Beta étôkane ya mbu 2020 a mbe fo’o ngum aval amu bi nga kuli nye Internet! Ve bobejañ a besita ya Malawi a Mozambique be nga bu’uban étôkan éte teke belan Internet. Aval avé jam ete e nga boban?

 Bimo’o bibaé ya Tin Ékôan (Émo’o bobejañ ba tebele bisaé si se a Émo’o asu ñye’elan) bi nga kañese na beta étôkan a lôte télé a radio asu bobejañe ya Malawi a Mozambique. Amu jé? Amu Internet a ne mbia tañ Malawi a abui bobejañ e vo’o belane nye. Mojañ William Chumbi a saé Béthel ya Malawi, a jô na: “Bobejañ a besita be nga bi bidi ya nsisim fo’o ve a zene ya télé a radio.” Mojañ Luka Sibeko fe a saé Béthel ya Malawi, a jô na: “Nge étôkan éte é nji ye lôte télé a radio, yeme na, fo’o ve mone doé bobejañe nnye a nge ye bu’uban je va.” To’o Mozambique fe, amu abui bobejañ e vo’o bi beminsini ba sili asu na be yen étôkan, a moné ya kus Internet.

 COVID-19 a nga bo na bi taté na bia belane bechaîne béziñe ya télé a radio asu bisulane ya akônda *. Bobejañ be nga ke yene bôte ba saé nda radio a ja’é be na be beta ba’a be mewolo asu na étôkan ése é lôte radio.

 E Malawi, bobejañ be nga ye tôbane nju’ éziñ. Nda radio é wô’ô ve bôte ve awolo da, amu ja simesane na nge be dañe tabe ayap, bôte ba vô’ôlô be ne viane wô’ô som. Ve bobejañ be nga kate be na ésaé bia bo ja volô abui bôt. A na, nté ane beta ôkon a nga taté, bia ve bôte ngule nyul a mbamba mefoé ya Kalate Zambe. Mefoé mete me ne volô ayoñ na é bi mbamba be bôt, a volô menda me bôte na me tu’a bo nlatan. Éyoñe be nga wô’ô nalé, nde be nga kañese ba’a bobejañ abim mewolo be nga sili.

 E Malawi, bi nga bo na beta étôkan a lôt e chaîne de télévision wua a station de radio wua, mbôle mbe bôte ya si éte ése ba dañe yem. Ve Mozambique, beta étôkan a nga lôte chaîne de télévision wua a bestation de radio 85.

 Bi nga belane million 18 a mvuk mesi mete mebaé asu na be liti beta étôkan e télé, a million bebé 13 asu na é kui radio. Metañe bi nga ya’an asu radio me mbe me sela’an; asu bone bestation, tañ é nji be é kui’ toyini awôm, wônaa bi nga ya’ane ki bebé million ébaé asu poste nationale.

 Bobejañ be nga ve ngule ya kôme belane moné ya mimvean. Éve’an é ne na e Malawi, be nga jose tañ a bestation de radio, ane be nga sé’é be ôbe moné; nalé a nga volô na be ba’ale million jia a mvuk. E Mozambique, menda beradio méziñ me nga kañese sé’é bia tañ amu bi ne zôsôô éyoñ bia bo mam me moné.

 Bobejañ bangan be mbe meva’a ya bu’uban beta étôkan a zene ya radio nge ke télé. Mojañ Patrick, mvendé ya Malawi, a jô na: “Bia ve bobejañe ya Tin ékôan akéva amu mam mese be nga bo asu dangan éyoñe ya beta ôkon.” Isaac fe mojañe ya Malawi, a jô na: “Bi nji bi beminsini, ve bi ne mevak amu ékôane Yéhôva é nga volô bia na bi vô’ôlô beta étôkane radio. Nda bôte jam ése é nga bu’uban étôkan a zen éte. Jam ete e nga bo na bi tu’a wôk abim avé Yéhôva a nye’e bebo bisaé bé.”

 Nkañete mbamba foé éziñ a nga tabe fe étôkane éte; a mbe éyoñ ôsu le a tabe beta étôkan. A jô na: “Ésaé ése é nga boban asu na bi yene beta étôkane télé é nga bo na me tu’a yeme na Yéhôva a ne fo’o Zambe ya ngul ése. Ôkone wu ô nji kamane nye na a ve bia bidi ya nsisim, a nga kui kui na a señe ma bie me too si nda jam. Me nga yemelane fe abim avé bebo bisaé be Yéhôva ba nye’esan. Nde me nga tu’a yeme na me ne fo’o nya ñyebee.”

 Mvendé éziñ é to jôé na Wyson ja jô na: “Ma kômbô ve ôlo ô ne mewôk a fek akiba amu wo nyoñe ngap a bia biyoñe ya beta ôkone nyi. Nta’ane mam be nga bo asu na bi bu’ubane beta étôkan a zene ya télé nge ke radio, ô nga volô abui ya be bia da nyiñ vôm azoé é né na e bo teke sup bidi ya nsisim.”

 Asu étôkane ya mbu 2021, Émo’o bobejañ ba tebele bisaé si se a Émo’o asu ñye’elan bi nga beta tôñe nta’ane mam ôte, a bo na beta étôkan a lôte télé a radio bevôm béziñ. Moné bia bo nye mam mete a so bia vé? Moné ate a so mimveane mia bo asu na mi su’u ésaé nkañete; abui ya be mia da bo de a zene ya donate.pr418.com. Akiba abui!