Mbu ôse, ba bañete bobejañe ba bo Yéhôva ésaé ngum aval si se meku’u menyin, na be ke tabe sikôlô ya Galaad; sikôlô ate a bobane Centre d’enseignement des Témoins de Jéhovah ya Patterson, e New York. * E wôé, ba ye’ele bongô besikôlô avale be ne yeme be’e mimbe’e mise ba ve be ékôane Yéhôva. Ba ye’ele fe be avale be ne yemete mbunane bobejañe ya mekônda, nge ke ba ya Bebéthel ba lôme be, a avale be ne volô na ékôane Yéhôva é bo nlatan.

 Bi ne fo’o jô na sikôlô ya Galaad a ne asu bobejañe ya si se. Bi tame nyoñe ve mon éve’ane wua. Aba sikôlô 147 é nga bobane mbu 2019 é nga tôkane bongô besikôlô 56, be so’o mesi 29. Bôte ba tabe sikôlô ate ba yiane bo Bebéthélite, bekpwa’a mefan be ne ngum aval, bemissionnaire, nge ke bejome mekônda.

 Ngômesan ja taté ayab éyoñ ôsusua na sikôlô a kaa. Bobejañe ya Wofise wo fase mam me dulu ba taté mane kuse bongô be sikôlô bebillet d’avion. Asu aba sikôlô 147, be nga ya’ane jôm ane dollar 1075 asu na mongô sikôlô ase a zu kui Patterson. Bobejañ be mbe be so’o beîle Salomon be nga bet avion biyoñe binyin éyoñe be za’a Patterson, a biyoñe bilal éyoñe be bula’ane jale daba, dulu éte é nga bo kiliméta a lôte 35 400! Môt ase ya be be a nga ya’ane bedollar 2300 asu dulu ete. Asu na be bo teke ndamane moné, bobejañ ba fas mam me dulu ba taté fombô bebillet d’avion be ne mbamba tañe nkol. To’o éyoñe be jôya na be ba’ale be billet, ba ke ôsu a fase nge zañe va, be ne yene billet mfe a ne tañe tyôtyoé adañe nyi be nga ba’ale. Ba belane fe beticket ba dasé be, asu na be bo te ya’an avion biyoñ biziñ.

 Da sili abui bongô besikôlô visa ya États-Unis. Wofise wo wulu mam metiñe si se wo volô be mfa’a ôte. Jôm ane dollar 510 nje ja sili asu na mongô sikôlô ase a bi visa.

 Sikôlô ate a volô bia aya? Mojañ éziñ ba minga wé be nga tabe sikôlô ya Galaad be ne akônda da a Hendra Gunawan, mvendé éziñ Asie du Sud-Est. Mvendé éte ja jô na: “Bekpwa’a mefan be nji be akônda dañ ôsusua na ba lôme bia bongô be sikôlô ya Galaad. Ve nné ane be nga suane va, be nga taté na ba kôé bôte bevok ayôñe daba ya nsisim, a fulu ôdidi’ jap, ane bobejañe be nga taté na ba nyoñ ésaé nkpwa’a mefan. Sita éziñe ya akônda dangan a nga kui kui na a tabe sikôlô bekañete mbamba foé ya Éjôé!”

 Sergio Panjaitan a saé a abui bobejañe da so Galaad e Béthel ya Asie du Sud-Est. A jô na: “Sa ke mbe étam ba bu’ubane bibotane ya sikôlô, bia fe bia kôme bu’ubane bie. Ba yeme tene abui mam! Ve ba ba’ale ki me asu dap, ba yañele bia. Jam ete da ve bia ngule nyul angôndô, a bia fe bia belane mam ba ye’ele bia na bi yañele bôte bevok.”

 Bia nyoñe moné bia belane nye besikôlô bete vé? Mimveane mienan mmie mia volô, a abui ya be mia da bo mie a zene ya donate.pr418.com. Bia ve mia akiba a bobejañ, mimveane mienan mia su’u besikôlô ya Éjôé.