Mezik me ne mbamba das da so be Yéhôva. Ma nambe asimesan dangan, ma bo na nlem ô bômbô bia si ne mieññ, mezik ma ve fe bia ngule nyul. Bi too ndi na abeñe bia dangan da tôé nsôñan ôte. Ve bia bite bi ne beta volô bia mfa’a ôfe: bi ne bo na bi dañe kabetane Yéhôva.

 Ataté mbu 2014, bi kuliya abeñe bia a lôte 70, éyoñe ji bi ne jô na, ô ne bi jia jia ya bia bite minkobô a lôte 500! Ve ô ne sili womiene na, ‘Beza ba bo ésaé éte, a abim ésaé évé da sili asu na be kuli bia bite?’

 Bobejañ a besita ba yem ajô mesik mbe ba saé Service Audio/vidéô, Émo’o asu ñye’elan ya Tin Ékôan nje ja tebele ésaé ete. Bobejañ a besita 13 mbe ba saé composition, ba jeñe fe na bia bite bi kôme’e wô’é (ingénierie de son), a bo fe nta’ane mam a mam mese mevok ma sili mfa’a ôte. Émo’o éte é nga ve fe ôva’a ngul na bobejañ ya mesi mese be suk ésaé éte a zene ya nkol (télévolontaire); été: betili bia, bebôm mezik, a beyia bia. Bobejañ a besita ba belan a atyeñ mboone mam dap a éjote nyul ése teke jeñe na be wumulu bebien.

 Nde, aval avé ba kuli jia? Jam ôsu, Émo’o asu ñye’elan ja taté mane top bifus bia ye bo mbôka’a asu ngume jia, ba liti fe nsôñan ba kômbô tôé a lat a jia ete. Éyoñ éte bobejañ ba bo ésaé éte ba top za ya be be a ye kômesane mezik ya jia, a za a ye tili bifia ya été. Éyoñ éte ba taté bo mon ôbalebas ya jia ete. Bobejañ y’Émo’o asu ñye’elan ba taté vô’ôlô mon ôbalebas ate, mvus ya valé, ba beta ve melep mefe. Bobejañ ba saé jia ete ba beta bo mintyéndan mia sili asu na é kôme wô’é, mvuse ya valé ba su’ulane kuli nya nya jia ya ôbalebas ba ke taté bo. Ba nyoñ metyiñe ya bia bite bebéthel, nge ke be bobejañ be bili beminsini ba yian asu ésaé éte menda map, nge ke bevôm befe.

 Asu na be bo composition a enregistrement ya bia, bobejañ ba belan a beprogramme meval meva. Ésaé éte ja sili fe biko mesik, beminsini ba bo mixage, b’emplificateur bebafle a bemicro. Micro wua a ne bo jôm ane betoyini 50 akekui betoyini 500 a mvuk. Mbu 2020 bi nga belan bebé bemillion 68 asu na bi kus beminsini bia belane be asu b’enregistrement.

 Nde jé bia bo asu na bi yeme’e belane minvean? Bia dañ belane bobejañ be ne nseñ (Télévolontaire) a lôte na bi bi beta nsamba bôt asu mezik Bethel été. A fe na, a lôte na bi loone beyia bia bete asu b’enregistrement, bobejañ bebien be wô’ô mane bo ésaé éte a beminsini bap.

 Bobejañ a besita ba nye’e be wô’ô abeñe bia ete. Tara a nyiñe Allemagne, a jô na: “Éyoñ jam éziñ da deñele ma, bia bite bia volô ma na nlem ô bômbô ma si ne mieññ. Éyoñ ki ma wô’ô bia bite nkobô me nga bialé wô, a ne ve ane Yéhôva a fôlô ma mo mé été.” Mojañ Dmitry ya Kazakhstan a jô na: “Ma nye’e me wô’ô bia bite amu bia ve ki ma ésaé ya ke ma fas nge bifia ya été bia lu’an a minye’elane ya Bible nge momo. Bia bia volô ma na me bem ôsimesane wom élat jam a Yéhova.”

 Delia a nyiñ Afrique du Sud, a ve ôsimesane wé a lat abeñe bia dangan, a jô na: “Bi ne fo’o ve ane abeñe vôme ya ke sobô asu dam. Éyoñe nlem ô ne me abé, nge ke na njuk éziñ wo deñele ma, ma kui na me yene jia ja volô ma nlem. Biyoñ biziñ e wô’ô sili na me simesan aval ba yia jia éziñ, asu na me bo mon ôngôngô!”

 Bia biziñ ya été bi ne bi bôte ba dañe nye’e. Lerato fe a nyiñ Afrique du Sud a jô na: “Bia biziñ aval ane, ‘Paradis a ntoo bebé’ a ‘E mfefé émo wo zu’ bia volô ma na me ve’ele lôme mis e paradis a simesan môs mamien mé ke tôbane mema éyoñ a ye wômô. Éyoñ ése ma wô’ô bia bite, ma yen ane a zu mbil a zu wubane ma.”

 Jia éziñ ya bia bite é nga kôme volô ésoé éziñ ya Sri Lanka. A jô na: “Ñye’ele Science wom a nga jô ma mbia bifia aba sikôlô été fo’o ve amu me mbe Ngaa Yéhôva. Me nga ko woñ, teke yeme jam me jô. Éyoñ me nga bulane nda, mema a nga jô ma na me wôk jia é ne nlô ajô na ‘Étudier rend fort.’ Jia ete e nga volô ma na me yeme na ma yiane jeñ a kômesan éyalan. Môs ô nga tôé valé, me nga ke laan a ñye’ele wom. A nga nyoñ éyoñ ya vô’ôlô ma, a su’ulane fe kôme wôk miñye’elan Bengaa be Yéhôva. Ma ve ékôan Yéhôva akiba amu ba kuli bia, bia bia ve ngule nyul.”

 Nde bia soo moné ya kuli bia bite vé? Moné ate a so mimvean mia su’u ésaé nkañete mia bo; a mezen maval meva ba koone me donate.pr418.com. Akiba amu mimveane mienan.