Nlitan Jean a nga yen 12:1-17
12 Nde beta ndem a nga yené e yôp été: Minga a mbe a be’e* nlô jôbô, a ngon é mbe nye mebo si, a mbe a be’e couronne é bili ateté 12 nlô wé,
2 a minga ate a mbe abum. A mbôl a mbe bebé ya biaé, a mbe a yônô’ôk amu mintaé ya abiaé.
3 Ndeme fok é nga yené yôp été. Tame yen! Beta dragon a too évele ne zôññ, a bili minlô zangbwal a minlak awôm, a bediadème* zangbwal minlô mié yôp
4 a ôkote wé wo wo’otô ngabe jia ya mengabe melale ya ateté ya yôp, a a nga wua de si. A dragon a nga ke ôsu a tebe ôsu be minga a mbe bebé ya biaé, ndemben éyoñ a ye biaé, a ye sebeke mone wé.
5 A a nga biaé mon, mona fam, nnye ate a zu ba’ale meyoñe mese a ntum étyé. A mone wé a nga betebane* be Zambe a mfa’a éto njôane jé é ne.
6 A minga a nga tube nkôte si, vôme Zambe a nga kômesane nye afôla, a vôm a ye ve nye bidi tañe melu 1 260.
7 A bita bi nga bôlé yôp été: Michel* a beéngele bé be nga wosane dragon, a dragon a beéngele bé be nga wosan,
8 ve be nji be ngule ya dañe nye,* a vôme ya tabe a nji be a beta bo asu dap e yôp.
9 Nde beta dragon a nga wuabane si, nyo ya atata’a, nyu ba loone na Diable a Satan, nnye a du’u bôte ya si ése, a nga wuabane si a beéngele bé be nga wuabane si a nye.
10 A me nga wô’ô beta tyiñ a so’o yôp été a jô’ô na:
“Éyoñe ji nkôtan a éwôlô a Éjôé Zambe wongan a ngule ya Krist wé bi ntoo fo’o été, amu nyu a ve bobenyañe bangane bijô alu a amôs ôsu be Zambe a wuabaneya mfa’a ya si!
11 A be nga dañe nye amu metyi me Mone ntômba a amu mejô ya nkañete wop, a be nji nye’e binyiñe* biap to’o éyoñ awu é tele be ôsu.
12 Nde va’ané, a yôp a mia mi too été! Ve éngôngol a mia si a mañ, amu Diable a siseya mfa’a mi ne wôé a beta ayaa, a yeme’e na, a li’iya nye ve mon éyoñ.”
13 Éyoñe dragon a nga yene na a wuabaneya mfa’a ya si, a nga tibili minga a nga biaé mona fam.
14 Ve mefabe me beta ndôé mebaé me nga vebane be minga, na a yele a ke nkôte si afôla dé, e wôé, nnye ba yiane ve nye bidi tañ éyoñe jia a biyoñ a étune ya éyoñ,* ôyap a vôme nyo é ne.
15 A nyo é nga yô mendime mvuse minga, mendime mete me mbe ane ôsôé, na minga a nyoñ été.
16 Ve si é nga zu volô minga, a si é nga yoé anyu dé a min ôsôé dragon a nga yô anyu dé.
17 Nde dragon a nga yaa minga, nde a nga ke bo bita a mebuka’a me mvoñe bôte minga, a ba ba bo metiñe me Zambe mewôk, a ba be bili ésaé ya kañete ajô Yésus.
Notes
^ Nge ke, “a nga jaé.”
^ Nge ke, “bibeba’a bi éjôé.”
^ Nge ke, “A be nga kee mone wé.”
^ Nalé a tinane na, “Nyu a ne ane Zambe.”
^ Be ne fe jô na, “ve nye [nalé a tinane na, dragon] a nga woban ébôm.”
^ Éfia Grec, psukhê. Lañe’e Atinane bifia, “Ényiñ.”
^ Nalé a tinane na, biyoñe bilal a étun.
