Jé ja taté so wo nlô éyoñ wo wô’ô bifia bi: “Asu’ulane ya émo”? Éko éziñ wo buni na angônda jam é bobane si se meku’u menyin a mane wôé jôm ése é vee. Bôte béziñ ba buni na mbia ébubua é bobane si nyi, e dañe dañ éyoñ ba lañ avale mefoé di:

•   “Teke vaa nge beté, bebombe atomique bé tôtan a mane jiane si, nge sa ke na môta binam nnye a taté bita bite, wônaa bii kaa atemetem.”​—Bulletin of the Atomic Scientists (nkobô Énglis).

•   “Mimbu awôm mi ndeme lôte mi, beta b’akôs be nga vuñ, mefan me nga di’i nduan, bôte be nga wu zaé, biôme bi ne mañ bi nga ndaman abui, mbia ésep a ndône mendim bi nga boban émo minlañ.”​—National Geographic (nkobô Énglis).

•   “Afrika, bitandak bia ndamane mefup aval é ne zi’ili.”​—The Associated Press (nkobô Énglis).

 Ye si jé jañ asu’ulane ya émo? Jé Kalate Zambe a ye’ele?

 Momo. Mejô me Zambe ma bo’olô na si jé tabe nnôm éto. (Ecclésiaste 1:4) Zambe a ye ke tyam si émien a nga té, ve é “jiane [bôte] ba jiane si.”​—Nlitan 11:18.

 Bible a liti na éfia “émo” é tii a bôte ba biasé Zambe a bo mam avale bebien ba yene mvaé. Fo’o ve ane melu me Noé, asu’ulane da fombô ve bôte “be ne te bo mame ya Zambe,” mbe bete Zambe é mane tyam.​—2 Pierre 2:5; 3:7.

 Kalate 1 Jean 2:17 a jô na: “Si nyô ja lôt, a mbia nkômbane ya été.” Éfus éte ja liti na, sa ke si nje é nee ajô, ve bôte ba ke ôsu a yañele mbia minkômban mbe Zambe é mane tyam.

 Bible a nji kate bia môs ôbien asu’ulan dé so. (Matthieu 24:36) Ve a liti na é nto bebé. A liti bia mam mé boban ôsusua na asu’ulan da so:

•   Bita, bemfumbale ya zaé, bitua bi akon, a mbia mimfô’ôsane mi si bii bobane “mimfa’a abui.”​—Matthieu 24:3, 7, 14; Luc 21:10, 11; Nlitan 6:1-8.

•   Abui bôt dé dañe jeñe ve mvaé jap. Bible a jô na bé bo “ôzañ akum,” “bikalak,” a “te jôô bebien.”​—2 Timothée 3:1-5.

 Bôt abui be ne tyiñe na, ataté mbu 1914, mam ma boban émo ma lu’an a minkulane mejô ya Bible a lat a asu’ulan. Asu na ô tu’a wôk, ô ne lañe minlô mejô mi: “Que révèle la chronologie de la Bible sur l’année 1914 ?” a “Quel est le signe des « derniers jours » ?”

 Éfia ya nkobô Grek be nga kôñelane na “apocalypse” ja tinane na “nkulan” nge ke na “nlitan.” Da bo é kui na Bible a belan éfia éte éyoñ a kobô ajô jam da te kulan a too ke na e mbe nsolan. Éfus éziñ ja jô na Yésus “a ye yené [nge ke litiban] a so’o yôp;” nkulan ajô ôte wé tôéban éyoñe Yésus é litiban ane nyô a ne ngule ya vaa mbia be bôte si, a ve bebo bisaé be Yéhôva ma’ane map.​—2 Bethessalonicien 1:6, 7; 1 Pierre 1:7, 13.

 Ba loone kalate a dibe Bible na A·po·kaʹly·psis, nge ke na Nlitan, amu a liti bia mam mé boban melu ma zu. (Nlitan 1:1) Kalate ate a bili mbamba foé, a mam a kobô ma ve bia ndi nlem. (Nlitan 1:3) A liti na Zambe é vaa ékotekote si, a bo na é beta bo paradis. Éyoñ nkulan ajô ôte wé tôéban, bôte ba ye ke beta wô’ô nlem mintaé, nge juk, nge wu.​—Nlitan 21:3, 4.

 Ye wo kômbô tu’a wôk bengaka’a ya Bible bete? Bengaa be Yéhôva be ne meva’a ya ye’ele bôte Mejô me Zambe teke sili moné. Jé ja kamane wo na ô loone be, to’o den émien?