Nlitan Jean a nga yen 21:1-27
21 A me nga yene mfefé yôp a mfefé si; amu nnôma yôp ba nnôma si be nga jañ, a mañe me nji beta bo.
2 Me nga yene fe tison é ne étyi, Mfefé Jérusalem, é so’o yôp été be Zambe, é too nkômesan ane minga a zu luk a bo nyanga asu nnôme wé.
3 Nde me nga wô’ô beta tyiñ a yôta’an e yôp été a so’o éto njôan a jô’ô na: “Tama yenan! Nda éndelé Zambe é ne a bone be bôt, a a ye tabe a be, a ba ye bo bôte bé. A Zambe émien a ye bo a be.
4 A a ye fimi mili’i mese mise map, a awu da ye ke fe bo, nge ñyôn, nge ntat, nge mintaé. Mame ya ôsusua me maneya ke.”
5 A Nyu a mbe a too éto njôan a nga jô na: “Tama yenan! Ma bo mame mese mimfefé.” A nga beta jô na: “Tili’i, amu mejô ma me ne mejô ya tabe me ndi* a me ne été.”
6 A nga jô ma na: “Me tôébaneya! Me ne Alpha a Oméga,* atata’a a memane. Nyu ase a wôk évé, ma ye ve nye mendime ma so anjeñe* ya ényiñe zezé.*
7 Môt a dañ a ye nyoñ éli’i ya mame mete, a ma ye bo Zambe wé a a ye bo mone wom.
8 Ve miñwôwoñ, ba be ne te mbunan, ba ba bo mame me ne angôndô, bewôé bôt, ba ba bo mvite mame ya bisôk* a ba ba bo mame ya ngbwel, bekañe bengulemelan, belaa minsos, ba ye ke ato’o nduan* a soufre. Ato’o nduan éte é ne ndeme ya awu baa.”
9 A éngele wua ya beéngele zangbwal be mbe be bili bisua zangbwal bi too njalan a minju’u zangbwal mia su’ulan, a nga so a jô ma na: “Za’ak, ma ye liti wo mbom, minga Mone ntômba.”
10 Nde a nga kee ma a ngule ya nsisim e beta nkôl a ne ôyabe yôp a liti ma tison é ne étyi, Jérusalem a so’o yôp, a so’o be Zambe,
11 a mbe a bili duma Zambe, minkôkôé mié mi mbe ane ako’o da dañ édima, ane jaspe a ngemban ane éyet.
12 A mbe a bili beta akak a too mbetane yôp a mimbé 12, a beéngele 12 be mbe be tele mimbé, a e mimbé mite, biyôlé menda me bôte ya Israël 12 bi mbe ntilan.
13 A mbe a bili mimbé milal est, a mimbé milale nord, mimbé milale sud, a mimbé milal ouest.
14 Aka’a ya tison é mbe é bili meko’o 12 ya mbôka’a, a e meko’o mete yôp, biyôlé 12 bi minlôman 12 mi Mone ntômba bi mbe ntilan.
15 Nyu a mbe a kobô’ô a ma a mbe a bili nkaé ô too a gôlôt, ô too ane ôvek, mfa’a ya ve’e tison a aka’a dé.
16 A tison é mbe meku’u menyine nté wua, nté a ndame be mbe abime da. A a nga ve’e tison a nkaé, a é mbe bebé kilimita 2 220;* a nté wé a nkôñe wé be mbe abime da.
17 A nga ve’e fe mfine ya tison, ô mbe binyi’a bi mo 144,* aval ane ôve’e môta binam ô ne, a too fe aval ôvek éngele ô ne.
18 Nkum ô mbe nlôñan a jaspe, a tison é mbe a gôlôt a ne mfuban a too ane éyet.
19 Mimbôka’a ya aka’a ya tisone mi mbe abeñe ya yen a mis a avale mekok ése é ne dia: mbôka’a ôsu ô mbe a jaspe, wu baa a saphir, wu lale a calcédoine, wu nyini a éméraude,
20 wu tane a sardonyx, wu samane a sardoine, wu zangbwale a chrysolithe, wu muamô a béryl, wu ébulu a topaze, wu awômô a chrysoprase, wu awômô a wua a hyacinthe, wu awômô a baa a améthiste.
21 Nde fe, mimbé 12 mi mbe mi bili beperle 12; mbé ôse ô mbe nkôman a perle wua. A beta njoñe ya tison a mbe nkôman a gôlôt a ne mfuban a too ane éyet.
22 Me nji yene temple tison éte, amu Yéhôva,* Nyu a bili ngul ése a ne temple wé a Mone ntômba fe.
23 A tison é nji yi nlô jôbô nge ngone na é faé été, amu duma Zambe da ve éfufup e tison éte, a Mone ntômba nnye a ne lambe ya été.
24 A meyoñe ma ye wulu a zene ya éfufube ya été, a bejô bôte ya si ba ye soo duma dap tison éte.
25 Mimbé mié mia ye bo te feteban éyoñ éziñe ya môs, amu alu da ye ke bo e tison éte.
26 A ba ye soo e tison éte été, duma a ésemé ya meyoñ.
27 Ve jôm ése é ne mvit, a ba bese ba bo mame me ne angôndô a ba ba bo medu’an, ba ye bo te nyiin été a zen éziñ; fo’o ve ba biyôlé bi ne ntilane mvulekane kalate ya ényiñe Mone ntômba, mbe ba ye nyiin.
Notes
^ Nge ke, “buni.”
^ Nge ke, “A ba Z.” Alpha ba Oméga be ne ékanga ôsu a ékanga ja su’ulane nkobe bikanga ya nkobô Grec.
^ Nge ke, “nsôlô mendim.”
^ Nge ke, “teke tañ.”
^ Lañe’e Atinane bifia, “Mvite mame ya bisôk.”
^ Nge ke, “lac nduan.”
^ Nkobô Grec, “bestade 12 000.” Stade wua a ne meta 185.
^ Bebé meta 64.
^ Lañe’e Atinane bifia.
