye tibi Jérusalem akekui éyoñ éyoñe ya meyoñe* ja ye kpwaan.
25 “Nde fe, mendeme ma ye bo nlô jôbô a ngon a ateté, a e si, meyoñe ma ye ko woñ, teke yeme jame me bo, amu éduñe mañ a mintyôa mié.
26 Bôte ba ye wu a woñ, be yange’e mame ma ye bobane be bôte bese ya si melu ma zu, amu biôme ya yôbe bia ye fô’ôsan.
27 Nde fe ba ye yene Mona môt a so’o minkut été a ngul a beta étôtok.
28 Ve éyoñe mame mese ma ma ye taté na ma boban, teba’ané tetele a bete minlô amu nyiiane wônan ô ntoo bebé.”
29 Ane a nga nyoñe be éve’ane na: “Tame fombané élé figuier a bilé bise bivok.
30 Éyoñe bi bili mimfefé mekaé, miabebiene mia yene de, a mia yeme na ésep é ntoo bebé.
31 Avale da mia fe, éyoñe mia ye yene mame mete me boba’an, yemané na Éjôé Zambe é ntoo bebé.
32 Ma kate fo’o mia na a zen éziñ, miaé bôte wu wo ye ke mane wu ôsusua na mame ma mese ma boban.
33 Yôp a si bia ye lôt, ve mejô mame ma ye tabe nnôm éto a nnôm éto.
34 “Ve taba’ané ntyel a miabebiene na minleme mienane mi bo teke dite môs éziñ, amu mbia ndian, mbia nyuan a biyebe ya ényiñ, a môs ôte ô za so be mia atemetem, éyoñe mi nji bunan
35 ane ôlam. Amu wo ye so be bôte bese ba nyiñe si ése.
36 Ajô te, momba’ané, mi bo’o meye’elane me nja’ane biyoñe bise, ndembene mia ye sa’ale mame mese ma yiane boban a tebe ôsu Mona môt.”
37 Nde amôs, a mbe a ye’ele’e Temple, ve alu, a mbe a kele’e bômbô si* nkôle ba loone na Nkôle Beolivier.
38 A bôte bese be mbe be za’a koone nye Temple ndibe tyé na be zu vô’ôlô nye.
Notes
^ Nkobô Grec, “biwolo.”
^ Nkobô Grec, “belepta bebaé.”
^ Nge ke, “ôsame wé.”
^ Nge ke, “ézezam; éngana’a.”
^ Nge ke, “ba ye koñ.”
^ Nge ke, “nyii binyiñe bienan.”
^ Nge ke, “wu.”
^ Nge ke, “begentil ba.”
^ Nge ke, “begentil.”
^ Nalé a tinane na, a mbe a kele’e bômbô si nlame wua ya minlame mi mbe nkôl.
