“Mon éyoñ mvus, bi nji be ve simesane na bi ne bi bidi ya nsisim nkol.” Ye mi ne tyiñ a mejô mete? Mojañ Geoffrey Jackson nnye a nga kobô nalé e foé #6 ya Tin ékôan (mbu 2020); a nga beta ba’a na: “Éko éziñ bia sili biabebien aval bi nga ye taté nge ôkone wu ô nga ye koone na bi nji bi bikpwelé ane JW Library. Nya ajô a ne na Yéhôva nnye a nga yañele bia mimbu mise mi, mfa’a ya kômesane bia asu avale bibubua di.”

 Aval avé Yéhôva a nga kômesane bia? Ésaé évé é nga sili asu na bi kuli application JW Library, a aval avé bia ke ôsu a sôan ékpwelé éte asu na é tu’a volô bobejañ?

 Ngone tane ya mbu 2013, bobejañe ya Tin ékôan be nga jô bobejañ ba saé programmation MEPS ya Warwick na be kôm application a bili Traduction du monde nouveau révisée. Paul Willies, mojañe wua ya ba ba bo ésaé éte a jô na: ‘Valé bi ngenane teke tame kuli ékpwelé bôte be ne limiti application store beminsini bap. Bi nga taté telé bisaé bife, a tobe abim bôt éziñ asu ésaé éte; ve be nga saé a bewofise befe asu na be bo ngule ya kuli application ate. Bi mbe bi ye’elan éyoñ ése, nde Yéhôva a nga volô na bi bo beta ésaé ate fo’o ve ngon étan! Ane bobejañ be nga yôtane beta ékôane ya mbu na application ate a kuiya!”

 Ve e mbe fe e sili’i na bobejañe be lañe bekalate befe application ate, sa ke ve nkôñelane Bible wua, a na be bi bekalate bete abui minkobô. Ngon ôsu ya mbu 2015, abui bekalate bia belane de e mbe e nto application ate, ve be mbe ve nkobô Énglis; e nga sili ve ngon ésaman asu na bobejañ be bo ngule ya limiti bekalate bete mintete minkobô mife.

 Ataté éyoñ éte, bobejañ be nga ke ba sôan application ate; be nga kô’ôlane bevidéo été, a mane nguni bekalate a bevidéo be ne asu bisulane ngume vôm, a bo fe na bobejañe be bi fane ya kui Guide de recherche nté ba lañ éfus éziñe ba kômbô tu’a wôk.

 Bôt akui million 8 ba belan Application JW Library beminsini bap môs ôse ya yôp, wônaa bôte a lôte million 15 ba bo de ngon ése! Jé ja sili asu na application ate a wulu mvo’é beminsini bete? Mojañ Willies a jô na: “Bia saé éyoñ ése asu na application a wulu mvo’é, a na bôte be belane nye tyi’ibi. Bia kô’ôlane mam éte kom ése. Mbôle menda ma kôme beminsini bia belane be ma tyendé mam éyoñ ése, bia fe bia yiane bo na application a wô’é a mimfefé beminsini ba kui. Da sili fe na bi bo bemise à jour éyoñ ése bia kô’ôlane bekalate a bevidéo e JW Library.” Bekalate be kuiya minkobô minkobô JW Library be ne bebé 200 000, wônaa b’enregistrement audio a bevidéo ke ba lôte 600 000.

 Application ate a vo’o wulu ve a beminsini. Bia yiane fe ya’an asu na bi bi licence a ve bia ngule ya belane beprogramme béziñ. Bia ya’ane bebé million wua mbu ôse asu jam ete. Ane ô vaa nalé, bia ya’ane fe million ésaman a mvuk asu Programmation MEPS mbu ôse, amu bia yi na application ate a wulu mvo’é mimfefé beminsini ba kui éyoñe ji.

 JW Library a nga volô na bi bo teke dañe belan abui moné na bi kuli bekalate mefep, a na tañe bia ya’ane na bi lôme be mekônda é sengan. Bi tame kobô ve ajô nsoé kalate Emfasané éfuse ya môs. Mbu 2013 bi nga kuli minsoé mi kalate mite bebé million 12. Ve mbu 2020, bi nga kuli ve jôm ane minsoé mi kalate bebé million 5 a too ke na bôte bebé 700 000 be nga nyiin ékôane Yéhôva mbu ôte. Bi nga sé’é abim bekalate bia kuli mefep amu abui bobejañ a besita da lañ éfuse ya môs e JW Library. *

 JW Library a ve fe bôte ba belane nye ésaé tyi’ibi angôndô. Asu Geneviève, sita éziñe ya Canada, ékpwelé éte ja volô na a bo mbane ya yé’é. A jô na: “Me ma meme fo’o na, nge e nga ye sili na me bo me tôkane bekalate bese mé belane be asu ayé’é, ma tu’a ke buni na me nga ye de bo môs ôse. Ve JW Library a volô na me belane ve tablette wom éyoñ ma yé’é, amu mam mese me ne été. E yé’é mbane nalé a volô ma na me yemete mbunane wom a tu’a subu Yéhôva bebé.”

 Éyoñe ya beta ôkon a wume nyi (COVID-19 ) nje bi nga tu’a yene mfi ya application ate. Charlyn, sita éziñe ya États-Unis a jô na: “Beta ôkon ate a boya na me lôte mbu wua teke yene ve kalate wua ya ba ba kuli mefep. Nte’e na me ne bi bekalate bese ma yi JW Library! Me vo’o bo te ve Yéhôva akiba éyoñ ma yen a nyoñe ngab a ma aval ete.”

 Faye nye a nyiñe Philippines, a wôlôkan ôsimesan abui ya be bia a jô’ô na: “Ma belane ve application wua wua asu na me yemete élate jam a Yéhôva. Nnye ma lañe mame tyé, nnye ma vô’ôlô nté ma ke ma bo bisaé bife, nde fe ma kômesane bisulan ve été, ma lañe minlô mejô ya été éyoñ ma yange jôm me telé nnoñ. Za aval abeñ application ete!”

 Ékpwelé éte é ne fe mfi asu ésaé nkañete. Sita éziñe ya Cameroun a mbe nkañete, a mbe a kombô’ô belan éfuse sita mfe a nga lañ bone besondô mvus. Ve a mbe a vuaneya éfus éte. A jô na: “Nte’e na me nga ba’ale bifia biziñe ya éfus éte. Ane me nga diin application a ke Bible, a tili bifia bite. Éfus éte éte é nga vam été été. Nge ma vuane bifuse biziñ, ma yeme na JW Library a ne volô ma na me beta yene bie tyi’ibi.”

 A ne mimveane mienane mmie mi nga volô na bi kôme JW Library a na bi ke bia sôane nye na a tu’a volô bobejañ. Abui ya be mia ja tôñe melep me ne donate.pr418.com éyoñ ba bo mimveane mite. Bia ve mia angôndô ya abui akiba amu mi ne akap.

1. Ngon awômô ya mbu 2013​—Bia kuli application a bili Traduction du monde nouveau révisée

2. Ngon ôsu ya mbu 2015​—Bia ba’a bekalate befe, ba b’ôsu be ne nkobô Énglis, mvuse ya valé, ba ya mintete minkobô mife ba yené

3. Ngon awôm a jia ya mbu 2015​—Bia kô’ôlane beta be mam befe application

4. Ngone tane ya mbu 2016​—Bia kô’ôlane bisulane ya sondô

5. Ngone tane ya mbu 2017​—Bia ba’a vôme môt a ne tili mam a kômbô ba’ale

6. Ngon awôm a baa ya mbu 2017​—Bia ba’a Bible d’étude

7. Ngone lale ya mbu 2019​—Be nto ve limiti b’enregistrement audio, a yene bevidéo, a lañe minlô mejô ya Guide de recherche

8. Ngon ôsu ya mbu 2021​—Bia ba’a nsoé kalate a kalate Bu’uban ényiñ nnôm éto!