Nlitan Jean a nga yen 17:1-18
17 Éngele wua ya beéngele zangbwale be mbe be bili bisua zangbwal a nga so a jô ma na: “Za’ak, ma ye liti wo ntyi’ane mejô beta minga bijabô a too abui mendime yôp,
2 nnye a nga bo mvite mame ya bisôk* a bejô bôte ya si, a bôte ya si be nga so’o woone ya mvite mame ya bisô’ô* jé.”
3 A a ngule ya nsisim, a nga kee ma nkôte si. A me nga yene minga a too e tit afan é too évele ne tyañ e yôp, nje éte é mbe njalan a abui biyôlé bi ébiasé, a é mbe é bili minlô zangbwal a minlak awôm.
4 Minga a mbe a be’e éyé é too bebé ane évele a évele ne tyañ, a nyanga jé é mbe a gôlôt a meko’o me ne édima a beperle, a a mbe a bili e wo wé, élaé é too nkôman a gôlôt, nje é mbe njalan a beangôndô be mam a mvite mame ya mvite mame ya bisô’ô* jé.
5 Éyôlé é ne ndimba é mbe ntilane mvom asu jé é too na: “Beta Babylone, nyia binga bijabô a nyia beangôndô be mame ya si.”
6 A me nga yene minga ate a so’o* metyi mimfufup a metyi bengaa be Yésus.
Yaa, éyoñe me nga yene nye me nga bo fe’e ne vema.
7 Nde éngele a nga jô ma na: “Amu jé ô ne fe’e ne vema? Ma ye kate wo ndimba ya minga ate a nyu tit afan é be’e nye, nje éte é bili minlô zangbwal a minlak awôm:
8 Tit afane wo te yen é mbe, ve é nji bo, akusa bo é ne bebé ya bet é so’o édok ébé a ja ke njañan. A bôte ya si, ba biyôlé bi nji bo ntilane mvulekane kalate ya ényiñ, ataté éyoñe bone be nga taté na ba bialé si, ba ye bo fe’e ne vema éyoñe ba ye yene na, tit afan é mbe ve é nji bo, a too ki na ja ye bo.
9 “Vôm ate nnye fe’e ja* sili: Minlô zangbwal mi ne ndeme minkôle zangbwal, vôme minga a too yôp.
10 A bejô bôte be ne zangbwal: Betane be kuya, wua a ne, a nyu mbok a ngenane te so; ve éyoñ a ye so, a yiane tabe fo’o ve étun éyoñ.
11 A tit afan é mbe ve é nji bo, é ne fe njô bôte muamô, ve ja so be bejô bôte zangbwal a ja ke njañan.
12 “Minlak awôm ô nga yene mi ne ndeme ya bejô bôt awôme be ngenane teke nyoñ éjôé, ve ba ye bi ngule ya jôé tañ awolo da a tit afan.
13 Be bili ôsimesane wua, a ba ve tit afan éjôé jap a ngule jap.
14 Ba ye wosane Mone ntômba, ve amu a ne Tate ya betate a Njô bôte ya bejô bôt, Mone ntômba a ye dañe be. A ba be ne a nye a nga loon a top, a ba wulu ba’aba’a a nye, ba ye fe dañ.”
15 A nga jô ma na: “Abui mendime wo te yene vôme minga bijabô a too, é ne bôt a bizu’u bi bôt a meyoñ a minkobô.*
16 A minlak awôm ô nga yen, a tit afan, ba ye vini minga bijabô a ba ye ndamane nye a li’i nye soé, a ba ye di minsône mié a mane di’i mie nduan.
17 Amu Zambe a futiya minleme miap été na be tôé ôsimesane wé, yaa, be tôé ôsimesane be bili mfa’a ya ve tit afan éjôé jap akekui mejô me Zambe ma ye mane tôéban.
18 A minga ô nga yen a ne ndeme ya beta tison a jôé bejô bôte ya si.”
Notes
^ Éfia Grec, pornéïa. Lañe’e Atinane bifia.
^ Éfia Grec, pornéïa. Lañe’e Atinane bifia.
^ Éfia Grec, pornéïa. Lañe’e Atinane bifia.
^ Nalé a tinane na, a bili’i metyi mimfufup ane ba bili meyok.
^ Nge ke, “atyeñe da.”
^ Nkobô Grec, “ayem.”
