Bi nga’ane bi tyô’ô éyoñ Organisation mondiale de la santé a nga yôtane beta ôkone ba loone na, COVID-19 Ngone lale ya mbu ô nga man. Bi nji be ve buni na, ngume mbu wé bele lôt be kobô’ô ve ajô ôkon ôte wuwua. Ôkon ôte ô nga ndeñele bemillion be bôt, to’o bebo bisaé be Yéhôva. A ba be nga kon, a ba be nga jañele bisaé biap, a ba be nga juk amu bibu’a ya menda me bôte map me nga bili ôkon ôte. Jé Bengaa be Yéhôva be nga bo asu na, be volô bôt ôkon ôte ô nga nambe bevôm bevôm?

 Comité be coordinateur ya Tin ékôan a nga telé bone bimo’o 950 a mvuk na bi ke bia volô bobejañe ya si ése be nga tôbane minjuk étom coronavirus. Bevôm béziñ, bimo’o bite bi nga su’u fo’o bobejañ, ve bevôm bevok, bijôé bi nga volô Bengaa be Yéhôva. Bimo’o ya Tin ékôan bi nga volô bôt angôndô ya abui.

 Bi tame yene ve jam e nga boban e Paraguay. Kalate mefoé éziñ a nga jô na, ôkon ôte “ô nga toé abui bôte zaé e Paraguay.” Ve émo’o ya Paraguay é nga taté na ja kabe bobejañe bidi a biôm bife bi mbe ve yiane be tañe sondô ébaé; be nga ve’e fe’e na nda bôt ése é ne bi bôte benyin. Atôm ese e mbe e bili abui bidi, a besobô, a betawôlô, a biôm bife bi ne volô bôt. Atom ese e mbe ve bi biôm bebé tañe 20 000 francs.

 Mam mevé bobejañe bete be nga bo asu na, be bo teke be’e ôkon nge ke kôé bôte bevok ôkon nté be be mbe be volô’ô be? Be mbe be jaé’ bemasque, teke ke dañe subu bôte bebé. Be nga kôme fe véé mise na, bôte ba kabe bidi be bo de mfuban été a na, be jaé mengômesane me mbe ve bo na, bebien a bôte bevo’o be bo teke kôbô ôkon. Be mbe fe be yiane sôp a désinfecté bemetua bap a telé metôm bevôm be mbe be tatéya kôme mane fubu. Wônaa, bobejañe ya émo’o ki be mbe be yiane tebe ba ba ve metôm nya ôyabe.

 Ngon ôsu ya mbu 2021, Comité be coordinateur ya Tin ékôan a nga kañese na, be belane bemilliard bebé 14 asu na, be volô bôt éyoñe ya COVID ji. Befiliale a bimo’o asu mimvolan be nga yeme belane moné ate. Be nga jos a bebo makit asu na, be sé’é be metañ ya biôm ba yi. Bobejañe ba tebele ésaé éte e Chili be nga kômbô kuse kili kôn 750. Ve tañ kôn é nga bet angôndô! Nge atata’a ngon be mbe be kuane kili kôn 1000 francs, ézezañe ngon éte ébien, be mbe be nga kuane kili kôn 2000 francs. Valé be maneya kui tyiñe na, ba zu kuse kôn é ne dia nyi, be nga viane teme na, mvuse mewolo mebaé, nkuane kôn a nga loone be, a kate be na, môt éziñ a te zu bulane kôn a nga bañete ngon é nga man. Ane ba be nkuane makit be nga kui tyiñe na, bé jiba nyoñe kôn éte e tañ be mbe be ku’ane ngone ya mvus!

 Ve môs be mbe be yiane ke nyoñe kôn, mbo makite na a beta ki fe be sé’é tañ. Amu jé? A nga bôte bobejañ ajô na, be ne ôbangam ane bikôane bise bivok éyoñe ba kabe bidi. Mojañe wua ve ji’a ye’elane Yéhôva nlem été. Ane a nga kate mbo makit na, mekônda mese me bili ngume nta’ane mam wo volô na bi yeme bobejañe ba yiane mvolan. Bobejañe be nga kate fe nye na, mbôle bôte bia volô ba so bevôm bevôm, ba ve ke bôte bese avale biôme da. Atôm ese e bili biôme bia yian asu nda bôt ése. Be nga su’ulane fe kate nye na, Bengaa be Yéhôva ba tindi ke bôte na, be bo mimvean, a na, ba ya’ane ki bia asu ésaé bia bo. Nkuane kôn ve zu kam. Ane a nga beta kañese sé’é be tañ. Ve a nji su’u valé, a nga dase bobejañe kili kôn 400.

 Lusu a ne nnôme nkuse minga ya Libéria, a nyiñ a ngo jé ba nnôme wé a bone bap belal. Nde da zu bo na, môs éziñ be bo’o éfuse ya môs nté be mbe be ja’a étyamakak, mone ndaé wé a mbe a bili mimbu zangbwale ve sili nye na: “A ma, nde bi di jé den amu teke fe bidi?” Ane Lusu a nga yalane nye na, a kateya Yéhôva ajô ete e meye’elan a na, a to ndi na, é ve be jôm ya di. Môs ôte ôbien, éyoñe zañe môs é lôteya, bemvendé mbe ñhe ba loone Lusu ba na a ke nyoñ atôme dé. Lusu a jô na: “Môs ôte ñwô ndaé jam é nga yeme na Yéhôva a vô’ôlô meye’elan.”

 Wôna, minga éziñe ya République Démocratique du Congo ki a nyiñe fefele Bengaa be Yéhôva. Éyoñ a nga yen ane ba zu ve Bengaa be Yéhôva bete bidi a nga jô na: “Éyoñ ôkone wu wé man, ma fe mé bo Ngaa Yéhôva. Amu be ba simesane bobenyañe bap éyoñe ya minjuk.” Nde nnôme wé a nga sili nye na: “Donc wo kômbô jô na wé bo Ngaa Yéhôva fo’o ve amu nkuta ôlise nga?” Minga na: “Momo, ve nkuta ôlis ôte ô ne ndeme ya nya nye’an.”

 Nge Bengaa be Yéhôva be nga ji’a tebe a su’u bobenyañe bap éyoñe ya mbia ôkone nyi, a ne amu mimveane mienan. Bia ve mia akiba amu mimveane mia bo, mi tôñe’e melebe ya donate.pr418.com.