Teke éyoñ éfe Bengaa be Yéhôva be nga bi bidi ya nsisime nkol ane mbu wu. Ve abui mesi, bobejañe be bili ki fane ya ke internet. Abui ya be be da nyiñe vôme ba tyi’i courant éyoñ ése, nge vôme connexion a ndeñele, nge ke vôm internet a ne ne momo.

 Ve to’o nalé, abui bobejañ a besita e ne limiti bekalate bangane nkol, to’o teke internet vôm be too! Ba bo de aya?

 Be nga lôme mekônda ma nyiñ avale bevôm ete mon angônga ba loone na JW Box. A bili mone routeur be nga kuse beta nda makit, a bili fe logiciel éziñ, bobejañe ya Wofise wo wulu mam beminsini mbe be nga kôme nye. Wônaa été, bia koone fe bekalate a bevidéo ya anjeñe mefoé dangan jw.org. Ba kuan angônga da bebé dollar 75.

 Aba Éjôé, bobejañ a besita ba bem beminsini baba JW Box asu na be limiti bekalate a bevidéo. To’o ba be nji bi beminsini be ne tañ abui be ne bo de. Mekônda me nji bi internet ma bo aya asu na me bi mimfefé mi kalate e JW Box? Béthel a lôme be beclé USB éyoñ ése, ba beme be JW Box asu na be limiti mimfefé mi mam mia kui jw.org, ba kuane clé wua bebé dollar 4.

 Aval avé JW Box a volô bobejañ? Nathan Adruandra a ne nlô ya nda bôt, a nyiñe République démocratique du Congo, a jô na: “Me nga jaé jeñe na me bi drame “A Yéhôva, . . . wo me tabeya nye mebun” a Simesa’ane nga Lot. Ve jam ete e nga kate ma, ane me nga jô’é. Ve den me ne bi bedrame bete téléfône wom, a bia minga wom bi nto ngule ya tu’a yeme ye’ele bone bangan.”

 Tame vô’ôlané jôme mvendé é nga volô abui mekônda ya Nigéria na me bi JW Box ja jô: “Bobejañe ba yene JW Box ane susu’a das da so be be Yéhôva. Be ne wu a mvaé amu angônga ete da volô be na be limiti bekalate a bevidéo ya bikpwelé bia ye’ele bie bôt étua tyi’ibi.”

 Bi lômeya bobejañe ya Afrika, Océanie, a Amérique du sud mengônga mete a lôte 1 700. Bi nga soo moné ya bo de vé? Mimveane bebo bisaé be Yéhôva ya si se mmie mia su’u jam ete, abui ya be be da bo mie a zene ya donate.pr418.com. Akiba abui a bobejañ, mi ne akap.